Jemusi 5

Ucenjezya bavubide

1Amuswiilile lino nobavubi, amulile akoomoka nkaambo kamapenzi aatimusikile. 2Buvubi bwanu bwabola, zyakusama zyanu zyaligwa mapempya. 3Ngolida ansiliva zyanu zyaba aankalaya, nkabela nkalaya eeyo buyooba bukamboni bwakumuzula buyoonyonyoona mibili yanu mbuli mulilo. Mwalundika lubono mumazuba aano aamamanino. 4Amulange, tiimwabbadela aabo bamutebwida. Mwabanyanzya calucengo. Amumvwe matongoosi aabo, alo amvwigwa ku Mwami Leza Mutalabala. 5Mwalibukkede ansi aano. Mwalinenesya mukulibambilila buzuba bwakujaigwa. 6Mwapa mulandu akujaya baluleme batakamukazya pe.

Kukkazika moyo akukomba

7Bakwesu, amukkazike myoyo mane kusikila Mwami akaboole. Amubone, mulimi mbwalindila micelo mibotu mane iboneke mumuunda wakwe. Ulakkazika moyo mane itange mvula alimwi ayabili iwe. 8Anywebo amukkazike myoyo, muyume, nkaambo Mwami uli aafwiifwi kuboola.

9Nobakwesu, mutanoobejelani, kutegwa mutabetekwi a Leza. Amubone mubetesi uliimvwi aamulyango. 10Nobakwesu, amubone citondezyo cabasinsimi bakakambauka muzina lya Mwami Leza. Nikuba kuti bakapenzegwa pele bakakkazika myoyo. 11Amubone, tulaamba kuti, “Balilelekedwe aabo bakakatila.” Mwakamvwa zyakukakatila kwa Jobo, alimwi mulizi eezyo zyakamucitila Mwami kumamanino, nkaambo ngusilweengelelo ngusilubomba.

12Pele kwiinda zyoonse, bakwesu, mutanookonki pe. Mutakonki nikuba kuti, “Kujulu buya!” nikuba kuti, “Ansi buya!” nikuba muli cimwi. Pele mukuzumina kamuti, “Iiyi,” mukukaka kamuti, “Peepe,” kuti mutajaninwi mulandu.

13Naa umwi wanu uli mumapenzi, akombe. Naa umwi wanu ulikondedwe aimbe nyimbo zyakutangala. 14Naa umwi wanu waciswa, aite bapati bambungano kuti bamukombele, bamunanike mafuta muzina lya Mwami. 15Naa bakomba calusyomo mulwazi ulapona. Mwami ulamubusya, nkabela kufumbwa zibi nzyaakacita zilalekelelwa. 16Amwaambilane zibi zyanu alimwi amukombelane, kuti muponyezegwe. Kukomba kwamuntu uululeme kulaanguzu mpati. 17Elija wakali muntu uulya maila mbubonya mbuli ndiswe. Wakakomba kuti mvula itawi, nkabela tiiyakawa kwamyaka yotatwe amyezi iili cisambomwe. 18Naakamana wakakomba lwabili, eelyo mvula yakawa, ayalo nyika yakazyala micelo yayo.

19Nobakwesu, naa umwi wanu wasweeka akusiya zyabwini, kwamana umwi wamuboozya, 20amuzibe kuti uuboozya sizibi kuzwa munzila yakwe iisweekede, uyoofutula muuya wayooyo kulufu, alimwi azibi zyakwe zinji-zinji ziyoolekelelwa.

Currently Selected:

Jemusi 5: Tonga96

Highlight

Copy