1 Joni 3

Zyabana ba Leza

1Amubone kukomena kwaluyando Taata ndwaakatuyandya kuti twiitwe kuti bana ba Leza. Nkabela ncobeni mbotubede oobo. Bantunsi tabatuzi swebo nkaambo awalo tiibakamuziba pe. 2Nobeenzuma, lino tuli bana ba Leza, Pele Leza tanatubonya mbotuyooba. Pele tulizi kuti aakulibonya tuyooba mbuli nguwe. Kayi tuyoomubona mbubonya mbwabede. 3Ooyo uusyoma Kilisito walisalazya mwini mbuli Kilisito mbwasalala.

4Kufumbwa uucita cibi, watyola mulawo, nkaambo cibi nkutyola mulawo. 5Mulizi kuti Kilisito wakaboola kuti azoogwisye zinyonyoono, alimwi mulinguwe tamukwe cibi pe. 6Aboobo ooyo uukkalilila muli Kilisito takkalilili muzinyonyoono. Kufumbwa uukkalilila muzinyonyoono tanamubwene nikuba kumuziba pe.

7Nobana bangu, kutabi uumucenga. Ooyo uucita ziluleme uliluleme, mbubonya mbwaluleme Kilisito. 8Ooyo uucita zinyonyoono nguwa Saatani, nkaambo Saatani ngusikubisya kuzwida kumatalikilo. Mwanaa Leza wakaboola kuti anyonyoone zicita Saatani.

9Kufumbwa mwanaa Leza tabisizyi-bisizyi nkaambo ulijisi bukkale bwa Leza, alimwi nkaambo Leza ngo Wisi, takonzyi kuba simucitazibi. 10Kwiindana kwabana ba Leza abana ba Saatani mboobu mbokubede, kufumbwa uutaciti ciluleme naa uutayandi munyina tali mwanaa Leza.

Kamuyandana

11Nkaambo aaya ngamakani ngomwakamvwa kuzwa kumatalikilo aakuti tuleelede kuyandana. 12Tatweelede kuba mbuli Kaini wakaba wa Mubi alimwi wakajaya munyina Abela. Ino wakamujaila nzi? Nkaambo Kaini wakali kucita zintu zitaluleme, kakuli Abela wakali kucita zintu ziluleme.

13Lino mutagambwi, nobakwesu, kuti bantunsi bali musulaikide. 14Tulizi kuti twakazwa mulufu, twanjila mubuumi nkaambo tulayandana. Ooyo uutayandi munyina ucili mulufu. 15Kufumbwa muntu uusulaika mweenzinyina mmujayi, alimwi mulizi kuti mujayi tajisi buumi butamani mulinguwe. 16Nceeci ncituzibya luyando mbolubede, Kilisito wakaaba buumi bwakwe akaambo kesu. Aswebo mbubonya tweelede kwaaba buumi bwesu akaambo kabakwesu! 17Kuti muvubi wabona mweenzinyina mucete, pele tamugwasyi, ino inga luyando lwa Leza lwaba buti mulinguwe? 18Nobana bangu, luyando lwesu lutabi buyo lwaamulomo, pele tweelede kubonesya luyando lwini-lwini notucita milimo.

Busicamba

19Mboobu mbotunga twaziba kuti tutobela zyabwini akuti tuyooba amyoyo iikkede kumbele lya Leza. 20Tulaziba oobo ciindi coonse manjezeezya eesu naatukatazya, nkaambo Leza mmupati kwiinda manjezeezya eesu, alimwi ulizi zintu zyoonse. 21Nobakwesu, kuti naa manjezeezya kaatatupenzyi, tatukonzyi kuyoowa kumbele lya Leza. 22Alimwi kufumbwa ncotumukumbila ulatupa, nkaambo tutobela milawo yakwe alimwi tulacita cimubotelezya. 23Ngooyu mulawo wakwe, ngwakuti, tusyome Mwanaakwe Jesu Kilisito alimwi tuyandane mbubonya mbuli mbwaakatulailila Kilisito. 24Kufumbwa uubamba milawo yakwe ulikkalilide muli Kilisito, awalo mulinguwe. Mboobu mbotuzi kuti Kilisito ulikkalilide muli ndiswe, tulizi nkaambo Muuya Uusalala ngwaakatupa ulatulungwilida.

Currently Selected:

1 Joni 3: Tonga96

Highlight

Copy