Malaki 3

1“Amubone, ndiyootuma mutumwa wangu, ooyo uuyoondibambila nzila. Eelyo cakufwambaana Mwami Leza ngomuyandaula uyooboola kuŋanda eeyi, mutumwa wakaambwa mucizuminano, ooyo ngomusukamina uyooboola, mbwaamba Mwami Leza Singuzuzyoonse”

2“Pele ino nguni uukonzya kwiimina buzuba buboola oobo? Nguni uunga uukonzya kwiimina kuboola kwakwe? Nkaambo uyooba mbuli mulilo wamufuzi naa mbuli nsipa yasikusanzya. 3Uyookkala mbuli mufuzi asikusalazya nsiliva, uyoosalazya Balevi akubasalazya mbuli busalazigwa ngolida ansiliva. Ndendilyo Mwami Leza nayooba aabantu baleta zipaizyo mubululami, 4nkabela zipaizyo zyabantu bamu Juda abamu Jelusalemu ziyootambulika ku Mwami Leza, mbuli mumazuba aakamana, mumyaka yakainda.

5“Nkaako njooboola kulindinywe kuti ndizoomubeteke. Ndiyoofwambaana kubapa mulandu balozi, basimamambe, bakonka cakubeja, akuli baabo balida babelesi zyakuvola zyabo, badyaminina bamukabafu abamusyaala, bakatazya bazwakule, pele tabandiyoowi pe.” Mbwaamba Mwami Leza Singuzuzyoonse.

Kupa kwakkumi

6“Mebo nde Mwami Leza nsisanduki. Nkaako nywebo nolunyungu lwa Jakobo tamukoonyonyoonwa. 7Kuzwa kuciindi cabasikale banu mwakasiya malailile aangu, tiimwakaabamba pe.

“Amupilukile kulindime, ambebo ndapilukila kulindinywe, mbwaamba Mwami Leza Singuzuzyoonse. Pele mubuzya kuti, ‘Ino inga twapiluka buti?’ 8Sena muntu inga wabbida Leza? Pele nywebo mulandibbida. Pele mubuzya kuti, ‘Ino tukubbida buti?’ Mulandibbida mukupa kwakkumi amuzipaizyo. 9Nkaako mulisinganyizidwe nywebo nomusyobo woonse, nkaambo mulandibbida. 10Amulete kwakkumi koonse muŋanda yaciyobwedo, kutegwa kube zyakulya muŋanda yangu. Mboobu mbwaamba Mwami Leza ulati, ‘Amundisole muli ceeci, mubone naa nsikoojalula zipulo zyakujulu akumuletela zileleko zinji cakuti mulabula aakubikka zintu zyanu.’ 11Njoomukwabilila kuti bauka batakalyi zisyango zyanu, ayalo misaansa yamu myuunda tiikalosyi micelo yayo, Mbwaamba Mwami Leza Singuzuzyoonse. 12Eelyo misyobo yoonse iyoomwiita kuti mulilelekedwe, nkaambo nyika yanu inooli nyika mbotu. Mbwaamba Mwami Leza Singuzuzyoonse.”

Leza mbwaakasyomezya kubeengelela

13Mwami Leza ulati, “Mwakali kwaamba zintu zibi kulindime, mwamana mubuzya kuti, ‘Zinzi nzitwakaamba kuli nduwe?’ 14Mwakati, ‘Nkusowa ciindi kubelekela Leza.’ Ino twakajana mpindu nzi mukutobela malailile aakwe katweenda kaumba-umba mbuli basidilwe kumbele lya Mwami Leza Singuzuzyoonse? 15Pele lino twiita basilutuzi kuti balilelekedwe. Kasimpe basizibi balajana coolwe, abaabo basampaula Leza tabasubulwi!”

16Mpoonya aabo bakali kuyoowa Mwami Leza bakalyaambauzya, nkabela Mwami Leza wakaswiilila akumvwa makani aabo. Mpawo kwakalembwa bbuku lyaciibalusyo kumbele lyakwe lijatikizya makani aabaabo bakali kuyoowa Mwami Leza akulemeka zina lyakwe! 17Mboobu mbwaamba Mwami Leza Singuzuzyoonse ulati, “Bayooba bantu bangu mubuzuba oobo mbwendiyooyobolola lubono lwangu. Ndiyoobalekelela mbubonya mbuli wisi mbweengelela mwanaakwe uumubelekela milimo. 18Alimwi muyoobona lwaandaano akati kabaluleme ababi, aakati kabaabo babelekela Leza abaabo batamubelekeli.”

Currently Selected:

Malaki 3: Tonga96

Highlight

Copy