LUKAS 2

Maria srek tut Yesus

(Mat. 1:18-25)

1Ei mpe dima Kaisar Agustus tri nihyet bipai bipia suar bikwop nide limwa nya bidem dihyeisi dini hagom yuug ei kintrorti di jo ei itimieisi bindat kep inyeng leu binhyepo noni kan tut yahagom imangti sok yam. 2Nikwop kep imangti gi nimbie him ngat dini mbut mem nijam di Kirenius nok nibou mem minu Siria yo. 3Gima rino tungwatu nya yahagom ingkwei hanyen ug ei itimieisi mem gima indat kep inyeng.

4Yusuf cem jo leu minu ndig Nazaret ei hanjop Galilea buug ei nidigup-nidigai di Daud nitimieisi ei minu ndig Betlehem ei hanjop Yudea. 5Yusuf ndat kep ninyeng kin Maria di yok wa kep nok nitnem ninyeng cem mem nijam di Maria tta buhun. 6Tirigi ibong ei minu ndig Betlehem lene Maria ninghim dut, 7bisrek tut nipmot mighumbou biba ban binggai lene kes nyahan tut ei brua nsi di sapi nya igyem kep njita eisi lewo ig losmen hi bon ningwakti mem yok bi.

Gembala nya kin malaikati nya

8Gembala nya cem yo rinaha ei hanjop nsi dima bigwam ser domba di ide nya ei dumti mem mmun. 9Nok rino idrui sut lo, malaikati Allah de gom tau kros biya hak ei ikieti lene Allah nikei-kausi cem piga mpia kei bibindei ba, ingwes mba. 10Noro malaikati pai ser yok “Jittin au! Lewo dikwei tri tut nihyet di kei bije ba, nihyet dima mibiyai tungwatu nya yahagom ingon llei bibor. 11Njap di ammani jide Nibou Ndig di miteu je leu sisar biyai niyaijo nijep bije nipmem srek tut ei Betlehem ba, ninyeng rino Kristus Tuhan! 12Ba, mun di ndo bindo tut dipaisi dini rinok gini. Mporo jimbut bijittau kep ningwoi-ngwoi dima bijingat lo, no iba ban binggai di ikes tut ei brua nsi ei a.”

13Leu api malaikati nimpung nindig gom ittau kros bigya kui noni lene ipai doia bibinggei sut Allah bipai, 14“Ma inggei sut Allah di Ninyeng Jei ei gwamti o! Ma yo di Tuhan joi sut yok nya ibong kei igwam kei ei dihyeisi dini o!”

15Tirigi malaikati ningot ndig dima yok ikes gembala nya leu bingkwei hanyen ug ei gwamti lene gembala nya icuk yam bipai “Jihwou ba, yuug ngat ser mun di Allah mbot kep binye di pek kep mem nye ei Betlehem i!”

16Lene ibipbur biyuug ttau kep Maria kin Yusuf bingat lo, ningwoi-ngwoi dima No bong nyahan ei brua nsi ei a.

17Tirigi ingat ningwoi-ngwoi dima lene inyohou tri tut mun di malaikati pai sut ningwoi-ngwoi dima biyok. 18Lene yo di imiap mun di gembala nya itri tut biyok dima yahagom inggap leu tut nindig bibor. 19Noro Maria pwoi mun dima yok hagom ei ningonti lene ba ningon bisrip huk. 20Gembala nya ingkwei hanyen binggei sut Allah tut mun di imiap kin mun di ingat bou igyai him lewo hagom pek kep malaikati nipaisi.

Ijem ningwoi-ngwoi ninyeng Yesus

21 # Im. 12:3; Luk. 1:31 Tirigi nide njap ug ei njap muhwindaningai su lene ibon midut sunat biNoni ba, Yusuf kin Maria ijem ninyeng Yesus. Ninyeng dima bit leu malaikati nipaisi nipou tirigi nipmem nghop bigyo.

Idimig Yesus ei mem Tuhan ei Tuhan De Ig

22 # Im. 12:6-8 Mpe di gom bu tirigi tto bou dem mem Yusuf kin Maria ibon midut nibindei kwes pinai kin nitnem di srek tut munggwom bit leu nok Puig Yahudi niggai serti lene yuusap ningwoi-ngwoi dima ug ei Yerusalem leu binhyepo idimig Noni ei mem Tuhan. 23#Kel. 13:2, 12 Lewo Allah nicukti pai “Suar jidimig bikwop pinai mighumbou yahagom ei mem Allah.” 24Lene ibon midut nikos bijut hacig gom hawek gom e, he nikos hakimoi nimien ningut can e, bit leu nok Allah nicukti.

25Mpe dima lene Simeon no bong ei Yerusalem. No dini ningon sren bittin tut Allah lene mem kep ser tto bou tirigi Allah miteu mben Israel. Ninnei Gi Kwes cem ningat rin bit noni, 26bimbot kep tut binoni nipou su bipia noni mimai bi bibou ngat Nibou Ndig di teu tungwatu nya biyai niyaijo nijep biyok di Allah preu ei mem yok bou niyai him nipou ug e. 27Mpe di gom, lene Ninnei Gi Kwes bie tut noni ug ei Tuhan De Ig lene Yusuf kin Maria yuusap Yesus ningwoi-ngwoi kwei mem gima ibon midut sunat biNoni bit leu nok Puig Yahudi niggai serti. 28Lo bi lene Simeon krau ningwoi-ngwoi dima ba, hon leu api nggei sut Allah bipai,

29“Tuhan e, tto bou dem tu. Bit leu nok apreu ei mem da nipou su. Nna ba asindui sut Ade awak di dani bidimai hak ug lewo dingon jo nyahan tu.

