1 Timoti 4

Bamayi babeji

1Ncobeni Muuya Uusalala ulaamba kuti ciindi ciza bamwi bayoosiya lusyomo. Bayoogama kuswiilila njiisyo zyabubeji zizwa kumyuuya mibi. 2Njiisyo eezi nzyabasikuupaupa aameso babeji, bali aamyoyo yakatilibala mbuli kuti yakadintwa aansimbi iipya. 3Balo mbabalesya bantu kukwatana akulesya kulya zilyo zimwi. Pele zyakulya eezyo Leza wakazilengela kuti aabo basyoma akuziba zyabwini balye cakulumba Leza. 4Kayi zyoonse Leza nzyaakalenga nzibotu, tazyeelede kulesegwa naa zyatambulwa cakulumba Leza. 5Nkaambo a Majwi aa Leza alimwi akukomba cakulumba zyaba zisalala.

Simulimo mubotu wa Kilisito Jesu

6Naa waiisya basyominyoko zintu eezi, ulaba simulimo mubotu wa Kilisito Jesu, uusaninwa amajwi aalusyomo luli nenjiisyo yabwini njotutobela. 7Kokaka twaano twabuyo tuli mbuli twaanwa amacembele. Koliisya kuba abuumi bwakupa Leza bulemu. 8Kuiisya mubili kulagwasya buniini, pele buumi bwakulemeka Leza bulagwasya munzila zyoonse, nkaambo bulasyomezya zileleko mazuba aano alimwi akuciindi ciciboola. 9Majwi aaya aleelede kwaatambula akwaasyoma. 10Ncenciceeco ncotubeleka canguzu akulwanina, nkaambo lusyomo lwesu luli aali Leza muumi, uuli ngo Mufutuli wabantu boonse, kwaambisya ngwabaabo basyoma.

11Kolailila akwaiisya makani aaya. 12Kutabi muntu uukuubausya akaambo kakuti uli mukubusi. Pele ube citondezyo kubasyomi boonse mukwaamba, mubweende, muluyando, mulusyomo, amukusalala moyo. 13Kusikila nkaboole, sungwaala mukubala Malembe akukambauka, akwiisya. 14Utaubasyi cipego ncookatambula mukwaamba kwa Majwi aa Leza ciindi bapati bambungano nibakakubikka maanza. 15Sungwaala muli zeezyo akuzicita cakulipa, kuti boonse babone kuti buumi bwako bwa Bukilisito buya bukomena. 16Ulibambe kabotu lwako anjiisyo nzyoiisya. Koujisi utaleki pe, nkaambo wacita oobo, inga ulalifutula omwini, abaabo bakuswiilila.

Currently Selected:

1 Timoti 4: Tonga96

Highlight

Copy