1 Timoti 3
3
Zyabeendelezi bambungano
1Lino majwi aaya ngamasimpe aati, kuti naa muntu uyanda mulimo wabweendelezi bwambungano ulayanda mulimo mubotu. 2Mweendelezi uleelede kubula kampenda, uukwete mukaintu omwe buyo, uulibatamika, uulijata, wabulemu, sicimwa beenzu, uukonzya kwiisya kabotu. 3Teelede kuba mukolwi naa sinkondo, pele kali mubombe moyo, siluumuno, uutayandisisyi mali. 4Uleelede kuba muntu uuzikulela kabotu mukwasyi wakwe, wiisya bana bakwe mbokulibambwa akulemeka munzila zyoonse. 5Nkaambo kuti muntu katazi kulela kabotu bamukwasyi wakwe, ino inga ulakonzya buti kweendelezya mbungano ya Leza? 6Teelede kuti wakasanduka onoono. Nkaambo ambweni inga ulalisumpula akusubulwa mbuli Saatani. 7Alimwi bantu bakunze baleelede kumuziba ampuwo mbotu kuti bantu batamusampauli awalo atacegwi a Saatani.
Zyabakutausi bambungano
8Abalo bakutausi mumbungano baleelede kuba mbubonya, babulemu, batabi bamilaka yobilo, bataindilizyi kunywa zikola nikuba kuyanda kujana lubono cabucenjezu. 9Pele baleelede kujatisya makani aasisidwe aali ngotusyoma amoyo uusalala. 10Baleelede kulangililwa kusaanguna, kwamana waawo, naa kunyina cidonaisya, nobatigwasilizye. 11Abalo bakaintu babo baleelede kuba babulemu, batatamikizyi bamwi, balibatamika basyomeka muzintu zyoonse. 12Bakutausi baleelede kukwata mukaintu omwe-omwe, balela kabotu bana babo akubamba kabotu mikwasyi yabo. 13Aabo bagwasya kabotu mumbungano balijanina ciimo cibotu, alimwi balasima mukwaamba zyalusyomo ndotujisi muli Kilisito Jesu.
Zyamaseseke mapati
14Ndiyeeya kuzookuswaya cakufwambaana. Pele ndakulembela malailile aaya kutegwa 15kuti naa ndilamuka kuboola, majwi aaya ngoonya akuzibye bantu mbobeelede kukkala mumukwasyi wa Leza uuli nembungano ya Leza muumi. Mbungano ncecicinda cazyabwini zya Leza. 16Masimpe maseseke aabukombi bwesu mapati kapati. Alimwi ngakuti,
Walo wakabonwa mumubili wabuntu,
wakaambwa kuti mululami a Muuya Uusalala,
wakabonwa abangelo.
Wakakambaukwa akati kamisyobo yoonse,
wakasyomwa abantu baansi aano,
wakatolwa kujulu mubulemu.
Currently Selected:
1 Timoti 3: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
