1 Timoti 2

Zyakukomba kwambungano

1Lino kusaanguna ndiyandisya kuti mukombele bantu boonse. Kukomba kwanu kube kwakulombela, kukumbilila, akulumbaizya Leza. 2Mukombele bami abaabo bali mubulelo kuti tukkale aabuumi bwaluumuno, bwabulemu, akulemeka Leza lyoonse. 3Eezi nzibotu alimwi zilakkomanisya kuli Leza Mufutuli wesu, 4walo uuyanda kuti bantu boonse bakafutulwe akuziba zyabwini. 5Nkaambo kuli Leza omwe, alimwi kuli simwiimaakati ka Leza abantu omwe, muntu ooyo ngu Kilisito Jesu. 6Wakalisanga mwini kuti anunune bantu boonse. Eeci cakali bumboni bwakuti ciindi ca Leza ceelede casika. 7Ncenciceeco wakandibikka kuba mukambausi amutumwa. Ncobeni ngamba zyabwini, nsibeji pe. Njiisya bamasi zyalusyomo azyabwini. 8Ndiyanda kuti baalumi kabakomba koonse-koonse amaanza aanyamwidwe amoyo uusalala kakutakwe kunyema nikuba kuzwangana. 9Alimwi njanda kuti bakaintu kabasama bweelede, cabulemu akulibombya, kutaamba kuliluka masusu mukulibotya nikuba kugama kusama zisani zidula nituba tuwenge twangolida naa twangale. 10Pele baleelede kulibotya amilimo mibotu mbubonya mbubeelede bakaintu Bakilisito. 11Bakaintu nobaiisigwa baleelede kulibatamika akuswiilisisya. 12Nsizumizyi mukaintu kwiisya nikuba kubalanga amutwe baalumi pe, pele kanga kaumwide buyo. 13Kayi Adamu nguwakasaanguna kulengwa, munsi ngu Eva. 14Alimwi tali Adamu wakacengwa, pele mukaintu nguwakacengwa alimwi nguwakasotoka malailile aa Leza. 15Nikuba boobo mukaintu uyoofutulwa mukutobela bukkale bweelede kuzyala bana, kuti naa wajatisya mulusyomo cakulibombya muluyando amukusalala moyo.

Currently Selected:

1 Timoti 2: Tonga96

Highlight

Copy