Mateyo 14

Zyakufwa kwa Joni Mubbapatizi

(Maako 6.14-29; Luka 9.7-9)

1Ciindi eeco Helodi mweendelezi wamu Galilii wakamvwa mpuwo ya Jesu. 2Mpoonya wakati kuli balupati-pati bakwe, “Tee mwati Joni Mubbapatizi wabuka kuzwa kubafu! Ncencico ncacitila zyanguzu eezi.” 3Mboobu mbucakacitika: Helodi wakatuma basinkondo kuti bakaange Joni akumubikka muntolongo. Wakacita eezi akaambo ka Helodiyasi mulamwe wakwe muka Filipo. 4Nkaambo Joni wakali kwaambila Helodi kuti “Tuuli mulawo kuti yebo ukwate mukamunyoko pe.” 5Helodi wakali kuyanda kuti ajaye Joni, pele wakali kuyoowa bantu, nkaambo bakali kuti Joni musinsimi. 6Lino buzuba bwakuyeeya kuzyalwa kwakwe nibwakasika, mwana musimbi wa Helodiyasi wakabazyanina kabotu bantu cakuti Helodi wakabotelwa. 7Nkabela wakasyomezya cakukonka “Ndakupa kufumbwa eeco ncotikumbile!” 8Lino banyina nibakamwaambila nceelede kukumbila wakati, “Ndipa mutwe wa Joni Mubbapatizi omu mumutiba.” 9Mpawo Helodi wakausa, pele nkaambo kakuti wakakonkezya bantu boonse kabamvwide, wakalailila kuti musimbi ooyu apegwe ncaakakumbila. 10Mpawo wakatumya kuti Joni akosolwe mutwe muntolongo. 11Nkabela mutwe wakwe wakaletwa mumutiba akupegwa kumusimbi ooyo, musimbi ooyo wakuuleta kuli banyina. 12Lino basikwiiya ba Joni bakaboola, babweza mutumba akuyoouzikka. Bamane bakapiluka baakwaambila Jesu.

Jesu mbwaakasanina bantu banji

(Maako 6.30-44; Luka 9.10-17; Joni 6.1-14)

13Jesu naakamvwa boobo, wakazwa ooko akunjila mubwato kuti aye kubusena buliibide. Pele makamu aabantu naakamvwa kuti Jesu wainka akuzwa muminzi akazinguluka amutobela. 14Lino naakalanduka wakabona makamu aabantu, wakababeda alweetelelo akusilika balwazi babo mbubakaza limwi. 15Nikwakaba kumangolezya basikwiiya bakwe bakati kulinguwe, “Bona kuno nkuusokwe, alimwi zuba lyabbila kale. Baambile bantu kuti baye muminzi bakalyuulile zyakulya.” 16Jesu wakati, “Tabeelede kuunka. Amubape cakulya nywebo.” 17Balo bakati kulinguwe, “Ino inga twacita buti oobo? Tujisi buyo zinkwa zyosanwe answi zyobilo.” 18Jesu wakati, “Amundipe.” 19Mpoonya wakalailila makamu aabantu kuti bakkale ansi, abwizu. Wakabweza zinkwa zyosanwe answi zyobilo, walungumana kujulu, walumba, wazikomona, wabapa basikwiiya kuti baabanye makamu aabantu. 20Nkabela boonse bakalya bakkuta. Basikwiiya bakabwezelela bufwefwelenga bakazuzya zisuwo zili kkumi azibili. 21Baalumi bakalya bakatisike kuzyuulu zyosanwe kutabalilizya bakaintu nibaba bana.

Jesu mbwaakeenda amaanzi

(Maako 6.45-52; Joni 6.16-21)

22Mpoonya Jesu wakalailila basikwiiya bakwe kuti banjile mubwato akuti basolole ciindi walo naakacili kwaambila bantu kuti bainke. 23Lino naakamana kulayana amakamu aabantu, wakatanta acilundu alikke ciindi calubundu-bundu waakukomba. 24Ciindi eeci bwato bwakali kulaale-laale kuzwa kunkomwe kabuyuuntanyizigwa amayuwe nkaambo guwo lyakali kubbubbula. 25Lino aaselukila nkuku, Jesu wakaza kulimbabo keenda amaanzi. 26Basikwiiya nibakamubona keenda bakayoowa bati, “Mmusangu!” Nkaako bakakwemba nkaambo bakayoowa. 27Pele ndilyonya eelyo wakaambaula kulimbabo wakati, “Amukkazike myoyo, ndime. Mutayoowi.”

28Mpawo Pita wakati, “O Mwami, kuti naa nduwe ncobeni ndaambile kuti ndeende amaanzi.” 29Walo wakati, “Koza.” Aboobo Pita wakasotoka kuzwa mubwato wakeenda amaanzi kaya kuli Jesu. 30Pele naakabona mayuwe wakayoowa akutalika kuya bubbila, mpawo wakalila, “O Mwami, ndivune.” 31Mpoonya-mpoonya Jesu wakamujata, wakati kuli nguwe, “Yebo osilusyomo luniini, nkaambo nzi ncoodonaika?” 32Nibakanjila mubwato alwalo luuwo lwakaleka. 33Nkabela basikwiiya bakamukomba bati, “Ncobeni yebo uli Mwanaa Leza.”

Jesu mbwaakaponya balwazi ku Jenesaleti

(Maako 6.53-56)

34Lino nibakazubuka lwizi, bakasika kucisi ca Jenesaleti. 35Bantu bakubusena oobo nibakaziba kuti ngu Jesu bakatuma nkombe kumasena oonse aaengelede. Eelyo bantu bakamuletela bakali kuciswa, 36bakamukumbila kuti azumizye baciswa kuti bagume buyo moombe wacisani cakwe. Eelyo boonse bakaguma bakaponyezegwa.

Currently Selected:

Mateyo 14: Tonga96

Highlight

Copy