Luka 11

Jesu mbwaakaiisya kukomba

(Mateyo 6.9-13; 7.7-11)

1Cimwi ciindi Jesu wakali kukomba kubusena bumwi. Naakamana kukomba, umwi wabasikwiiya bakwe wakati, “Mwami, utwiisye kukomba mbuli Joni mbwaakaiisya basikwiiya bakwe.”

2Jesu wakati kulimbabo, “Nomukomba amwaambe kuti,

‘Taata, Alilemekwe zina lyako,

Abuze bwami bwako.

3Utupe sunu zilyo nzyotubula buzuba abuzuba,

4Utulekele milandu yesu,

nkaambo tulabalekelela boonse balaamilandu kulindiswe.

Utatulekeli mukusunkwa.’”

5Alimwi Jesu wakabaambila kuti, “Ino kuti umwi wanu wainka kuŋanda yamweenzinyina akati kamasiku, waakwaamba kuti, ‘Musa, kondigwasya zinkwa zyotatwe, 6nkaambo ndaswaigwa mweenzu, nsijisi cakumusanina!’ 7Lino, atwaambe mweenzinyoko ooyo uuli muŋanda wakuvuwa kuti, ‘Utandikatazyi, tobwene, kumulyango twajala, alimwi mebo abana bangu twalala kale. Nsikonzyi kubuka kuti nkupe cimwi cintu.’ 8Nkaako lino njanda kumwaambila kuti natayandi kubuka kuti akupe zinkwa mukaambo kabweenzinyina, inga ulabuka akukupa zintu zyoonse nzyobulide nkaambo taakwe noolisenda, alimwi wakakatila kumukumbila. 9Nkaako ndamwaambila kuti, ‘Amukumbile mulapegwa, amuyandaule mulajana, amukonkomone mulajulilwa.’ 10Nkaambo kufumbwa ooyo uukumbila ulatambula, awalo uuyandaula ulajana, ayooyo uukonkomona ulajulilwa. 11Sena kuli wisi uunga naa mwana wakumbila nswi, wamupa nzoka? 12Na wakumbila ji, ulamupa kabanze? 13Kuti naa nywebo nobasizibi kamuzi kupa zintu zibotu kubana banu! Ino Uso uuli kujulu inga wakacilwa buti kupa Muuya Uusalala kuli aabo ‘bamukumbila!’”

Jesu a Belizebule

(Mateyo 12.22-30; Maako 3.20-27)

14Jesu wakali kugwisya muuya mubi wakali kulesya muntu kwaambaula. Muuya mubi niwakazwa mumuntu, muntu ooyo wakakonzya kwaambaula. Aboobo bantu banji bakali waawo bakagambwa kapati. 15Pele bamwi babo bakaamba kuti, “Ngu Belizebule, mwami wamyuuya mibi uumupa nguzu zyakugwisya myuuya mibi.”

16Bamwi bakali kusola kusunka Jesu, aboobo bakamukumbila kuti acite citondezyo citondezya kuti Leza nguwakamutuma ncobeni. 17Pele Jesu wakalizi kale miyeeyo yabo, eelyo wakati kulimbabo, “Kuti bantu bamucisi comwe babukilana, cisi eeco cilooleka. Alimwi kuti bantu bamumukwasyi babukilana ooyo mukwasyi ulooleka. 18Abwalo bwami bwa Saatani kuti bwalilwanya, ino bulaima buti? Mwaamba kuti mebo ngwisya myuuya mibi mubantu nkaambo Belizebule nguundipa nguzu. 19Kuti naa ndilagwisya myuuya mibi anguzu zya Belizebule, amundaambile, ino baccilili banu baigwisya aanguzu zyani? Nkaako bayoomuzula akutondezya kuti mulilubizizye! 20Peepe tali Belizebule, pele Muuya wa Leza uundipa nguzu zyakwiigwisya myuuya mibi, caamba kuti bwami bwa Leza bwasika kuli ndinywe.

21“Naa muntu singuzu kalibambilide azilwanyo zyakwe zyoonse, kalindila ŋanda yakwe, lubono lwakwe lunooli kabotu. 22Pele kuti kwasika umwi muntu uumwiinda nguzu wamulwana akumuzunda, ulamunyanga zilwanyo zyakwe nzyasyoma akwaabanya zintu nzyaakasaala.

23“Kufumbwa uuteendelani andime, ngusinkondoma, ayooyo uutabunganyi, ulamwaya.

Kubweedela kwamuuya uusofwazya mumuntu

(Mateyo 12.43-45)

24“Kuti muuya uusofwaazya wazwa mumuntu, uleendeenda mucimpayuma kuya buyandaula cilyookezezyo. Wacibula ulati, ‘Ndabweeda kumuntu wangu nkwindazwida!’ 25Nkabela ciindi ncuupiluka ulajana muntu ooyo uli buyo kabotu. 26Mpoonya ulapiluka kuyooleta iimbi myuuya iili ciloba mibi kwiinda nguwo, nkabela ilanjila akukkala mumuntu ooyo. Eelyo kumamanino, buumi bwamuntu ooyo bulabija kwiinda mbwaakali kusaanguna.”

Kubotelwa kwini-kwini mbokubede

27Lino Jesu naakamana kwaamba boobu, umwi mukaintu mukati kabuleya wakoompolola wati kulinguwe, “Ulilelekedwe mutumbu wakakuzyala akukunyosya!”

28Pele walo Jesu wakati, “Pele kapati, balilelekedwe aabo baswiilila majwi aa Leza akwaabamba!”

