2 Timoti 3

Zyamazuba aamamanino

1Koziba kuti mumazuba aamamanino kuyooba ziyoosya. 2Nkaambo bantu bayooba basikuliyanda, basikuyanda mali, basikulisumpula, basikatwango-twango, basimatusi, bataswiilili bazyali, batalumbi, abatasalali. 3Bayooba basilunya, batalekeleli, basikubejelezya, batalijati, basibukali, batayandi zibotu. 4Bayooba basilucengo, batatilimuki kuziyoosya, basikulikankaizya, bayanda kulibotezya mucilawo cakubotezya Leza. 5Balabamba ziyanza zyabukombi, pele nguzu zyambubo balazikaka. Bantu bali boobo kobatantamuka. 6Bamwi babo banjila mumaanda kuya boongelezya bamacembele bapenzegwa azibi zyabo beendelezegwa azisusi zisiyene-siyene. 7Nikuba kuti balaiisigwa lyoonse tabakonzyi kuziba zyabwini. 8Mbubonya mbuli Jenesi a Jambulesi mbubakakazya Mozesi, mbubonya oobo abalo bantu aaba mbobakazya zyabwini. Mbantu bali amiyeeyo mibi alimwi lusyomo lwabo ndwakuupaupa aameso. 9Pele kunyina nkobaya, nkaambo bantu boonse bayoobona bufuba-fuba bwabo, mbubonya mbubwakabonwa ba Jenesi a Jambulesi.

Malailile aamamanino

10Lino yebo ulizi kabotu njiisyo zyangu, bweende bwangu, makanze aangu, lusyomo lwangu, kukkazika moyo kwangu, luyando lwangu, lukakatilo lwangu, 11mapenzi aangu, makatazyo aangu, azintu eezyo zyakandicitikila ku Antiyoki, Ikoniyumu, aku Lisitula. Ndakapenga kapati, pele Mwami wakandivuna muli zyoonse eezi! 12Ncobeni, boonse bayanda kupona mubuumi bwakuswiilila Leza muli Kilisito Jesu bayoopenzegwa. 13Pele bantu babi banooyoobija akubijila limwi. Bayooena bamwi alimwi akweenwa lwabo beni. 14Pele yebo kojatisya makani aayo ngookaiya, alimwi ngozi kuti ngabwini. Nkaambo ulizi aabo bakakwiisya, 15alimwi kuzwa ciindi nookacili mwana wakaziba Malembe aasalala aakonzya kukupa busongo bwakufutulwa kwiindila mukusyoma Kilisito Jesu. 16Malembe oonse akapegwa a Leza alimwi alagwasya mukwiisya zyabwini, mukukasya zitaluleme, mukululamika zitaluleme eezyo, amukulailila bantu zyabuumi bulondokede. 17Malembe alagwasya mubelesi wa Leza kuti aelele akukonzya kucita kufumbwa ziluleme.

Currently Selected:

2 Timoti 3: Tonga96

Highlight

Copy