LUKAS 17
17
Mun di bindei dino tungwatu nya ibon sisar
(Mat. 18:6-7, 21-22; Mrk. 9:42)
1Yesus pai bak yo di igya kui Noni “Mun di bindei dino tungwatu nya ibon sisar nonaha. Noro aye! Buhun bibor mem no di bindei dino hiter bon sisar! 2Nnaba tungwatu nya ikim tig mma nindig bibor ba, ibisrou no dima nikimam binjei sut ug ei muk jou leu gima noni bindei ba, munggwom mien dini hi bon sisar a. 3#Mat. 18:15 Ma jingon sok kep jenti!
Gino asut bon sisar tut na lene ma apingok ningonti tut hak ug. Gino noni ttin ser sisar dima lene ma akos ser sisar dima hak ug. 4Gino noni bon sisar tut na mbimuhwindacan mem njap gom noro kwei mbimuhwindacan bipai bina ‘Dijem ampon bina’ lene ma akos ser sisar dima hak ug.”
Ningginausi tut niba ningon com Allahti
5Yo di igya kui Yesus yahara Noni “Na di Tuhan e, ayai nisindemti binye leu binhyepo niba ningon com Na mungkun kei.” 6Noni buhup “Gino jide niba ningon com Dati dem kep sawi ngan di bigbibor he lene bon jicuk biei murbei dini ‘Atiba nanti leu api ata nanti hanyen ei muk ngeisi!’ Lene midem igbit jicukti dima ri.”
Ningginausi tut midyai di suar awak nya igyai
7“Gino jide awak ug yai miai bihyen kep domba nya cem leu api ngkwei hanyen kwei ei ig bei lene mijihig noni ‘Abipbur ba, akwei yem njita.’ Jipai bak nok e? 8Nok bi! Noro jicuk noni ‘Akwen njita mem da lene ma ajuk sinsun di pwoi leu api abitin ei njita mem da. Agwam nyahan bibou diyem njita bididut ndia ngei nipou ug e. Gima ngwig leu api ayem ade njita abia.’ 9Dem tut gima jipai sigyo bak jide awak drek dip midyai di yai bit leu nok jicuk noti e? E bi! 10Nok gima tut jeni cem. Tirigi jiyai midyai hagom bit leu nok jiceu nicuk jeti bingwig lene ma jipai biyam ‘Inok awak di ibon inyeng bi. Igyai midyai hagom bit leu nok iceu nicuk nyeti he.’ ”
Yesus bindei ba, yo di bras yem yok ibou simnai ikei hanyen
11Tirigi Yesus ug ndam Yerusalem lene ug mbut minu niya kwas yamti ei hanjop Samaria kin Galilea. 12Tirigi Noni coi ug ei minu mien gom di jo ei puig sinon ei nimbutti dima lene ibou simnai di bras yem yok igya minu ting um Noni, 13biba ighyet nindig hara “Yesus e, Andigpoi e, angondut nye o!”
14 #
Im. 14:1-32
Tirigi Yesus ngat yok lene cuk yok “Juug ndo jenti bak imam nya leu binhyepo ingig igyai kep jingkek dip.”
Tirigi yuug ei puig sinon tu lene ingat lo, ikei hanyen tu. 15Tirigi igom leu yo dima ikieti ngat lo, noni kei hanyen tu lene ngkwei hanyen ba, ba nihyet nindig bibor binggei sut Allah. 16Lene ba ningwak bikik mpia ei Yesus nimig him bipai sigyo bak. No dini ne timiei minu ndig Samaria ri. 17Lene Yesus hig ser noni “Apo dibindei ba, ibou simnai ikei hanyen bi e? Nindigsi di ibou muhwindatai pima yo rigitou i? 18Nggon rino ngkiai dini nongkom ngkwei hanyen bipai sigyo bak Allah i?” 19Lene Yesus pai binoni “Akiju ba, aug hak ug. Akei hanyen tug hon ade niba ningon com Dati tu.”
