Malaki 2
2
1“Lino kulaililwa kwanu nkooku nobapaizi. 2Kuti naa mutaswiilili, nikuba kulemeka zina lyangu, ndiyoomusinganya, azyalo zibotu nzimwali kutambula ndiyoozisinganya. Iiyi, ndazisinganya kale nkaambo tamuyandi kundilemeka. 3Akaambo kakuti ndiyoosinganya lunyungu lwanu, njoomuzila bufumba bwabanyama kumeso, banyama aabo mbomupaizya lyamapobwe, nkabela muyootolwa mubwaange ambubo. 4Ndendilyo nomuyooziba kuti ndakamulailila kutegwa cizuminano cangu a Balevi kaciciliko. Mbwaamba Mwami Leza Singuzuzyoonse.
5“Twakapangana cizuminano ambabo cabuumi aluumuno. Ndakabapa nzizyo kuti bandilemeke, nkabela bakandilemeka lyoonse bakali kuyoowa zina lyangu. 6Bakali kwiisya zyakasimpe, kutali zyakubeja pe. Bakali kweenda andime muluumuno amubuluzi, nkaako bakagwasya banji kuti baleke zibi. 7Mulimo wabapaizi nkwiisya bantu luzibo lwini-lwini lwa Leza. Bantu beelede kunooinka kulimbabo kuti baiye nzendiyanda, nkaambo mbabatumwa ba Mwami Leza Singuzuzyoonse.
8“Pele nywebo mwakasiya nzila yangu, kwiindila mukwiisya kwanu mwakaleesya bantu banji, mwabisya cizuminano cangu a Balevi, Mbwaamba Mwami Leza Singuzuzyoonse. 9Ncenciceeco ncindacita kuti musampaulwe akuusigwa nsoni kumbele lyabantu boonse, nkaambo tiimwakatobela nzila zyangu, pele mwakavuninina bamwi mukulailila kwanu.”
Mbubatakali kusyoma kuli Leza
10Sena toonse tatujisi Taata omwe? Sena tali Leza omwe wakatulenga? Ino nkaambo nzi notubisyaanya cizuminano Leza ncaakapangana abasikale mukutasyomana kwesu? 11Bantu bamu Juda tabasyomeki. Ncintu cisesemya cakacitwa mu Isilayeli amumunzi wa Jelusalemu. Bantu bamu Juda bakasofwaazya busena busalala Mwami Leza mbwayandisya, kwiindila mukukwata bakaintu bakomba baleza babamasi. 12Pele kumuntu uucita eeci, kunyina makani naa nguni Mwami Leza uyoomunyonyoona akati kalunyungu lwa Jakobo, nikuba kuti akalete zyakupaizya ku Mwami Leza Singuzuzyoonse.
13Acimwi ncomucita nceeci, mulazuzya cipaililo ca Mwami Leza amisozi. Mulalila akweema nkaambo Leza taciswiilili zipaizyo zyanu nokuba kuzitambula amaanza obilo kuzwa kulindinywe. 14Mulabuzya kuti, “Ino nkaambo nzi?” Nkaambo kakuti Mwami Leza ngokamboni akati kako amukaintu wabukubusi bwako mukuti tocisyomeki kulinguwe, nokuba kuti ngomusaanyoko, mukaintu ngomwakasyomezyanya mulukwato. 15Sena tali Leza wakacita kuti babe omwe? Mumubili amuuya mbibakwe. Ino nkaambo nzi ncobali omwe? Nkaambo uyanda bana bamuyanda mukumulemeka. Nkaako amucenjele kuti kutabi muntu naba omwe uutasyomeki kumukaintu wabukubusi bwakwe. 16“Kulekana ndikusulaikide, mbwaamba Mwami Leza wa Isilayeli. Ndasulaika muntu uulivumbya zintu zili boobo, uucita mbuli mbwalivumba azisani zyakwe, mbwaamba Mwami Leza Singuzuzyoonse.” Nkaako amucenjele kuti kutabi muntu uutasyomeki.
Buzuba bwalubeta buli aafwiifwi
17Mwakatazya Mwami Leza amajwi aanu. Pele mulabuzya kuti, “Twamukatazya buti?” Mwamukatazya nomwaamba kuti, “Boonse bacita zibi bali kabotu kumbele lya Mwami Leza, ulabotelwa ambabo,” naa nomuti, “Ino Leza wabululami uli kuli?”
Currently Selected:
Malaki 2: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
