LUKAS 7

Yesus bindei ba, nibou tentara Roma de awak kei hanyen

(Mat. 8:5-13)

1Tirigi Yesus kes nihyet tut mun di tri tut bak tungwatu nya leu su lene Noni ug ei minu ndig Kapernaum. 2Nibou tentara Roma ningat rin ei sirima. Noni bon nide awak di noni joi sut bibor di nggwen nindig bibor ba, ningon tai-tai bou su. 3Tirigi Yesus ninghapti tibim ug ei nitingou nsi lene noni sok nihyet ei nibou mben Yahudi nya ibou poi dip bak Yesus binduk Noni kwei leu binhyepo yai gi kei bak nide awak bikei hanyen. 4Tirigi ikwei ngat Yesus lene yahara Noni “Andigpoi e, ma abindei ba, nibou tentara de awak kei hanyen hak ug lewo dem mem gima ampu noni, 5lewo ningon ngakei nye di mben Yahudi bingot ig mbusyamei hi mem nye tu.”

6Gima rino Yesus ce tut bibit yok. Tirigi Noni ug ei puig sinon lene nibou tentara sok nihyet ei nisut bat nya ibou pwoi dip bak Yesus bipai biNoni “Andigpoi e, ma abou ngwak sibui sut gima akwei bit leu disokti pima au. Dani ne dem tut gima dicigit Na kui ditde ig bi. 7Apino dibrim dingkek kep Na bidihwou ngat Na bi a. Gima rino ma apai ei ahyet him hak apino ditde awak mikei hanyen. 8Lewo nibou ndig tentara ninyeng tak kep da lene dani cem dinyeng tak kep ditde limwa nya bikuk yok bida. Gino dicuk hi ‘Aug hak!’ Leu api noni bisau buug hak. Gino dihig hi ‘Akwei!’ Leu api noni bisau bikwei hak. Gino dicuk awak hi ‘Ayai midyai dini!’ Leu api noni bisau biyai hak.”

9Yesus miap nihyet dima lene nggap leu tut leu api kiek No bipai bak tungwatu ningot ndig di ijop bram Noni “Mbenjen! Dipai bije bipia duum limwa Israel gom di ba ningon com Da nindig bibor noyam kin no dini hi bigyo sren!”

10Tirigi yo dima ingkwei hanyen ug ei ig bei lene ingat lo, awak dima kei hanyen tu.

Yesus win sop kibom nipmot ei minu ndig Nain

11Jei bi lene Yesus ug ei minu ndig Nain ba, yo di igya kui Noni kin tungwatu ningot ndig ijop bram. 12Tirigi ikwei krau dimbou pmem nuhui ei minu ndig dima lene Noni ngat lo, bihi ittei lat tut nimai ngut di joti ba, tungwatu ningot ndig injei bit. No di mai nimig gom ngat ba, nipmem kibom. 13Tirigi Yesus ngat kibom dima lene ngondut noni bipai bak “Sindig e, ma ayai nggwei kibor au!” 14Lene Noni dideu lat biya simiak lene ngget. Gima rino yo di ittei lat igya igyati. Yesus pai “He mot de ndia ug o, dicuk na bipia akiju!” 15Tirigi cuk nok rino no di mai kiju bigwam pijum bimbrap. Gima rino Yesus kes noni hanyen bak nipmem.

16Tungwatu ningot ndig dima yahagom inghuisi mpig sut binggei sut Allah bipai “Nabi di ninyeng jei bibor kiju ei nyeni ikieti tu! Allah kwei leu binhyepo mpu Nide limwa nya bikwek yok leu mun di kat yok!”

17Yesus ninghapti tibim tut mindur dima kikau bidem hanjop Yudea kin minu mien di gahai nya cem hagom.

