Milimo 1

1Nomuyandwa ba Teyofilusi,

Mubbuku lyangu lyakusaanguna ndakalemba makani aa Jesu azintu zyoonse nzyaakacita akwiisya, kuzwa kumatalikilo, 2mane kusikila ciindi naakatolwa kujulu. Pele katanatolwa kujulu, munguzu zya Muuya Uusalala wakalailila batumwa mbaakasala nzibakeelede kucita. 3Naakafwa akubuka wakalitondezya kulimbabo munzila zyaandeene-andeene. Wakalibonya akukanana ambabo zyabwami bwa Leza kwamazuba aali makumi one. 4Alimwi nibakabungene antoomwe, wakabapa mulawo ooyu wakuti, “Mutazwi mu Jelusalemu, pele mulindile cipego eeco Taata ncaakasyomezya, ncindakamwaambila kale. 5Nkaambo Joni wakabbapatizya amaanzi, pele nywebo muyoobbapatizigwa a Muuya Uusalala kwainda mazuba mace buyo.”

Jesu mbwaakatolwa kujulu

6Lino batumwa nibakabungene antoomwe a Jesu, bakamubuzya kuti, “O Mwami, sena ciindi ulabweedezya bwami kuli Isilayeli?”

7Jesu wakati kulimbabo, “Takuli kwanu kuziba ziindi niziyoocitika, nkaambo zili munguzu zya Taata. 8Pele muyootambula nguzu Muuya Uusalala aakuboola alindinywe, muyooba bakamboni bangu mu Jelusalemu amu Judiya moonse, alimwi amu Samaliya, mane do kumagolelo aanyika.” 9Naakamana kwaamba boobu, wakatolwa kujulu kabalangilide abalo, mpoonya kkumbi lyakamuvumba, taakacili kulibonya pe.

10Nkabela kabacilangilide kujulu, mpoonya-mpoonya kwakaima kumbali lyabo baalumi bobilo bakasamide zisani zituba. 11Baalumi aabo bakati kulimbabo, “Nywebo nobamu Galilii mwiimina nzi aawa akulungumana kujulu? Ooyu Jesu watolwa kujulu kuzwa kulindinywe uyooboola alimwi munzila njiyonya eeyi njimwamubona kaya kujulu.”

Wakatola busena bwa Judasi

12Lino batumwa bakabweeda ku Jelusalemu kuzwa kucilundu camisamu ya Oliva. Kasinzo kakuzwa ku Jelusalemu kuya kooko kakali kafwiifwi kapati. 13Banjile buyo mu Jelusalemu, bakaya kuŋanda ooko nkobakali kukkala, batumwa aaba bakali ba Pita, Joni, Jemusi, Andulu, Filipo, Tomasi, Baatolomeyo, Mateyo, Jemusi mwana wa Alufayusi, Saimoni munkutwe, a Judasi mwanaa Jemusi umwi. 14Aaba boonse bakalizuunyene mukukomba amoyo omwe, antoomwe a Maliya banyina Jesu, bana bokwabo Jesu, abakaintu bamwi.

15Nikwakainda mazuba, kwakaba muswaangano wabasyomi boonse antoomwe bakatisike kumwaanda amakumi obilo. Nkabela Pita wakaima 16wati, “Bakwesu, zyakaleelede kucitika eezyo zyakaamba Malembe kwaamba Judasi. Muuya Uusalala wakaamba kwiindila muli Devedi zyayooyo wakasololela aabo bakajata Jesu. 17Judasi wakali umwi wesu, awalo wakalisalidwe kuti abeleke antoomwe andiswe.” 18(Lino noba Teyofilusi Judasi wakaula muunda amali aayo ngaakajana kuzwa kucibi ncaakacita. Ooko nkwaakawida aansi akufwa waanduka, mane zyoonse zyamwida lyakwe zyakafwasukila aansi. 19Bantu boonse, bakkala mu Jelusalemu bakaamvwa makani aaya, aboobo mumulaka wabo muunda ooyo bakawiita kuti Akelidama, nkokwaamba kuti, “Muunda wabulowa.”)

20“Lino cililembedwe mubbuku lya Ntembauzyo kuti,

‘ŋanda yakwe ibe buyo tongo.

Kutabi muntu uukkala mulinjiyo pe!’

Alimwi kulilembedwe kuti,

‘Muntu uumbi akatole busena bwamulimo wakwe!’

21“Nkaako atusale umwi wakali andiswe ciindi Mwami Jesu naakali aandiswe. 22Kutalikila ciindi Joni naakakambauka makani aalubbapatizyo mane kusikila buzuba Jesu naakatolwa kuzwa kulindiswe akuya kujulu. Ooyo ape bumboni antoomwe andiswe bwakuti Jesu wakabuka kubafu.”

23Aboobo bakabanda baalumi bobilo, ba Josefa wali kutegwa Baasabbasi (naa Jusitasi) a Matiyasi. 24Eelyo bakakomba bati, “Mwami, oozi myoyo yabantu boonse, tutondezye naa nguuli wababili aaba ngoosala 25kuti atole mulimo wabutumwa ooyu, mubusena Judasi mbwaakasiya naakaya kubusena bumweelede.” 26Nibakamana kukomba, bakawaala cisolo, eelyo wakasalwa ngu Matiyasi. Lino walo wakayungizigwa kubatumwa bali kkumi aumwi.

Currently Selected:

Milimo 1: Tonga96

Highlight

Copy