1 Bakolinti 3

Zyababelesi ba Leza

1Lino mebo, nobakwesu, nsiindakakonzya kumwaambila mbuli kuti muli bantu bajisi Muuya, ndakamwaambila mbuli kuti muli bantunsi, mbuli bana muli Kilisito. 2Ndakamupa mukupa kutali cilyo ciyumu, nkaambo tiimwakanaelela. Aciindi cino tamunaelela, 3nkaambo mucili bantunsi. Akati kanu kuli munyono akukazyanya. Tee eeci ncecitondezya kuti mucili bantunsi, alimwi muccilila akucita zyabuntunsi? 4Umwi ulaamba kuti, “Ime ndiwa Paulu,” aumwi, “Ime ndiwa Apolosi,” sena tamuli mbuli bantunsi?

5Ani Apolosi nguni? Ani Paulu awalo nguni? Tee tuli babelesi buyo aabo bamuleta kulusyomo. Umwi aumwi wesu ulabeleka mulimo ngwaakapegwa a Mwami. 6Mebo ndakali mbuli uusyanga mbuto Apolosi watilila, pele uupa kuti zimene ngu Leza. 7Mwabona kuti uusyanga naba uutilila kunyina mbwabede, ccita buyo Leza uuzimenya. 8Ooyo uusyanga ayooyo uutilila, boonse beelene buyo, alimwi umwi aumwi uyootambula bulumbu bweelede mulimo wakwe. 9Nikuba boobo tuli basimilimonyina a Leza, nywebo muli muunda wa Leza.

Muli ŋanda ya Leza. 10Nkaambo Leza muluse lwakwe wakandituma kuti nkabambe ntalisyo mbuli muyaki musongo, pele uumbi nguuyaka alinjiyo. Eelyo lino umwi aumwi acenjele mbuli mbwayaka. 11Nkaambo taakwe ntalisyo iimbi muntu njakonzya kubamba kwiinda eeyi iibambidwe, nkokuti Jesu Kilisito. 12Antalisyo eeyi muntu ulakonzya kuyaka angolida, nsiliva, naa mabwe meebesi, nikuba amasamu, bwizu naaba matete. 13Mulimo wamuntu umwi aumwi uyoobonwa, nkaambo buzuba bwalubeta buyooutondezya. Buzuba oobo buyoosika amulilo, eelyo mulilo uyoosola milimo yamuntu umwi aumwi mbwiibede. 14Eezyo muntu nzyaakayaka antalisyo eeyi kuti zikakkalilile, muyaki ooyo uyootambula bulumbu. 15Pele kuti zikasyukute, takatambuli bulumbu pe, nikuba boobo uyoofutulwa, pele mbuli muntu wakwelwa kuzwa kumulilo.

Muntu niŋanda ya Leza

16Sena tamuzi kuti nywebo muli ŋanda ya Leza, akuti Muuya wa Leza uli mulindinywe? 17Kufumbwa ooyo uunyonyoona ŋanda ya Leza, awalo Leza ulamunyonyoona. Nkaambo ŋanda ya Leza ilasalala, nkabela nywebo ndendinywe ŋanda eeyo.

18Mutalyeeni pe. Kuti naa umwi akati kanu kaliyeeya kuti musongo kwaamba zyabuntunsi, ooyo uleelede kulicita mbuli mufuba-fuba, ndendilyo natibe aabusongo bwini-bwini. 19Kayi busongo bwabuntunsi mbufuba-fuba buyo kuli Leza. Mbuli mbokulembedwe kuti, “Leza ulajata basongo mubucenjezu bwabo.” 20Aamwi Malembe alati, “Mwami ulizi kuti miyeeyo yabasongo njabuyo.” 21Aboobo kutabi muntu uulikankaizizya buntunsi. Nkaambo zintu zyoonse nzizyanu, 22Paulu, Apolosi, Kefasi, nyika, buumi, lufu, eezyo ziliko aziciboola. Pele nikuba kuti zyoonse nzizyanu, 23nywebo muli bakwe Kilisito, awalo Kilisito nguwa Leza.

Currently Selected:

1 Bakolinti 3: Tonga96

Highlight

Copy