Yo di igya kui Yohanes ikwei ngat Yesus

(Mat. 11:2-19)

18Yo di igya kui Yohanes ikwei ngat noni bipui kep tut Yesus niyai munti nya bak. Gima rino Yohanes dimig yo di igya kui Noni ibou can, 19bisok nihyet ei yok dip bak Tuhan Yesus bihig ser Noni “Nani ne No di Allah preu ei mem nye tut nikweisi pima rin e? He suar nimem kep ser hiter bu e?”

20Yo cin dima yuug ngat Yesus bipai biNoni “Yohanes di tur tungwatu nya ei minyeiti sok nihyet ei nye dip bihig ser Na bipia Nani ne No di Allah preu ei mem nye tut nikweisi pima rin e? He suar nimem kep ser hiter bu e?”

21Mpe dima lene Yesus bindei ba, yo di inggwen imang bibor ikei hanyen ba, Noni jji ninnei rom nya cem lene bindei ba, yo di igyai tu igyai da hanyen. 22#Yes. 35:5-6, 61:1 Gima rino Yesus buhup “Jingkwei hanyen ug ei Yohanes nidim bijipui sut mun di jingat bou jiyai him kin mun di jimiap ei jitingou nsi bak. Yo di igyai tu nya igyai da hanyen. Yo di imig lit nya imbut imig hanyen. Yo di bras yem yok ikei hanyen. Yo di itingou nam nya itingou tu hanyen. Yo di imai nya igyaijo hanyen bu ba, Nihyet Di Kei tibim ei yo di ihwap mbum nya itingou nsi tu. 23No di ningon wok birok Ditde midyai nya bi ne ningon nggei-hi-nggei.”

24Tirigi yo di igya kui Yohanes ingkwei hanyen tu lene Yesus pui sut Yohanes bak tungwatu ningot ndig dima yok bipai “Juug ei iggum ndigsi mem jingat mindei i? Krun meng di hou yai-yai nyen e? 25Juug ngat mindei i? No di juk sinsun di nibok kak e? Yo di ijuk sinsun di nibok kak kin yo di inyeng tut ndigban nindig bibor yahagom ibong bit nibou ndig nya! 26Gima rino juug ngat mindei ei iggum ndigsi i? No di nabi e? I, gima igbit rin noro ninyeng jei dor njiriek nabi nya. 27#Mal. 3:1 Yohanes di jingat pima ne no di Allah tri nihyet tut rin tirigi Noni pai,

‘Disok dihyet ei tungwagom di tri tut dihyet dip leu binhyepo noni tin puig bibie mem Nani yo.’

28Ma jiyok ngon kep bipia ei dihyeisi dini ne no di ninyeng jei dor njiriek Yohanes di tur tungwatu nya ei minyeiti hi bi sren. Mbro nok gima lo, no di bon ninyeng bi ei Allah ninyeng tak kepti ninyeng jei dor njiriek noni.”

29 # Mat. 21:32; Luk. 3:12 Tungwatu yahagom bitut yo di igya tindei belasten di igyem tungwatu nya imuhup cem imiap Yesus nihyet dima. Yo dini ibit Allah nicuk yokti bigyai nitur yok ei minyeiti leu Yohanes tu. 30Noro Farisi nya kin guru Puig Yahudi nicukti nya ikou sut Allah ningon kanti mem yok. Iba ingha bak nitur tungwatu ei minyeiti di Yohanes tri tut.

31Lene Yesus binut bu bipai “Diba mindei binai sut tungwatu nya nijam dini i? Inok tou i? 32Inok munggwom nya di igwam-gwam nyen ei biyati. Munggwom nimpung gom ipai bak isut bat nimpung hiter ‘Nibui ndug-ndug mem je noro jibien-bien nyen bi tut nggon i? Nipai doia nibikiek nimai cem mem je noro jipim bi tut nggon i?’ 33Yohanes ttau kwei lene noni yem njita bi mem nituti poi bidut ba anggur ngei bi sren noro jisrep bijipai ‘Ninnei rom ya ningonti!’ 34Tirigi Munggwom Tungwatu Nipmot ttau kwei lene Noni yem njita bidut ndia ngei cem noro jisrep bijipai ‘Jingat i! Yesus ninghop bou bidut ba anggur ngei nindig bibor cem ba, hig nisut bit yo di igya tindei belasten bigyem tungwatu nya imuhup kin yo di ibon sisar nindigsi nya.’ 35Mbro nok gima lo, yo di yahagom di igyai Allah nikan bidemti indo bindo tut Allah ningon kiti.”

