LUKAS 19

Yesus mbrap bit Zakheus

1Tirigi Yesus ug krau Yerikho lene Noni bikwam bitunggwei ug ei minu ndig dima. 2Zakheus cem bong ei minu ndig dima. Noni ne nibou mem yo di igya tindei belasten bigyem tungwatu nya imuhup rin ba, nyeng bibor cem. 3Noni cem joi sut ngat Yesus bou niyai him noro bit bon ngat Noni kan bi lewo nintig bou cun ba, tungwatu nya ningot ndig igya ser. 4Gima rino noni dor bibie leu yok bikui biei ninjem hi bigwam ninggramti leu binhyepo tou kep Yesus di mbut binjiriek noni ei mpia dima. 5Tirigi Yesus kwei krau biei ninjem dima lene Noni kon nibou kui bipai “Zakheus e, abipbur ba, ajuk kwei lewo dibong bit na mem mmun di ariman.”

6Zakheus bipbur bijuk kwei leu biei ninggramti leu api ba ningon di llei bibor bicigit Yesus kui igya. 7Tirigi nindigsi ingat gima tu lene yahagom inso tut bipai “Mei! Yesus ug bong bit no di kinei-kinau!”

8Yuug krau ig tu lene Zakheus kiju biya lene pai bak Yesus “Tuhan e, dikos tut bipia dikwas ditde ndigban nite hi tut yo di yuhui mbum nya. Gino diris mitiei leu tungwa hi tu lene midingkwei hanyen bak mbitai bram yam!”

9Lene Yesus pai binoni “Njap di ammani ne Allah teu nani kin ade ig bei nsi nya jahagom leu sisar ba, jiyai niyaijo nijep drek dip gino antun Abraham him. 10#Mat. 18:11 Munggwom Tungwatu Nipmot ttau kwei leu binhyepo nggok yo di israwir nya biteu yok leu sisar biyai niyaijo nijep biyok.”

Nihyet nibiti nindati tut mitiei mas

(Mat. 25:14-30)

11Tirigi tungwatu nya intu kep Yesus nihyet lene Noni binut nihyet nibiti nindati gom. Noni kwei dideu Yerusalem ba, tungwatu nya ikan bipia jei bi ne Allah ninyeng tak kepti mittau kwei ei dihyeisi dini. 12Gima rino Yesus pai biyok “Mpe di gom ne tungwagom di ninyeng jei ug ei minu ting leu binhyepo timiei minu dima ita noni nok nibou ndig mem yok. Gino ita noni bingwig leu api noni mikwei hanyen. 13Nipou tirigi mbut bigyo ne noni hig nide awak nya ibou simnai kwei bikwas mitiei mas ninjep simnai tut yok ba, hi yai ninjep gom hi yai ninjep gom bikwop nok. Lene noni pingok ingonti bipai biyok ‘Ma jiba mitiei dini bipek mun leu api jitri ba, jibipek mitiei hi kin bu kikau bibou dikwei hanyen kep.’ 14Noro timiei di leu nitimieisi ingon mpo tut noni. Gima rino isok ighyet ei ibou poi di ibram noni dip bram bipai ‘Nikou sut gima no dini ninyeng tak kep nye a.’

15Noro timiei minu ting dima ita noni nok nibou ndig leu api ngkwei hanyen ei nitimieisi. Lene noni bipbur bihig nide awak nya di noni kwas mitiei tut yok dima kwei leu binhyepo hig pus yok tut mitiei di ibikum eisi bu. 16Awak gi nigom kwei ya ei noho bei bipai binoni ‘Andigpoi e, dibikum ei ade mitiei ninjep gomti ba, nimangti ug ei ninjep simnai bu.’ 17Niceu pai binoni ‘Kei bibor! Nani ne awak di ningon gom ri! Midita nani nok nibou mem minu ttou nsi simnai lewo ajoi bibor tut mun di nimien dima.’ 18Awak gi nican kwei pai binoni ‘Andigpoi e, dibikum ei ade mitiei gomti ba, nimangti ug ei ninjep muhwi bu.’ 19Niceu pai binoni ‘Midita na nok nibou mem minu ttou nsi muhwi.’ 20Awak gom kin bu kwei pai binoni ‘Andigpoi e, angat ade mitiei ninjep gom pima rini. Dijun nyahan ei sinsun nghasti. 21Dinghuisi mpig sut na di Andigpoi lewo asibut. Na di Andigpoi apos mun di anyeng tut bi ba, aket gandum di ahap bi cem.’ 22Niceu pai binoni ‘Nani ne awak di sibut bibor ri! Midikes hukum ei na dip drek dip ahyet di tibim ei ahui him. Akan tut bipia disibut bibor drek dip gi dipos mun di dinyeng tut bi bidiket gandum di dahap bi cem e? 23Gi nok lene nggon rino acom mitiei dima ei bankti leu binhyepo timiei nya ei bankti dima mikum ei nibitemti mem dikwei hanyenti bi i.’ 24Leu api andigpoi cuk yo di igya ei sirima bipai ‘Jipos mitiei leu awak dima leu api jiyai bak awak di krau mitiei nimangti ninjep simnai.’ 25Noro ibuhup ‘Andigpoi e, no dima yai mitiei ninjep simnai su.’ 26#Mat. 13:12; Mrk. 4:25; Luk. 8:18 Nibou ndig dima pai biyok ‘Ma jiyok ngon kep bipia midikum eisi bak no di nyohou mun di jo binoni noro miditug niken hanyen leu no di nyeng tut mun nyeng hi bi. 27Nogindini ma jikat ditde siceu nya di ikou sut gima dinyeng tak kep yok kwei leu api jikimukep yahagom bou diyai him hak ug!’ ”

