Milimo 2

Kusika kwa Muuya Uusalala

1Nibwakasika buzuba bwa Pentekosite, boonse basyomi bakalibungene mubusena bomwe. 2Ndilyonya kwakamvwigwa muzunzumina kuzwa kujulu uuli mbuli guwo pati, wakazuzya ŋanda yoonse oomo mobakakkede. 3Mpoonya kwakaboneka kubala mbuli milaka yamulilo, yakakkala ali omwe-omwe wabo. 4Aboobo boonse bakazula Muuya Uusalala, bakatalika kwaambaula mumisyobo iimbi mbubonya mbuli Muuya mbwaakabapa.

5Lino kwakali Bajuda bakali mu Jelusalemu, bakomba Leza bakazwa muzisi zyoonse zyandeene-andeene. 6Nkabela niwakamvwigwa muzunzumina ooyu, bantu banji-banji bakabungana. Boonse bakazingwa nkaambo omwe-omwe wabo wakabamvwa basyomi aabo kabaambaula mumusyobo wakwe mwini. 7Bakagambwa akumaninwa maanu bati, “Sena aaba bantu baambaula boobu tabali Bagalilii? 8Ino cacitika ncinzi kuti swebo toonse tubamvwe kabaambaula musyobo wesu-wesu? 9Tobamwi tuzwa kucisi ca Paatiya, bamwi ku Mediya aku Elamu, bamwi bazwa ku Mesopotamiya, ku Judiya, aku Kapadosiya, bamwi bazwa ku Pontusi, ku Asiya, 10bamwi bazwa ku Fuligiya, Pamfiliya, bamwi bazwa ku Ijipiti, muzibaaka zyacisi ca Libya afwiifwi a Sailini, alimwi tobamwi tuli beenzu tuzwa ku Loma. 11Kwakali Bajuda abatobela lukondo lwa Bajuda. Tobamwi tuzwa ku Kiliti aku Alabiya, nikubaboobo toonse twabamvwa kabaamba misyobo yesu, baamba zintu zipati eezyo Leza nzyaakacita!”

12Mukugambwa akuzingwa kupati bakali kubuzyanya kuti, “Ino eeci caamba nzi?”

13Bamwi bakatalika kuseka kabati, “Taakwe, bantu aaba bakolwa!”

Pita mbwaakakambauka

14Mpoonya Pita wakaima abamwi batumwanyina bali kkumi aumwi. Eelyo wakatalika kwaamba ajwi pati kunkamu eeyo, wakati, “Nywebo no Bajudama, anywebo nyoonse nomuli mu Jelusalemu, amundiswiilile, mumvwisisye makani aaya ngenjanda kwaamba. 15Aaba bantu tabakoledwe pe mbuli mbomuyeeya, nkaambo cicili cimafumo-fumo. 16Pele eeci ncencico cakaambwa amusinsimi Joweli naakati,

17‘Leza wakati, Mumazuba aamamanino,

njootila Muuya wangu abantu boonse.

Bana banu balombe abasimbi bayooamba majwi aangu.

Bakubusi bayoobona zilengaano,

abalo bamadaala bayoolota ziloto.

18Iiyi, njootila Muuya wangu ababelesi bangu,

baalumi abakaintu mumazuba aayo,

nkabela bayooamba majwi aangu.

19Ndiyoocita zigambya kujulu, azitondezyo ansi aano.

Kuyooba bulowa, amulilo, asikunku wabusi.

20Zuba liyoosiya mbi, awalo mwezi uyoosalala pyu mbuli bulowa,

kabutanasika buzuba bwa Mwami, oobo bupati bulemu.

21Lino ooyo uukomba Mwami Leza uyoofutuka!’”

22“Nywebo no Baisilayelima, amuswiililisye majwi aaya! Uulya Jesu Munazaleta, wakali mwaalumi ooyo Leza ngwaakatondezya kuti ngonguwe ngwaakasala. Eeci wakacitondezya kwiindila mumilimo mipati, amaleele, zigambya, azitondezyo eezyo Leza nzyaakacita kwiindila mulinguwe. Nywebo lwanu nobeni mulaazi makani aaya, nkaambo akali kucitikila akati kanu. 23Nkabela Leza, mumakanze amuluzibo lwakwe, wakalikoswede kale zyamakani aa Jesu kuti uyooabwa kulindinywe. Aboobo mwakamujaya, nkaambo mwakamupa kuli basizibi kuti bamukankamine aciingano. 24Pele Leza wakamwaangununa kuzwa kumacise aalufu, wakamubusya, nkaambo tiicakali kukonzeka kuti akkalilile kali mwaange mubusena bwabafu. 25Nkaambo mboobu Devedi mbwaakaamba zyanguwe wakati,

‘Ndakamubona Mwami Leza kali kumbele lyangu lyoonse,

uli aafwiifwi andime, kuti intakapenzegwi.