Cikozyanyo ca Jona

(Mateyo 12.38-42)

29Bantu nibakavula, Jesu wakatalika kwaamba wati, “Bantu bamazuba aano mbabi. Bayanda buyo kubona maleele. Pele taakwe nobatitondezegwe, ccita ambweni cakacitika kuli Jona musinsimi. 30Nkaambo mbubonya Jona mbwaakaba citondezyo kubantu baku Nineva, awalo Mwanaa Muntu mbwati kabe citondezyo kubantu bamazuba aano. 31Mubuzuba bwalubeta mwami mukaintu uuzwa kumusanza uyoozula bantu aaba, nkaambo walo wakeenda kuzwa kumagolelo aanyika kuzoomvwa busongo bwamwami Solomoni. Lino aano mpali wiinda Solomoni. 32Aboobo baku Nineva bayoomuzula, mubuzuba bwalubeta nkaambo balo bakeempa nibakakambaukilwa a Jona. Lino aano mpali wiinda Jona!

Mumuni wamubili

(Mateyo 5.15; 6.22-23)

33“Taakwe muntu uunga mbwaamunika lambe walisisa nikuba kulivunika mucisuwo, pele ulalibikka acikkazikilo kuti limunikile bantu boonse banjila. 34Meso ngomumuni wamubili. Meso kuti kaali kabotu awalo mubili woonse ulasalala. Pele kuti naa meso kaatali kabotu, awalo mubili mbuubede ulaba aamudima uusiya mbi. 35Nkaambo kaako ucenjele kuti mumuni uuli mulinduwe utazimaani pe. 36Aboobo kuti mubili kuuzwide mumuni, kuutakwe akabazu kadimeene nokaceya, inga unooli mukusalala, mboonya mbuli lambe mbolitondezya mubili wako nolimunikila alinduwe.”

Jesu mbwaakakalalila Bafalisi abamayi ba Mulawo

(Mateyo 23.1-36; Maako 12.38-40)

37Jesu naakamana kwaamba, umwi Mufalisi wakamukumbila kuti akalye anguwe aboobo Jesu wakainka. Lino wakanjila muŋanda akukkala kuti alye. 38Mufalisi umwi wakagambwa naakabona kuti Jesu watalika kulya katasambide. 39Mpoonya Mwami wakati kulinguwe. “Ncobeni, nywebo no Bafalisi mulasanzya nkomeki amutiba mupati mpozili aanze, kakuli kuti mukati kanu muzwide buyo bunyangi abubi. 40Nywebo nobafuba-fuba! Sena ooyo wakalenga aanze, tali ngowakalenga amukati? 41Amupe kubacete eezyo zintu zili mukati kankomeki amitiba, eelyo zintu zyoonse ziyoomusalalila.

42“Maawe kulindinywe no Bafalisi. Nkaambo mulapa kuli Leza cimanya kkumi cazisyu acakulunga cakulya azisyu zyoonse zimwi, pele muleka kucita ziluleme kubantu akuyanda Leza. Kayi zintu eezi mweelede kuzicita kamutaleki zimwi pe. 43Maawe kulindinywe no Bafalisi! Nkaambo musala zyuuno zyabulemu muzikombelo, akuyandisya kujuzigwa akubulemekwa muzisambalilo.

44“Maawe kulindinywe, nkaambo muli mbuli zyuumbwe zibundide cakuti bantu balalyata kabatazi kuti aawa kuli zyuumbwe.”

45Nkabela umwi wabasimulawo wakamwiingula kuti. “Omwiiyi, mukwaamba boobo, ulasampaula aswebo!”

46Jesu wakamwiingula kuti, “Maawe kulindinywe, nobamayi ba Mulawo! Nkaambo mutwikka bantu mikuli milemu iiminya, kakuli nywebo nobeni mulakaka kwiiguma mikuli eeyo nikuba akanwe buyo.

47“Maawe kulindinywe! Nkaambo mulayaka zyuumbwe zibotu zyabasinsimi mbabonya bamauso mbibakajaya. 48Nkokwaamba kuti eeco ncobakacita bamauso mulacizumina, nkaambo balo bakabajaya basinsimi, ono nywebo muyaka zyuumbwe zyabo. 49Akaambo kaako Leza mubusongo bwakwe ulati, ‘Ndiyoobatumina basinsimi abatumwa, bamwi babo bayoobajaya, alimwi bamwi bayoobapenzya.’ 50Nkaako bantu baciindi cino bayoosubulwa akaambo kabasinsimi boonse mbibakajaya, kuzwida kumalengelo aanyika, 51kuzwa kukujaigwa kwa Abela kuyoosikila kukujaigwa kwa Zekaliya, ooyo wakajailwa akati kacipaililo abusena busalalisya bwamuŋanda ya Leza. Ndamwaambila kuti, ncobeni bantu baciindi cino bayoopegwa mulandu akaambo kazintu zyoonse eezi!

52“Maawe kulindinywe, nobamayi ba Mulawo! Nkaambo mwakasisa kkii waluzibo. Akaambo kakuti nywebo tamunjili mulasinkila aabo basoleka kunjila!”

53Lino Jesu naakazwa ooko, bamayi ba Mulawo antoomwe a Bafalisi bakatalika kumutongooka kapati, alimwi bakatalika kumubuzya mibuzyo iijatikizya zintu zinji-zinji. 54Bakali kusola kumuteya kuti bamujate mukwaamba kwakwe, kuti ambweni ulaamba cintu citaluzi.

Currently Selected:

Luka 11: Tonga96

Highlight

Copy