Baefeso 5

Zyakweenda mumumuni

1Lino amube basikwiiya Leza, mbuli mbomuli bana bayandwa. 2Alimwi mweende muluyando, mbubonya mbuli Kilisito mbwaakatuyanda. Wakalyaaba lwakwe mwini nkaambo kandiswe, wakaba cituuzyo acipaizyo cabweema bubotu kuli Leza.

3Nkaambo muli bantu ba Leza, bwaamu abusofwaazi nikuba kulikumbuzya tazyeelede kwaambwa akati kanu pe. 4Mutaambi zijazya bweeme, zyabufuba-fuba, nikuba zitagwasyi ziteelede kwaambwa, pele kamwaamba buyo zyakulumba Leza. 5Amuzibe eeci cakasimpe kuti taakwe muntu sibwaamu, naa sibusofwaazi, naba sikuliyanda (nkokuti sikukomba mituni) uukonzya kutambula bwami bwa Kilisito abwa Leza.

6Kutabi muntu uumuunina amajwi aabuyo, nkaambo zintu zili boobu nzezileta bukali bwa Leza kubantu bataswiilili. 7Nkaambo kaako muteendi ambabo pe. 8Ciindi cakale mwakali mumudima, pele mazuba aano muli mumumuni wa Mwami. Aboobo amweende mbuli bantu bali mumumuni. 9Nkaambo aali mumuni alaboneka bubotu, bululami, azyabwini zyoonse. 10Amwiiye eezyo zibotezya Mwami. 11Mutasangani abacita milimo yabuyo yamudima, pele nywebo mweelede kubakazya. 12Kayi cijazya nsoni nikuba kwaamba zintu eezyo nzyobacita cakusisikizya. 13Pele mumuni nguuyubununa zyoonse, eelyo zilabonwa aatuba. Coonse cilibonya aatuba cabalilwa. 14Nkankakaako ncokulembedwe kuti,

“Sinsimuka, yebo oocoona,

buka kuzwa kubafu, eelyo Kilisito uyookumunikila.”

15Amucenjele kapati abweende bwanu. Muteendi mbuli bafuba-fuba pe, pele amweende mbuli basongo. 16Amube basungu kutegwa ciindi canu mutacisowi buyo, nkaambo mazuba aasunu mabi. 17Nkaambo kaako mutafubaali, pele amuzibe Leza nzyayanda kuti mucite.

18Mutakolwi, eeci cileta budakwa, pele amusolelwe a Muuya Uusalala. 19Amwaambilane amajwi aantembauzyo, anyimbo zyakulumba azimwi zyakulumbaizya Leza kamwiimbila Mwami cakubotelwa amoyo woonse. 20Mulumbe Leza Taata lyoonse akaambo kazyoonse muzina lya Mwami wesu Jesu Kilisito.

Zyabakaintu abalumi

21Nkaambo mulemeka Kilisito, amulibombye kuli umwi aumwi.

22Nobakaintu, amulibombye kubalumi banu, mbubonya mbuli ku Mwami. 23Nkaambo mwaalumi ngomutwe wamukaintu, mbubonya mbuli Kilisito mbwali mutwe wambungano, ngomubili wayo, alimwi ngo Mufutuli wayo. 24Mbubonya mbuli bambungano mbobalibombya kuli Kilisito, abakaintu baleelede kulibombya kubalumi babo muzintu zyoonse. 25Nobalumi, amuyande bakaintu banu, mbubonya mbuli Kilisito mbwaakayanda mbungano akulyaaba akaambo kayo 26kuti aisalazye. Wakaisalazya naakaisanzya amaanzi alimwi amajwi aakwe. 27Wakayanda kuti ibe yakwe mwini yabulemu, kiitajisi butongo nikaba kapa, niciba cimwi cili boobo, pele kuti kiisalala kiilondokede. 28Mbubonya oobo abalo balumi mbobeelede kuyanda bakaintu babo mbuli mbobaliyanda lwabo. Ooyo uuyanda mukaintu wakwe, ulaliyanda mwini. 29Nkaambo taakwe muntu uusulide mubili wakwe pe, pele ulausanina akuubamba. Nenzila njiyonya eeyo Kilisito njaakacitila mbungano 30iili ngomubili wakwe, eelyo swebo tuli zizo zyamubili ooyo. 31Mbubwaamba Malembe kuti, “Nkaambo kaako mwaalumi uyoosiya wisi abanyina akukakatila kumukaintu wakwe, eelyo aaba bobilo baba mubili omwe.” 32Majwi aaya atwaambila zisisidwe zyamaanu, eelyo ndati aaya aamba zya Kilisito ambungano. 33Aboobo, mwaalumi umwi aumwi uleelede kuyanda mukaintu wakwe mbubonya mbwaliyanda mwini, alimwi mukaintu uleelede kulemeka mulumaakwe.

Currently Selected:

Baefeso 5: Tonga96

Highlight

Copy