MARKUS 3

Yesus bindei ba, no di ninda nite hi mai kei hanyen

(Mat. 12:9-14; Luk. 6:6-11)

1Mpe di gom bu lene Yesus coi ug ei mben Yahudi ide ig mbusyameisi gom ba, no di ninda nite hi mai no rima. 2Tungwatu nya igyok igyai kep bipia ma Yesus bindei ba, no dima mikei hanyen mem njap nigwam kep ninghuisi e? Nok leu binhyepo bon nituti mem ipai kep Noni. 3Yesus pai bak no di ninda nite hi mai “Akiju kwei ba, aya ei yahagom yoho bei.” 4Lene Noni hig singgre tungwatu nya “Puig Yahudi niggai serti sindui sut ba, igyai midyai mindei mem Njap Nigwam Kep Ninghuisi i? Impu yam e? He imbuk tut yam e? Inyohou yam e? He ihwen yam e?”

Noro yo dima ibuhup bi. 5Lene Noni ngig niyai kep yok biningon sibui sut yok nindig bibor apino ningon buhun drek dip ingkek di ndok bibor dima. Noni pai bak no dima “Atit anda.” Hammi tirigi noni tit ninda di mai rino noni kei hanyen hak. 6Gima rino Farisi nya imbut leu ig mbusyamei dima ba, yuug ngat yo di inggre kin nimpung Herodes ba, yuhum yam nsi mem gima ikos Yesus.

Tungwatu ningot ndig di ingat rin ei igpong nintig dip

7Mpe dima lene Yesus kin yo di igya kui Noni ingkwei hanyen ug ei Igpong Galilea nintig dip leu api tungwatu ningot ndig di ikwei leu hanjop Galilea kin Yudea, 8kin minu ndig Yerusalem kin hanjop Idumea kin minyei Yordan nite dima ug kin hanjop di gahai minu ndig Tirus kin Sidon yahagom ijop bram Yesus lewo ninghapti tibim tut mun di bibon nya. 9#Mrk. 4:1; Luk. 5:1-3 Yesus cuk yo di igya kui Noni leu binhyepo inggok ut hi mem gima Noni bri bigwam dip leu binhyepo tungwatu ningot ndig dima yok inggreu kep Noni bi. 10Noni bindei ba, tungwatu nya imang bibor ikei hanyen. Gima rino yo di inggwen nindigsi nya imang bibor iba yo dek yam leu binhyepo ingget Noni. 11Tirigi ninnei rom nya di igya tungwatu nya ingonti ingat igbit Yesus lene ikuk yok ei nimig him ba, yahara “Nani ne Allah Nipmot ri!”

12Noro Noni ggai ser yok ngkiem ser nhyema imbot kep ninyeng au.

Yesus dimig yo di igya kui Noni ibou simnaibrimigcan

(Mat. 10:1-4; Luk. 6:12-16)

13Mpe dima lene Yesus kui bigwam ei mbigdip gom bihig yo di ningon joi sut yok nya bikwei ndam Noni bibit Noni. 14Noni dimig ibou simnaibrimigcan bipai biyok “Didimig je leu binhyepo jiya kui Da leu api dicuk je leu binhyepo jitri tut Allah de Nihyet Di Kei.” 15Noni yai nisindemti biyok leu binhyepo ijji ninnei rom nya leu tungwatu nya ingonti.

16Ibou simnaibrimigcan di igya kui Noni inyeng rino Simon (ijem ninyeng hi Petrus), 17kin Zebedeus nipmot bat cin di Yakobus kin nikinjoi Yohanes (Noni jem inyeng hi Boanerges. Gikiek nihyet dima ne nibimbiti pai “Kru Pmot” ri), 18kin Andreas kin Filipus kin Bartolomeus kin Matius kin Tomas kin Yakobus di Alfeus nipmot kin Tadeus kin Simon di nggre kin nimpung Nasionalisasi. 19Kin Yudas Iskariot di tri Noni.

Yesus kin Beelzebul

(Mat. 12:22-32; Luk. 11:14-23, 12:10)

20Gima ngwig leu lene Yesus ngkwei hanyen ug ei ig bei. Noro tungwatu ningot ndig induk yam hanyen kwei binggreu kep Noni kin yo di igya kui Noni ser ba, bon nituti mem gima igyem njita bi. 21Tungwatu nya ipai Yesus ninghapti bipia mirei ya ningonti. Tirigi Nide bat nya imiap tut gima lene ibisau kwei mem gima ibuwak Noni hanyen leu yo dima.

22 # Mat. 9:34, 10:25 Guru Puig Yahudi nicukti nya ibou poi di ikwei leu Yerusalem ipai kep Noni bipia nibou ndig mem ninnei rom nya di ninyeng Beelzebul ya Yesus ningonti bisindem tut Noni leu binhyepo jji ninnei rom nya leu tungwatu nya ingonti.

23Gima rino Yesus hig tungwatu ningot ndig kwei lene pui sut nihyet nibiti nindati nya biyok. Noni pai “Notou mem gima Bilis jji nonti leu tungwatu nya ingonti i? Dem tut bi! 24Gino mben hi ikwas yam ei nimpung can ba, ikon pran bit yam lene yoni imai bingwig hak ug ri. 25Ba, gino yo di ibong ig nittou hi iba nitok biyam leu api jei bi ne itot yam bingwig hak ri. 26Gino Bilis jji nonti ba, nide ninnei rom nya ikwas yam ei nimpung can bikon pran bit yam ne bit bon Bilis ninyeng tak kepti jo kikau bi.

27Bit bon hi nggek no di sindem nide ig bipos ndigban kan bi bibou ba kuk bingot no di sindem bingkiem nipou leu ug e leu api pos ndigban nide nya hagom bingwig.

28Ma jiyok ngon kep bipia Allah sindem mem gima kos ser sisar kin nihyet wer mpiahi tut yamti.#3:28: Nipas kep mpiahi tut yamti cem kei lene nipas kep mpiahi tut Allahti cem kei. 29#Luk. 12:10 Noro Noni mikos ser sisar nihyet wer mpiahi tut Ninnei Gi Kwesti bi sren! Lewo sisar dima jo kikau ba, ug hon nohonti bi.” (30Yesus pai nok lewo bihi ipai kep Noni bipia ninnei rom ya ningonti.)

Yesus nipmem kin nikinjoi bat nya

(Mat. 12:46-50; Luk. 8:19-21)

31Mpe dima lene Yesus nipmem kin nikinjoi bat nya ikwei bigya biyati bisok ighyet bak Yesus leu binhyepo kwei ngat yok. 32Tungwatu ningot ndig inggreu ttai Yesus leu api ipai biNoni “Andigpoi e, apmem kin akinjoi bat nya ikwei ya biyati ba, ijoi sut imbrap bit Na.”

33Yesus buhup “Ningat ne dipmem kin dikinjoi bat nya ritou nya i?” 34Leu api Noni tou kep huk tungwatu ningot ndig di inggreu ttai Noni bipai “Yo dini ne dipmem kin dikinjoi bat nya ri! 35Lewo no di yai igbit Dicig ningon kanti ne dikinjoi kin dikwohop kin dipmem ri.”

Currently Selected:

MARKUS 3: HAD

Highlight

Copy