1 Pita 1
1
1Ndime Pita mutumwa wa Jesu Kilisito, ndamujuzya nobasale ba Leza beenzu bamwaikide ku Pontusi, ku Galatiya, ku Kapadosiya, ku Asiya, aku Bitiniya. 2Leza Taata wakamuzibila limwi alimwi wakamusala kuti musalazigwe a Muuya Uusalala akuti muswiilile Jesu Kilisito akusanzigwa abulowa bwakwe. Leza amubede aaluse akumupa luumuno kwiindilila.
Zyalulangilo lwini-lwini
3Aalumbwe Leza, Wisi wa Mwami Jesu Kilisito! Leza muluse lwakwe lunji wakatupa buumi bupya kuti tube aalulangilo lwini-lwini mububuke bwa Jesu Kilisito kuzwa kubafu. 4Nkaako tuyookona zileleko zitanyonyooki, zitasofwaali, zitabundaali eezyo Leza nzyamubambilide kujulu. 5Anguzu zyakwe Leza unoomukwabilide nomusyoma kuti mukatambule lufutuko luyooyubununwa kumamanino aaciindi.
6Eezi zimukkomanisye nikuba kuti mukaindi kano mulausa akaambo kamasunko aaindene-indene. 7Ngolida ayalo nikuba kuti ilamana ilasalazigwa amulilo. Mbubonya oobo lusyomo lwanu lwiinda ngolida kule-kule lulasalazigwa kubonya kuti ndwini-lwini. Ndendilyo nomuyootembaulwa akulemekwa cabulemu eelyo Jesu Kilisito aakuboneka. 8Jesu tamunamubwene, nikuba boobo mulamuyanda. Nikuba kuti tamumuboni, mulamusyoma alimwi mulakkomana kapati citaambiki. 9Aboobo kuzwa mulusyomo lwanu mulajana lufutuko lwamyuuya yanu.
10Basinsimi bakasinsima zyaluse oolu luyootambulwa, bakayandaula akuvuntauzya zyalufutuko oolu. 11Muuya uuzwa kuli Kilisito wakali mulimbabo wakali kwaambila limwi zyamapenzi aayoomvwa Kilisito azyabulemu mbwayoobaabo aakumana. Basinsimi bakali kuyandisisya kuziba kuti ani eezi ziyoocitika lili alimwi ziyoocitika buti? 12Leza wakayubununa kuti tiibaali kulibelekela lwabo beni, pele akaambo kanu bakali kwaamba eezi nzyomumvwa lino. Bakambausi ba Makani Mabotu bakamwaambila eezi kwiindila mu Muuya Uusalala wakatumwa kuzwa kujulu. Abalo bangelo balayanda kuzibisisya zyazintu eezi.
Zyakupona mubusalali
13Aboobo amulibambilile mumiyeeyo yanu, amulijate. Amubikke moyo woonse aluse ndomuyootambula ciindi Jesu Kilisito aakulibonya. 14Amube mbuli bana baswiilila. Mutanooccilili zisusi nzyomwakali kutobela kaindi mukutaziba kwanu. 15Pele mbubuli mbwasalala ooyo wakamwiita, anywebo mbubonya mube boobo. 16Kayi Malembe alati, “Muleelede kusalala, nkaambo mebo ndasalala.”
17Lino Leza tasalululi. Ulabeteka kufumbwa muntu kweendelana anzyaakacita muntu ooyo. Kuti kamumuti Taata amumulemeke ciindi coonse ncomuli beenzu ansi aano. 18Mulizi kuti mwakanununwa kuzwa kuziyanza zyabuntunsi nzimwakaiya kumauso. Taakamununuzya mali aansiliva naa aangolida aamana pe, 19pele mwakanununwa acipaizyo cabulowa buyandisi bwa Kilisito, walo wakajaigwa mbuli mwanaa mbelele uutakwe kampenda naa kapa. 20Leza wakamusalila limwi kuti azikumane mulimo ooyu katanalenga nyika. Pele ciindi cino camamanino wamubonya kulindinywe. 21Mulinguwe musyoma Leza walo wakamubusya kuzwa kubafu akumupa bulemu. Ncenciceeco ncomusyoma akulangila muli Leza.
22Lino mbuli mbumwasalazya myoyo yanu mukuswiilila zyabwini, ambuli mbomuyandana abasyominyoko, amuyandane nobeni cakumaninina. 23Mwazyalululwa, kutali kuzwa kumbuto iinyonyooka, pele kuzwa kumbuto iitanyonyooki yalo iili Majwi aa Leza aabuumi aakkalilide. 24Mbubwaamba Malembe kuti,
“Bantu boonse bali mbuli bwizu,
bulemu bwabo buli mbuli maluba.
Bwizu bulayuma, aalo maluba alakunkumuka,
25pele Majwi aa Leza alikkalilide lyoonse.”
Majwi aaya Makani Mabotu ngomwakakambaukilwa.
Currently Selected:
1 Pita 1: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
