Luka 6:27-49
Luka 6:27-49 KNTP
“Bino amiwa nemwambila anweba mubena kumvwa namba, temwai balwanyi benu, bobilai byawama aba bemushikwa, peshai boba bemufinga, ne kwibalombelela aba bemumanyika. Kabiji ne yewa wakupuma ku jibuta jimo, muleke akupume ne kujikwabo; kabiji ne yewa wakwangata munkukumba wobe, umuleke asende ne mukangyo wobe pamo. Panai ku bonse bemulomba, ne kwiyewa wakwangata bintu byobe kechi wibisake jibiji ne. Bobilai bakwenu abya byo musaka anweba amba bantu bemubile. “Umvwe mwatemwatu bantu bonka bemutemwa, mukamwenamo ng'anyi kintu? Mambo ne bandengamambo batemwa bonka be batemwa! Kabiji umvwe mwibobila byawama aba bemubila byawama, mukamwenamo ng'anyi kintu? Mambo ne bandengamambo nabo boba byonkabyo. Kabiji umvwe mwakongweshatu ku boba bomwaketekela kutambulako, mukamwenamo ng'anyi mfweto? Mambo ne bandengamambo nabo bakongwesha ku bakwabo bandengamambo amba bakebwezhezhe byonse byo batambwile. Bino temwai balwanyi benu, ne kwibobila byawama, kabiji panai kwakubula kuketekela kutambulako nangwa kimo ne, ne mfweto yenu ikekala ikatampe, kabiji mukekala ke baana ba Mwine Wakila, mambo aye wibobila lusa babula kusanta ne babi. Ikalai ba lusa, byonka byo aji wa lusa aye Shenu. “Kechi muchibe mambo ne, ne anweba kechi bakemuchibilao ne; kuzhachisha ne, ne anweba kechi bakemuzhachisha ne, lekelai mambo, ne anweba bakemulekelao. Panai, ne anweba kikemupewa. Kipimo kyawama, kyo bashindaika, ne kusunkenya kasa kichika, kyo bakemupa mu kyaji kyenu. Mambo kyonkakyo kipimo kyo mupiminako kyo kyo mukapiminwako ne anweba.” Kabiji wibatayile ne kishimpi amba, “Mpofu wakonsha kutangijila mpofu mukwabo nyi? Kechi bonse babiji bakaponena mu kimbo nenyi? Mwana wabwanga kechi wakila shanji jabwanga ne, bino yense mwana wabwanga, inge wafunjishiwa bulongo, ukapasha shanji jabwanga. “Mambo ka kyo utajila ka kibalabala kaji mu jiso ja mukwenu, bino kechi ulanguluka mwamba uji mu jiso jobe obewa mwine ne? Wakonsha kumwambila byepi mulongo wobe amba, ‘Lekai ne mufumye ka kibalabala kaji mu jiso jenu,’ bino obewa mwine kasa uji na mwamba uji mu jiso jobe? Obewa kamfutumfutu, patanshi fumya mwamba uji mu jiso jobe, bino umone bulongo pa kufumya ka kibalabala kaji mu jiso ja mulongo wobe. “Kafwako kichi kyawama kipanga bipangwa byatama ne, nangwa kichi kyatama kipanga bipangwa byawama ne. Mambo kichi kyonse bekiyukila ku bipangwa byakyo. Kechi mwapa makuyu ku kichi kya miba ne, nangwa kwapa mang'anzang'anza ku kichi kya mwiiba ne. Muntu wawama mu butala bwa bya bunonshi bwa mu muchima wanji usolola byawama, ne muntu mubi naye mu bya bunonshi bwanji bubi usolola bibi, mambo kanwa kamba monka mu kuvula kwa biji mu muchima. “Mungichila ka amba, ‘Nkambo, Nkambo,’ bino kuuba byo nemubula ne? Yense wiya kwi amiwa ne kumvwa byambo byami ne kwibyuba, nsa kwimubula ye apasha. Wapashang'ana na muntu ushimika nzubo, wapoyile mwazhika ne kwala kitendekesho pa jibwe. Ne muyulo byo aishile, ne mikwe yapomokele ku yoya nzubo ne kukonsha kwiisunkenya ne, mambo yashimikilwe bulongo. Pakuba awa umvwatu ne kwibyuba ne, bakamupashang'anya nobe muntu watungile nzubo pa mushiji pabula kitendekesho. Mukwe byo aishile ne kwipumako, ponkapotu yaponene, ne lonaiko lwa yoya nzubo lwajinga lukatampe.”
Bible App
Bible App for Kids