Yesus coi ug ei Yerusalem bit yo di ingon llei sut Noni

(Mat. 21:1-11; Mrk. 11:1-11; Yoh. 12:12-19)

28Yesus pai nok leu lene mbut bibie yoho kak puig ug ei Yerusalem. 29Tirigi Noni kwei dideu minu mien Betfage kin Betania ei Nungug Zaitun nimig lene Noni cuk yo di igya kui Noni ibou can bidor bibie leu yok, 30bipai biyok “Juug ei minu mien di jittau eisi dima leu api tirigi jicoi ug ei sima lene mijingat keledai nipmot di nehen pap gom di tungwatu nya yuu ba, hi bri bigyo. Ma jipas kuk tut bijijem kwei biDa. 31Gino tungwatu nya ihig ser je ‘Nggon rino jipas kuk tut keledai nipmot dima i?’ ma jibuhup ‘Tuhan#19:31: Nipas kep Tuhan: Angig ayai kep Mat. 21:3. joi sut mem bri mbigom ug e.’ ”

32Ibou can di igya kui Yesus imbut leu api ingat hagom bit leu nok nipaisi. 33Tirigi ipas kuk tut keledai nipmot lene niceu hig ser yok “Nggon rino jipas kuk tut keledai dima i?”

34Yoni ibuhup “Tuhan suar bibri mbigom ug e.” 35Lene ijem keledai nipmot kwei bak Yesus. Iba ide sinsun ndok di jei bijuk kep keledai ninghim lene ikes Yesus bigwam dip. 36Tirigi keledai mbut tut Yesus lene tungwatu nya ingig ide sinsun ndok di jei kak simpak bibingon nok kwo ngig mem nimbutti.

37Tirigi Yesus kwei dideu Yerusalem ei nungug Zaitun nimig lene yo di ibit Noni yahagom iba ighyet nindig bibor binggei sut Allah bipai sigyo bak drek dip mindur nya di ingat bou igyai him tu nya. 38#Mzm. 118:26 Iba ighyet nindig bipai “Allah e, anjei mun di kei bak Nibou Ndig di kwei ndam nye tug hon Tuhan ninyeng! Timiei gwamti nya ibong kei igwam kei o! Ma tungwatu nya inggei sut Allah ei gwamti o!”

39Farisi nya ibou poi di igya srig tungwatu ningot ndig pima yok ikieti isrep tut Yesus bipai “Guru e, apai ser yo di ibit Na leu binhyepo ikimut yuhui bimbrap au!”

40Yesus buhup “Ma jingon jo kep bipia gino yo dini ikimut yuhui leu Da lene tig dini yok minggei sut Allah.”

Yesus pim tut Yerusalem

41Tirigi Yesus ttau dideu Yerusalem bicap minu ndig dima lene Noni pim biniyai nggwei kibor tut, 42bipai “Ndina! Gi kei rino njap di ammani jingon hukti tut mun di biyai jingon di kwes kin Allah! Noro nogindini mun dima jo nding leu jiyai him! 43Lewo ei nijam di mittau ei nidipti bu ne siceu nya igyon ttai jide minu ndig bibon mun-mun hi bibikwam ser jingwak him bibinggam je ei ninsi. 44Yoni minggek jide ig hagom bitut timiei nya yahagom bingwig. Yoni mibindei timek je bitut timiei nya yahagom. Tig di jo-jo yam dip mijo bu bi lewo jingon hukti tut nituti di Allah kwei mem gima teu je bijingwes ngun bi!”

Yesus coi ug ei Tuhan De Ig

(Mat. 21:12-17; Mrk. 11:15-19; Yoh. 2:13-22)

45Yesus coi ug ei Tuhan De Ig leu api jji nitri-nipek mun cig nya yahagom leu mpia dima, 46#Yes. 56:7; Yer. 7:11 bipai biyok “Allah nihyet pai bipia ‘Ditde ig dini ne mpia di mem mben nya hagom ingat nadi eisi.’ Noro jibibon ig dini nok hak mihyeti mem ninggimang kep mun cig nya biku yok eisi!”

47 # Luk. 21:37 Yesus ngginau tungwatu nya di ingat rin ei Tuhan De Ig bikwop njap-njap. Imam nindig nya kin guru Puig Yahudi nicukti nya kin nibou mben Yahudi nya yahagom imem kep ser nituti mem gima igyai nimai biNoni. 48Noro bon nituti mem igyai nimai biNoni bi lewo tungwatu nya yahagom ingig itingou mem nihyet ba, ijoi sut ningginau yokti nya.

Currently Selected:

LUKAS 19: HAD

Highlight

Copy