Allah ninyeng tak kepti nikweisi
(Mat. 24:23-28, 37-41)
20Farisi nya ibou pwoi ihig ser Yesus “Allah ninyeng tak kepti mittau kep nye apig bu i?” Noni buhup “Allah ninyeng tak kepti mittau kep nye tug hon bindo ei tungwatu nya igyai him, 21di bindei ba, ipai sut ‘Jikwei ngat i! No rini’ e, he ‘no rima’ e? Nok bi! Lewo Allah ninyeng tak kep limwa nyati sindi srig jikieti tu.”
22Ariman bu lene Noni pai bak yo di igya kui Noni “Ei nidipti bu mijiyok jingon mem gima jingat Munggwom Tungwatu Nipmot ningat bou jiyai him mem njap gom ngat he noro njap dima mittau kep je hanyen bi. 23Mpe dima lene tungwatu nya mipai bije ‘Jingat i! No rima.’ He mipai ‘Jingat i! No rini.’ Noro ma jingon bit ighyet au. 24Bit leu nok mpia kieng ei mpia-bbed him ba, ninjeng piga mpia-bbed him nisurti-nipekti lene Munggwom Tungwatu Nipmot nittau hanyenti cem nok gima. 25Noro suar Noni yai ninghuisi wei nindig bibor bibie ug e ba, tungwatu nya ei nijam dini mikou sut Noni. 26#Kej. 6:5-8 Lewo Munggwom Tungwatu Nipmot nittau hanyenti midem kep nok nijam di Nuh gwam ei dihyeisi dini. 27#Kej. 7:6-24 Tungwatu nya igyem njita bidut ndia ngei cem ba, iwak yam kikau ug bipek njap dino Nuh coi ug ei kibar nsi kep leu api minyei ut kep yok ba, yahagom isar bingwig. 28#Kej. 18:20–19:25 Nok gima cem mem nijam di Lot gwam ei dihyeisi dini. Mpe dima lene tungwatu nya igyem njita bidut ndia ngei cem itri mun bibipek mitiei cem igyai miai cem ingot ig cem, 29noro njap di Lot nang leu Sodom ne hum kin belerang cut kros leu gwamti biyem nindigsi nya yahagom bingwig. 30Nok gima cem mem njap dino Munggwom Tungwatu Nipmot nittau hanyenti.
31 #
Mat. 24:17-18; Mrk. 13:15-16 Mpe dima ne ma no di kui bigwam ig bou ninjek juk hanyen kwei noro coi ig bei biyai nide ndigban au. No di yai miai cem ma ngkwei hanyen ug ei ig bei au. 32#Kej. 19:26 Ma jiyok ngon kep mun di cut igkep Lot nitnem! 33#Mat. 10:39, 16:25; Mrk. 8:35; Luk. 9:24; Yoh. 12:25 Bikwop no di ningon hek tut nonti bikan bipia niyaisi bon ninyeng mem nonti ne niyaisi sar. Noro no di kes niyaisi ei bikan bipia niyaisi bon ninyeng mem nonti bi nyohou niyaisi. 34Ma jingon jo kep bipia ibou can ibong mai ei nghim nsi gom mem mmun leu api malaikati nya iteu gom lene ikes gom ei. 35Sop cin di yoho gandum ngan ei hukti ne malaikati nya miteu gom lene ikes gom ei. [36Ibou can igyai miai leu api malaikati nya iteu gom lene ikes gom ei.]”
37Yo di igya kui Yesus ihig ser Noni “Tuhan e, mun dini yok hagom pek kep mem nye ei siritou i?”
Yesus buhup “Tirigi nimbiam nijoti ne hacam krubri nya ingwig kep ei sirima.”
Currently Selected:
LUKAS 17: HAD
Highlight
Share
Copy
Want to have your highlights saved across all your devices? Sign up or sign in
