1 Joni 2

Kilisito Mugwasyi wesu

1Nobana bangu, ndamulembela aaya makani kutegwa kamutabisyi. Kuti naa umwi wabisya, tulijisi Mugwasyi uutwaambilila kuli Taata, ooyu ngu Jesu Kilisito uululeme. 2Ngonguwe cipaizyo cimanya milandu yazibi zyesu, kuleka buyo zyesu zyalo, pele azibi zyabantu boonse baansi aano. 3Notubamba malailile aakwe, notukonzya kuzibwa kuti tulimuzi. 4Ooyo uuti ndimuzi, pele kataswiilili malailile aakwe mmubeji, tamukwe zyabwini mulinguwe pe. 5Pele ooyo uubamba majwi aakwe, nkokuti luyando lwa Leza lwazulila mulinguwe. 6Ooyo waamba kuti ulikkalilide mulinguwe uleelede kweenda munzila mbubonya mbuli mbwaakeenda walo.

Zyamulawo mupya

7Nobayandwa, takuli kuti mmulembela mulawo mupya pe, pele nguyooyo wakaindi walo ngomwakajisi kuzwida kumatalikilo. Mulawo ooyo mmajwi ngomwakamvwa kale. 8Pele nikuba boobo mmulawo mupya ooyu ngwendimulembela. Zyaamba mulawo ooyu zyakaboneka muli Jesu alimwi zilaboneka amuli ndinywe. Nkaambo mudima uyabumana, eelyo mumuni wini-wini watalika kubala.

9Ooyo waamba kuti uli mumumuni, kwamana kasulaika munyina ucili mumudima ambuli sunu. 10Ooyo uuyanda munyina nguuli mumumuni, nkaako mulinguwe kunyina cilebya. 11Pele ooyo uusulaika munyina uli mumudima, akweenda mulinguwo. Tazi ankwaya, nkaambo mudima wamoofwaazya.

12Ndamulembela nobana bangu, nkaambo zibi zyanu zilalekelelwa akaambo ka Kilisito. 13Ndamulembela nomatata nkaambo mulimuzi uuliko lyoonse kuzwida kumatalikilo. Ndamulembela nobakubusi, nkaambo mwakamuzunda mubi.

14Ndamulembela nobana, nkaambo mulimuzi Taata. Ndamulembela nomatata nkaambo mulimuzi ooyo uuliko lyoonse kuzwa kumatalikilo. Ndamulembela nobakubusi nkaambo muli basinguzu, alimwi Majwi aa Leza alikkkede muli ndinywe, alimwi mwakamuzunda mubi.

15Mutayandi nyika niziba zintu zili mulinjiyo. Kuti naa muntu kayanda nyika, tayandi Taata pe. 16Zyoonse zyaansi, zisusi zyamubili azintu zinyomenenwa ameso, azyoonse eezyo zipa kuti bantu kabalidunda ansi aano, taakwe aniciba comwe cizwa kuli Taata, pele zyoonse eezi nzyaansi. 17Nyika azili mumo ziyandisya bantunsi zyoonse ziyoomana, pele muntu uucita ziyanda Leza unoopona lyoonse.

Sinkondonyina a Kilisito

18Nobana bangu, cino nciindi camamanino! Mwakaambilwa kuti sinkondonyina a Kilisito uyooboola, pele lino banji basinkondonyina a Kilisito balibonya kale, aboobo tulizi kuti cino nceciindi camamanino. 19Bantu aabo bakali aandiswe kaindi, pele tiibakali bamwi besu pe. Nkaambo nibakali bamwi besu nibacilikkalilide andiswe. Pele bakazwa mukuti kubonwe kuti tiibakali bamwi besu.

20Pele nywebo mwakananikwa a Muuya Uusalala, aboobo mulizi kabotu zintu zyoonse. 21Ncemulembela takuli kuti tamuzi zyabwini pe, pele nkaambo muli buzi, alimwi mulizi kuti bubeji tabuzwi mumasimpe. 22Nguni mubeji, tee nguyooyo uutazumini kuti Jesu ngo Munanike wa Leza? Ooyo uukaka Taata a Mwana ngosinkondonyina a Kilisito. 23Kufumbwa uukaka Mwana wakakilizya a Taata. Uuzumina Mwana, wamuzumina a Taata.

24Pele nywebo nzimwakamvwa kuzwa kumatalikilo, zilikkalilide mulindinywe. Kuti nzimwakamvwa kuzwa kumatalikilo kazikkalilide mulindinywe ati mulakkalilila muli Taata a Mwana. 25Nceeci ncaakatusyomezya, wakatusyomezya mbuumi butamani.

26Ndamulembela makani aaya nkaambo kabaabo banga balamucenga. 27Pele nywebo Kilisito wakamunanika a Muuya Uusalala ukkala muli ndinywe. Aboobo takweelede kuti inga muntu wamwiisya nabani. Muuya Uusalala ngumwakananikwa ulamwiisya zyoonse. Nzyaamwiisya nzyabwini, tazili zyakubeja pe. Nkaako mbubonya mbuli mbwaakamwiisya, amukkalilile muli Kilisito. 28Mbombubo, nobana bangu, amukkalilile mulinguwe, kutegwa aakulibonya tukabe basicamba. Tutakabi aansoni buzuba mbwayooboola alimwi. 29Lino mukuti mulizi kuti Kilisito uliluleme, nkaako muzibe kuti kufumbwa uucita ziluleme mmwanaa Leza.

Currently Selected:

1 Joni 2: Tonga96

Highlight

Copy