Baefeso 6

Zyabana abazyali

1Nobana, amuswiilile bazyali banu mu Mwami, nkaambo kucita boobu cililuleme. 2Nkaambo Majwi aa Leza alati, “Lemeka uso abanyoko.” (Ooyu ngo mulawo mutaanzi uujisi cisyomezyo.) 3“Wacita boobo, ulalelekwa, alimwi uloongola munyika.”

4Anywebo nomawisi, mutanookalalili akunyemya bana banu cabuyo, pele amubalele mukubaiisya akubalailila munzila ya Mwami.

Zyabazike abasimalelo babo

5Nobazike, kamubaswiilila basimalelo banu baansi aano, cakubalemeka akubapa bulemu amoyo omwe, mbubonya mbomunga mulabelekela Kilisito. 6Citabi buyo cipa meso mbuli kuti muyanda kubotezya buyo bantu. Pele mbuli babelesi ba Kilisito, mubamanine milimo amoyo omwe oobo mbwayanda Leza. 7Amubabelekele calumwemwe, mbuli kuti mubelekela Mwami, kutali bantu buyo. 8Mulizi kuti kufumbwa cibotu ncacita muntu, uyootambula bulumbu ku Mwami nkaambo kancico, naba muzike naba muzyale.

9Anywebo nobasimalelo, mubacitile mbubonya bazike banu. Mutali kubakongi pe. Mulizi kuti balo andinywe mulijisi simalelo omwe uuli kujulu, walo uutajisi lusalululo.

Zilwanyo Leza nzyapa

10Kumanizya ndati, amuyume mu Mwami amunguzu zyakwe zipati. 11Amubweze zilwanyo zyoonse zya Leza, kutegwa mukakonzye kukazya bucenjezu bwa Saatani. 12Nkaambo nkondo yesu tiili yakulwana aabantu pe, pele njakulwana abasibwami, abasinguzu, abeendelezi bamudima waansi ano, alimwi amyuuya mibi minji-minji yamujulu. 13Nkaambo kaako amubweze zilwanyo zyoonse zya Leza, kutegwa mukakonzye kuzuunyana mubuzuba bubyaabi, mwaakumanizya muya kwiima.

14Amuyume, mulyaange bwini mbuli lutambo mucibuno. Amusame bululami mbuli kabaki kalubulo acamba. 15Amulibambilile kukambauka Makani Mabotu aapa luumuno mbuli kuti mwasama ndyasyo. 16Kwiinda zyoonse amube aalusyomo, alube ntobo yanu, njomukonzya kuzimya mivwi iiyaka mulilo iifuswa a Mubi. 17Lufutuko ndomujisi lube mbuli ngowani iimukwabilila. Amubelesye majwi aa Leza aali ndepanga limupa Muuya Uusalala. 18Amukombe ciindi aciindi kamusolwedwa a Muuya Uusalala. Amupaile kuli Leza ankombyo ziindene-indene. Amupakamane kukombela bantu ba Leza, mutaleki pe. 19Amundikombele ambebo kuti Leza andipe majwi nekambaukila bantu maseseke aali mu Makani Mabotu. 20Nikuba kuti ndili muntolongo, pele ndi mutumwa wa Makani Mabotu. Amundikombele kuti ndaaambe cabusicamba mbuli mbweelede.

Kujuzya kwamamanino

21Tikikasi, mukwesu uuyandika uzoomwaambila zintu zyoonse, mbuli mbwepona ancendicita. Ooyu ngusimulimo uusyomeka wa Mwami. 22Nkakaambo aako ncindamutumina kulindinywe, kuti azoomwaambile mbotupona akuti azoomuyumye.

23Leza Taata a Mwami Jesu Kilisito amupe luumuno, luyando, alusyomo, nobakwesu. 24Leza ababede aaluse boonse bayanda Mwami wesu Jesu Kilisito aluyando lutamani.

Currently Selected:

Baefeso 6: Tonga96

Highlight

Copy