2 Timoti 2

Silumamba mubotu wa Kilisito Jesu

1Lino yebo, mwanaangu, zyandamana muluse ndotujisi muli Kilisito Jesu. 2Majwi oonse ngookamvwa kulindime akati kabakamboni banji-banji, waambile bantu basyomeka balo bayookonzya kwiisya bamwi. 3Kolibambila kupenga mbuli silumamba mubotu wa Kilisito Jesu. 4Taakwe silumamba uuli munkondo uubikka muzeezo kuzintu zyakumunzi, nkaambo uyanda kukkomanisya yooyo wakamunjizya mulumamba. 5Uuzuzaana mukuzundana kwalubilo tasamikwi musini, ccita watobela milawo yakusiyana. 6Mulimi uubeleka canguzu nguuelede kutambula zitaanzi zyabulimi. 7Koayeeya makani aaya ngindakwaambila nkaambo Mwami uyookupa maanu aakuziba makani oonse.

8Koyeeya kuti, Jesu Kilisito wakabusigwa kuzwa kubafu walunyungu lwa Devedi, kweendelana ambwekambauka mu Makani Mabotu. 9Nkaambo ka Makani aaya ndapenzegwa akwaangwa nsimbi mbuli similandu. Pele Majwi aa Leza taakonzyi kwaangwa pe. 10Aboobo ndayumina zyoonse eezi nkaambo kabantu Leza mbaakasala kuti abalo bafutulwe a Kilisito Jesu akutambula bulemu butamani. 11Majwi aaya ngamasimpe,

“Naa twafwa anguwe,

tuyoopona anguwe.

12Naa twayuma, tuyoolela anguwe.

Naa twamukaka, uyootukaka awalo.

13Naa tatusyomeki, walo ulasyomeka,

nkaambo takonzyi kulikaka pe.”

Simulimo mubotu

14Lino koyeezya bantu makani aaya, akubacenjezya kapati kuti Leza tayandi kuti kabazwanganina majwi buyo. Tacigwasyi pe, pele cinyonganya buyo baabo baswiilila. 15Kosungwaala kuti ube uuzuminika kuli Leza mbuli simulimo uutakwe kampenda, uupandulula majwi aabwini aa Leza mbuli mbokweelede. 16Pele majwi aabuyo aatagwasyi koaleya, nkaambo bantu bamvwa zeezyo banooya bwiindilila kusampaula Leza. 17Majwi aabo ali mbuli donda liyandilila mubili woonse. Akati kabo kuli Haimeneyusi a Filetasi, 18aabo mbantu bakasweeka akusiya zyabwini alimwi balajaya lusyomo lwabamwi nobati, “Bantu bakabuka kale.” 19Pele ntalisyo njumu ya Leza ilikkalilide alimwi majwi aalembedwe alinjiyo ngaaya, “Mwami ulizi aabo bakwe,” alimwi alati, “Ooyo uuti ngwa Mwami alekele limwi kucita zitaluleme.”

20Lino muŋanda mpati muli mitiba yaandeene-andeene, imwi njangolida, imwi njansiliva, imwi njazisamu, imwi yakabumbwa abulongo. Aboobo imwi ibelesegwa ciindi ncoyeelede, imwi kufumbwa ciindi buyo. 21Kuti naa muntu walisalazya akusiya zitaluleme kuli ceeco citakwe bulemu ulaba mbuli cibelesyo cili aabulemu. Uyoolipa buzwide kuli Simalelo wakwe kuti amubelesye, unoolibambilide kucita kufumbwa mulimo uululeme. 22Aboobo yebo kozitija zisusi zyabukubusi. Utobele bululami, lusyomo, luyando alimwi aluumuno antoomwe abantu boonse balemeka Mwami amoyo uusalala. 23Pele kozikaka nkani zyabufuba-fuba akukazyanya-kazyanya, nkaambo ulizi kuti eezi ziletela kulwana. 24Mubelesi wa Mwami teelede kuba sikazwanga-zwanga pe, pele uleelede kuba mutete moyo kubantu boonse. Uleelede kuba muntu uuzi kwiisya kabotu camoombelela, 25uubombede moyo nalailila bamukazya. Nkaambo ambweni Leza ulabeengelela kuti beempe akuziba zyabwini. 26Acita oobo balazwa mukakole ka Saatani, bamana kujatwa anguwe kuti bacite nzyayanda.

Currently Selected:

2 Timoti 2: Tonga96

Highlight

Copy