Yesus yem njita bit Simon di nggre kin nimpung Farisi nya

36Farisi gom di ninyeng Simon hig Yesus kwei yem njita bit noni. Gima rino Yesus coi ug ei nide ig bigwam kui meja biyem njita. 37#Mat. 26:7; Mrk. 14:3; Yoh. 12:3 Mpe dima sop di bon kep sisar cem no bong ei minu ndig dima. Tirigi noni miap tut Yesus di yem njita bit Farisi dima lene noni ug yai nide ampou bitut mini mbris di joti. 38Lene noni coi ug ei ig bei bikuk no ei Yesus nimig him bipim ba, niyai nggwei kibor ug ei Yesus nimigti leu api ba nibou nta bidip nimig nggou hanyen leu. Noni mei-mei nyen Yesus nimig leu api kiber mini mbris ei dip. 39Tirigi Farisi di ngei njita mem Yesus ngat igbit sop dima niyaisi dima lene kan-kan nyen ei ningonti “Gino No dini ne nabi di nijit rin lene Noni kan tut bipia sop di ngget Noni dima ne sop di bon kep sisar ri.”

40Lene Yesus pai bak “Simon e, dipai dingon kanti gom bina.”

Lene Simon buhup “Guru e, apai hak ug.”

41Lene Yesus ba nihyet nibiti nindati bipai binoni “Tungwatu nya ibou can ibon ningwam bak nikwas kep ningwam cig gom. Hi bon ningwam sribu sratus muhwi lene hi bon ningwam sribu ningot muhwi. 42Noro bit bon yahacem irop ningwam dima hanyen bak noni kan bi. Gima rino noni dip tut ide mitiei ngwam bihigom leu yok. Leu ibou can dima ne tou rima ningon ngakei andigpoi dima nindig bibor dor njiriek nisut i?”

43Simon buhup “Dikan bipia no di bon ningwam nindig bibor di niceu dip tut bihigom dima.”

Yesus pai binoni “Abuhupti dima igbit ri.” 44Lene Yesus ngig niyai kep sop dima bipai bak Simon “Angat sop dini e? Tirigi dicoi kwei ei ade ig lene atau minyei mem dibipiap dimig bi noro sop dini ba niyai nggwei bipiap dimig leu api ba nibou nta bidip dimig nggou hanyen leu. 45Apigo Da tug hon gino amei dingyoi bi noro sop dini mei dimig ninyen tirigi sindi dicoi kwei ei ig bei. 46Aba mini ibou biprok dibou bi noro sop dini ba mini mbris biprok dimigya. 47Gima rino dipai bina bipia nide ningon ngakei Dati di nindig bibor dima ndo bipia Allah kos ser nide sisar di mang bibor tu. No di yai nikos ser nide sisarti gom-gom he miba ningon ngakeisi poi mien bibirop no di kos ser nide sisar.”

48Lene Yesus pai bak sop dima “Dikos ser ade sisar tu.”

49Yo di igyem njita bit Noni ihig yam “No di kos ser sisar dini ne Noni tou rin i?”

50Noro Yesus pai bak sop dima “Ayai niteu leu sisar kin niyaijo nijep#7:50: Nipas kep Ayai niteu leu sisar kin niyaijo nijepti cem kei lene nipas kep akei hanyen cem kei. tug hon ade niba ningon com Dati tu. Aba angon di nggan-triot bingkwei hanyen hak ug!”

Currently Selected:

LUKAS 7: HAD

Highlight

Copy