2 Bakolinti 6
6
1Lino mbuli mbotuli basimilimonyina a Leza, tulamukumbila kuti zileleko zyaluse lwa Leza mutazitambuli cabuyo pe. 2Nkaambo walo wakati,
“Muciindi ceelede ndakamuswiilila,
ndakamugwasya mubuzuba bwakufutula.”
Amuswiilile cino nceciindi ceelede, sunu mbobuzuba bwalufutuko.
3Swebo tatuyandi kuti bantu basampaule ncotucita, akujana kampenda mumulimo wesu. 4Pele muli zyoonse tulalitondezya kuti tuli babelesi ba Leza, mulukakatilo lupati, mumapenzi, mumakatazyo, mubuyumu-yumu, 5mukuumwa, mukwaangwa, mumapyopyongano, mumapakasyo, mukutoona kabotu, amunzala. 6Alimwi tulalitondezya kuti tuli babelesi ba Leza mubusalali, muluzibo, mulukakatilo, muluzyalo, mu Muuya Uusalala, muluyando lwini-lwini, 7mumajwi aabwini, amunguzu zya Leza. Tulabelesya zibelesyo zyabululami mumaanza oonse obilo lyalulyo niliba lyalumwensi. 8Bantu balatulemeka akutusampaula. Batwaamba bubi abubotu. Batucita mbuli babeji, pele tatubeji pe. 9Batucita mbuli batazizilwe nikuba kuti tulizizilwe kapati. Batubona mbuli bantu bayanda kufwa, nikuba boobo tulapona. Batubona mbuli bantu beelede kusubulwa, nikuba boobo tatujaigwi. 10Batubona mbuli bantu bauside, nikuba boobo tulakondwa lyoonse. Batubona mbuli bantu bacete, nikuba boobo twavubya banji. Batubona mbuli bantu batajisi, nikuba boobo tulijisi zintu zyoonse.
11Nywebo no Bakolinti, tulaamba andinywe cakulikwaya, moyo wesu ulijulidwe. 12Takuli kuti swebo twakamusinkila, pele nywebo mwakasinkilwa amyoyo yanu iini. 13Lino ndamwaambila mbuli bana, atucitilane mbubonya, anywebo amutujulile myoyo yanu.
Basyomi mbubateelede kuvwelaana abatasyomi
14Mutavwelaani abakunze. Ino bululami inga bwaswaangana buti abubi? Naa mumuni ulavwelaana buti amudima? 15Sena Kilisito a Saatani balakonzya kuzuminana? Naa musyomi ujisi lubazu nzi ayooyo uutasyomi? 16Ncizuminano nzi ŋanda ya Leza nciijisi abaleza bapange? Nkaambo swebo tuli ŋanda ya Leza muumi, mbuli Leza mbwaamba kuti,
“Ndizooba mubantu bangu akukkala akati kabo,
nzooba Leza wabo, abalo bazooba bantu bangu.
17Aboobo amuzwe muli bakunze, amube nyolikke,”
mbwaamba Mwami Leza.
“Mutagumi cintu citondwa, nenzoomutambula.
18Nkabela nzooba Uso,
eelyo anywebo muzooba bana bangu balombe abasimbi,
mbwaamba Mwami Leza Singuzuzyoonse.”
Currently Selected:
2 Bakolinti 6: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