26Akaambo kaako moyo wangu wabotelwa,

majwi aangu ngalutangalo.

Alimwi mebo, ndemuntu buyo,

ndinookkede alusyomo.

27Nkaambo tokooyoondisiya mucikkalilo cabafu.

Tokooyoondilekelela neesalala wakwe kuti mbole.

28Wakandizibya nzila zitola kubuumi,

alimwi walo uyoondizuzya alutangalo ooko nkwabede.’

29“Nobakwesu, ndiyanda kumukananina kabotu-kabotu zyasikale wesu Devedi. Walo wakafwa akuzikkwa, alimwi cuumbwe cakwe nkocicili asunu. 30Pele mbwaakali musinsimi, wakaziba kuti Leza wakamusyomezya akukonkezya kuti kulunyungu lwakwe kuyoozwa umwi uyooba mwami mbuli nguwe. 31Naakabona ciyooba, wakaamba zyakubuka kwa Munanike wa Leza kuzwa kubafu. Wakati,

‘Taakamusiya mucikkalilo cabafu,

mubili wakwe tiiwakabola pe!’

32Lino Jesu Leza wakamubusya kuzwa kubafu, swebo toonse tuli bakamboni bazeezi. 33Wakalemekwa kulubazu lwalulyo lwa Leza, akutambula Muuya Uusalala kuzwa kuli Leza Wisi, mbubonya mbuli mbwaakamusyomezezye. Eelyo eezi nzyomubwene akumvwa nzipego Jesu nzyaatilila alindiswe. 34Devedi mwini taakwe naakainkide kujulu, nikuba boobo wakati,

‘Mwami Leza wakati ku Mwami wangu,

kkala kululyo lwangu.

35Mane nkacite basinkondonyoko kuti babe cilyatilo camaulu aako.’

36“Aboobo nywebo no Baisilayeli muzibisye ncobeni kuti nguwenya Jesu uulya ngomwakakankamina aciingano, ngonguwe Leza ngwaakabikkide kuti abe ngo Mwami a Munanike!”

37Bamvwe boobu bantu kakabanjila. Bakati kuli Pita akuli bamwi batumwanyina, “Ino tucite buti, nobakwesu?”

38Pita wakabaambila kuti, “Amweempe, mubbapatizigwe umwi aumwi wanu muzina lya Jesu Kilisito, kuti zinyonyoono zyanu zilekelelwe, eelyo Leza ulamupa Muuya Uusalala. 39Nkaambo Leza nzyaakasyomezya, wakasyomezya ndinywe abana banu, aboonse bali kulaale, abaabo Mwami Leza mbaita.”

40Pita wakakanana majwi aambi manji, wakabacenjezya wati, “Amulivune kucisubulo ceelede bantu babi basunu.”

41Bunji bwabo bakazumina makani aakakambauka Pita, nkabela bakabbapatizigwa. Buzuba mbubonya oobo bantu bakayungizigwa kunkamu yabasyomi bakatisike kuzyuulu zyotatwe. 42Ziindi zyoonse aaba bakali kuswaangana kuti bamvwe zyakali kwiisya batumwa. Bakali kukkala mubunyina, bakali kulya akukomba antoomwe.

Mbubwakabede bukkale bwabasyomi

43Bantu boonse bakabona maleele azigambya zinji zyakacita batumwa, bakakankamana. 44Boonse basyomi bakakkalilila antoomwe mubunyina, akwaabana lubono akati kabo. 45Bakali kuuzya lubono lwabo, akwaabanya mali mbubuli mukubula kwaumwi aumwi. 46Buzuba abuzuba bakali kubungana muŋanda ya Leza amoyo omwe, alimwi bakali kutambula Mulalilo mumaanda aabo, akulya zilyo zyabo amyoyo mitete iikondedwe. 47Bakali kulumbaizya Leza akubotezya bantu boonse. Buzuba abuzuba Mwami wakali kuyungizya bamwi bakafutulwa.

Currently Selected:

Milimo 2: Tonga96

Highlight

Copy