30Dingat No di miteu tungwatu nya leu ide sisar biyai niyaijo nijep biyok bou diyai him tu.

31Atin ei No di miteu tungwatu nya biyai niyaijo nijep biyok bou mben nya yahagom igyai him tu.

32 # Yes. 42:6, 49:6, 52:10 Noni ne ninjeng di piga digai puig mem ngkiai nya di itti kin Nani ba, ninjeng di bindei di tungwatu nya yahagom ikon Ade limwa mben Israel inyeng ri.”

33Yusuf kin Maria inggap leu nindig bibor tut mun di Simeon pai sut ipmot Yesus. 34Simeon ngat nadi tindei mun di kei mem yok leu api pai bak ningwoi-ngwoi nipmem Maria bipai “Allah dimig munggwom dini leu binhyepo Noni mibindei sar mben Israel imang bibor lene mibindei ba, imang bibor igyai niteu leu sisarti bigyai niyaijo nijep. Noni minok bindo di kwei leu Allah leu api tungwatu nya imang bibor misrep tut Noni 35tug hon nisinati dima lene yoni mimbot kep tut ingon kanti nya di jo nding. Noro mem nani ne ningon ngguk biborti di dem kep nok simeda di riu angon micut igkep na.”

36Gima cem sindig-ndau Hana di nok nabi sop no rima. Nicig ninyeng Fanuel ba, noni ntun keret Asyer him. Tirigi sop dini wak nijjep ba, niyaijo bit nijjep ei ninsi ari bingwam muhwindacan leu 37lene noni wer kibom kikau ba, nogindini nide njap ug ei ari bingwam ningot muhwindaningai ba, bitai. Noni bong kep Tuhan De Ig bikwop mmun-njap ba, kuk no bak Allah tug hon nadi kin niyem njita bi mem nituti poi. 38Hammi tirigi noni coi kwei bittau kep yok rino noni nggei sut Allah. Leu api ug tri tut ningwoi-ngwoi dima bak tungwatu nya di imem kep ser tto bou di Allah bindei ba, timiei minu ndig Yerusalem igyati kwes.

Yusuf nya ingkwei hanyen ug ei minu ndig Nazaret

39 # Mat. 2:23 Tirigi yoni ibon midut nya bit leu nok Tuhan nicukti hagom tu lene ingkwei hanyen ug ei itimieisi minu ndig Nazaret ei hanjop Galilea. 40Munggwom dima wer mahan biyai nisindemti kin ningon kiti lewo Allah singat tut Noni nindig bibor.

Yesus wer munggwom ndig ningat rin ei Tuhan De Ig

41 # Kel. 12:1-27; Ul. 16:1-8 Bikwop ari bingwam lene Yesus nipmem Maria nijjep nya yuug ei minu ndig Yerusalem leu binhyepo ibon pesta kep Njap Ndig Paskah. 42Tirigi Yesus de njap ug ei ari bingwam simnaibrimigcan tu lene yoni ibuwak Noni cem ug ei Yerusalem bit leu nok igyai kepti. 43Mpe dino nibon pestati tun tu lene ingkwei hanyen ug ei minu ndig Nazaret noro Yesus No gwam hak ei Yerusalem lo, Maria kin Yusuf ikan tut bi. 44Ikan bigya Yesus No srig nimpung nindig di ibit yoti. Gima rino imbut mem njap nitindur gom leu ug api inggok ser Noni ei ide bat nya kin yo di inttig tta nya ikieti. 45Tirigi ingat Yesus ningat bi lene ingkwei hanyen ug ei minu ndig Yerusalem binggok ser Noni hapuig. 46Njap ningai ser lene ittau kep Noni ei Tuhan De Ig. Noni gwam bit guru Puig Yahudi nicukti nya bingig nitingou mem ighyet ba, hig ser yok ninyen cem. 47Yo di imiap kep nihyet yahagom inggap leu tut nindig bibor lewo ba ningon di ki bibuhup ighyet. 48Tirigi Maria kin Yusuf ingat Noni rino inga leu tut leu api nipmem hig ser Noni “Mot de ug o! Nggon rino abon mun nok tut nye i? Acig nyeni niba nikrau ningon tut Nati binggok ser Na ninyen.”

49Yesus buhup “Dicig dipmem jeni e, jinggok ser Da binggon i? Jikan tut bipia suar dingat rin ei Dicig Nide Ig#2:49: dingat rin ei Dicig Nide Ig cem kei lene nipas kep diyai Dicig de midyai nya cem kei. bi e?” 50Noro ingon dorti tut Yesus nibuhupti bi.

51Leu api Yesus bit yok bingkwei hanyen ug ei minu ndig Nazaret lene kuk No mem ighyet. Maria pwoi mun di pek kep mem yok dima hagom ei ningonti. 52#1Sam. 2:26; Ams. 3:4 Yesus wer pinjoi ndig ba, ningon di ki bikum eisi bu. Allah kin tungwatu nya ijoi sut Noni cem.

Currently Selected:

LUKAS 2: HAD

Highlight

Copy