Luka 14

Jesu mbwaakaponya uuzimbide mubili

1Bumwi Buzuba bwa Kulyookezya butegwa Sabata Jesu wakaakulida kuŋanda yaumwi Mufalisi mupati, nkabela bantu bakali kumulangisya. 2Lino umwi muntu wakazimbide maulu amaboko wakasika kuli Jesu. 3Mpoonya Jesu wakabuzya bamaiyi ba Mulawo a Bafalisi kuti, “Sena mulawo wesu ulazumizya kuponya mubuzuba bwa Sabata naa pe?”

4Pele balo bakaumuna buyo. Mpoonya Jesu wakamujata, wamuponya muntu ooyo, amane wakamwaambila kuti ainke. 5Eelyo Jesu wakati kulimbabo, “Ino kuti umwi wanu kajisi mwana mulombe naba musune wawida mumukalo mu Buzuba bwa Sabata, sena takoomugwisya kufwambaana mubuzuba oobo?”

6Pele taakwe nibakakonzya kumuvuwa mukaambo aaka pe.

Kubomba moyo akusamausya beenzu

7Lino Jesu naakabona kuti bamwi bantu bakatambidwe kupobwe bakali kulisalila masena mabotu aalemenede, wakabaambila cikozyanyo eeci. 8“Muntu umwi naa wakutamba kupobwe lyabwiinga, utalisalili cuuno cabulemu, nkaambo ambweni kuli umwi wakatambwa uulemekwa kwiinda nduwe. 9Lino simeenzaanu wakamutamba nyoonse nyobilo uyooboola akwaamba kuti ‘Mupe cuuno muntu ooyu.’ Mpoonya yebo ciyookuusya nsoni kapati notikanyamuke kuyookkala acuuno citali cabulemu. 10Naa kuti watambwa, weelede kusala cuuno citali cabulemu kutegwa aboola simeenzaanu aambe kuti, ‘Mweenzuma, koya kumbele kuli zyuuno zyabalemekwa.’ Eeci ciyookucita kuti bakulemeke bantu boonse mbomwakatambwa limwi. 11Nkaambo ooyo uulisumpula uyoofwiinsigwa, pele ooyo uulifwiinsya uyoosumpulwa.”

12Lino Jesu wakati kuli simeenzu aakwe, “Ciindi noobamba cisusulo naa pobwe, utatambi beenzinyoko, nibaba banabokwanu, nibaba basazinyoko, nibaba bavubi mbomubambene aabo, nkaambo abalo inga bayookutamba kuti ujane kubweedelwa. 13Pele kuti wacita pobwe, utambe bacete, balema, basunkuta, aboofu, 14noyoolemekwa nkaambo balo tabajisi cakukubweedezezya pe. Walo Leza uyookulumbula ciindi bantu babotu baakubusigwa kubafu.”

Cikozyanyo capobwe pati

(Mateyo 22.1-10)

15Umwi wabaabo bakali kulya anguwe atebule, naakamvwa makani aaya, wakati kuli Jesu, “Ulilelekedwe ooyo uuyoolya pobwe mubwami bwa Leza!”

16Jesu wakati kulinguwe, “Kwakali umwi muntu wakacita pobwe pati akutamba bantu banji-banji. 17Lino kuciindi cakulya pobwe wakatuma mubelesi wakwe kuti akaite aabo boonse bakatambidwe, nkaambo zintu zyoonse zyakali bambidwe kale. 18Pele bakatambidwe bakatalika kulitamizya. Mutaanzi wakati, ‘Ndakaula muunda, aboobo ndeelede kuunka kuti nkaubone. Ndakukumbila kuti ukandaambilile kabotu.’ 19Umwi wakati, ‘Ndakaula zipani zyosanwe zyabasune lino ndiyanda kuyoobasola kuti mbone mbobeenda. Ndakukumbila kuti ukandaambilile.’ 20Aumwi wakati, ‘Ndakazwa akukwata onoono, aboobo nsikonzyi kuboola.’

21“Mpoonya mubelesi wakabweeda akuyooambila simalelo wakwe zintu eezi. Mwini ŋanda naakamvwa boobo wakanyema kapati, wakati kumubelesi wakwe, ‘Kofwambaana uunke mumigwagwa amutuzila twamumunzi, ukatambe bacete, balema, boofu, abatyokede.’ 22Naakaboola mubelesi wakati, ‘Mwami ndacita mbuli mboondilailila, pele kucili busena muŋanda.’ 23Simalelo wakwe wakamwiingula kuti, ‘Koya mutuzila tukosola mumyuunda amutuzila twiinda musokwe, ubagubizye bantu kuti baboole kutegwa ŋanda yangu izule.’ 24Ndamwaambila kuti taakwe naba omwe wabaabo bakatambidwe uuti kalabile pobwe lyangu!”

Muulo wakuba Sikwiiya

(Mateyo 10.37-38)

25Makamu aabantu akali kweenda anguwe, eelyo wakacenguluka akuti kulimbabo, 26“Kufumbwa muntu uboola kulindime, mukuti abe sikwiiya wangu, weelede kundiyandisya kwiinda mbwayanda wisi, banyina, mukaintu wakwe, bana bakwe, banabokwabo balombe abasimbi, nibuba buumi bwakwe. 27Awalo ooyo uutabwezi mapenzi mbuli ciingano cakwe akunditobela, takonzyi kuba sikwiiya wangu. 28Nguni akati kanu uunga wayanda kuyaka ŋanda ndafu, katasaanguni kukkala ansi akubala mali ngajisi kubona kuti naa alazulizya kuyasya ŋanda ndafu eeyo akwiimanizya. 29Nkaambo kuti watalika buyo ntalisyo, mpoonya yaakumukacila kumanizya, boonse baibona bayootalika kumuseka, 30akwaamba kuti, ‘Amulange muntu ooyu, watalika kuyaka, pele wakacilwa kumanizya mulimo wakwe!’ 31Naa mwami nzi uuzi kuti sinkondonyina uuyanda kulwana cisi cakwe, ujisi basilumamba bali zyuulu zili makumi obilo, uunga tasaanguni kukkala ansi akulibuzya naa basilumamba bakwe bali zyuulu zili kkumi balakonzya kulwana akuzunda ooyo mwaminyina uuboola?

32“Pele naa wajana kuti takonzyi kumuzunda, ulafwambaana kutuma baiminizi bakwe kumwaminyina kacili kulaale kumukumbila kuti batalwani kube luumuno akati kabo. 33Mbubonya oobo anywebo kufumbwa uutafutatali akusiya zyoonse nzyajisi, takonzyi kuba sikwiiya wangu pe.

Jesu mbwaakaamba zyamunyo

(Mateyo 5.13; Maako 9.50)

34“Munyo mubotu, pele kuti naa munyo wasampuka, ino inga walunzigwa buti? 35Tuucikwe mulimo nikuba kubulongo naa mulwi wabufumba bwamumunda pe, ulaba buyo wakusowa. Amuswiilisisye, kuti kamujisi matwi aakumvwisya!”

Currently Selected:

Luka 14: Tonga96

Highlight

Copy