LUKAS 12

Yesus sok kep yok tut yo di ingon mang

(Mat. 10:26-27)

1 # Mat. 16:6; Mrk. 8:15 Mpe dima lene tungwatu nya ibou sribu-ribu ingwig tai Yesus ba, iba yo dek yam bico kep yam mig cem. Lene Yesus sok kep yo di igya kui Noni “Ma jitindei ser roti ninjep di Farisi nya ide. Dipai sut ide ningon mangti. 2#Mrk. 4:22; Luk. 8:17 Ninjeng gom mipiga digai mun nyeng hagom di jo nding hanyen. Nihyet gom mitibim tut mimun hagom ei nibreisi hanyen. 3Mun nyeng hagom di jipai biyam mem mmun mitibim hanyen mem njap. Mun di jahamui nyahan tut ei nghim nsi di jirit dimbou ser mitibim hanyen ug ei dihyei nisurti-nipekti.”

Ma jittin tut Allah

(Mat. 10:28-31)

4“Disut bat jen! Ma jiyok ngon kep! Ma jittin tut yo di ikimukep jingut au. Lewo bit bon igyai mun di buhun dor njiriek gima bije kan bi. 5Suar jittin tut tou i? Dindo Noni bije. Ma jittin tut Allah lewo niabiati Noni kimukep tungwatu nya leu lene Noni sindem mem gima com yonti njem titut yam ug ei hum njengti. Ma jiyok ngon kep bipia suar jittin tut Noni.

6Jiba mitiei nimeng ngwoi can bipek minsit ningut muhwi. Mbro nok gima lo, Allah ningon prion ser minsit dima ningut gom bi. 7Allah kan tut jibou nta nimangti tu. Gima rino ma jittin tut au. Jibok kak bibor dor njiriek minsit di mang bibor nibok a.”

Ningginausi tut yo di itti kin Kristus kin yo di itti kin Noni bi

(Mat. 10:32-33)

8“Ma jiyok ngon kep bipia bikwop no di tri tut brei ei yo di yahagom yoho bei bipia noni tti kin Dani lene Munggwom Tungwatu Nipmot cem mitri tut brei bipia tti kin noni ei Allah de malaikati nya yoho bei. 9Noro bikwop no di bikep ser Da brei ei yo di yahagom yoho bei lene Munggwom Tungwatu Nipmot cem mibikep ser noni brei ei Allah de malaikati nya yoho bei.

10 # Mat. 12:32; Mrk. 3:29 Allah mikos ser sisar nisrep tut Munggwom Tungwatu Nipmotti noro bit bon Noni kos ser sisar nihyet wer mpiahi tut Ninnei Gi Kwesti kan bi sren.

11 # Mat. 10:19-20; Mrk. 13:11; Luk. 21:14-15 Tirigi tungwatu nya ikat je bibuwak je ug ei ig mbusyameisi mem gima nibou ndig kin yo di igya kui noni imbus jingonti lene ma jingon ku jenti tut notou jimbrap gau jenti kin gima jibirop hanyen biyok au. 12Lewo Allah Ninnei mipingok ei jingonti tut mun dima jibirop hanyen biyok dem igbit nikwesti.”

Ningginausi tut no di ba ningon com mun di pror yon

13Tungwagom di srig yo di ningot ndig dima ikieti pai bak Yesus “Guru e, acuk dikindig leu binhyepo kwas mun di diba dakep tut da lewo nicig mai leu nye tu.”

14Yesus buhup “Disut na e, tou rindo Da nok nikei kin no di dem mem gima dikwas mun di jiba jekep pima tut je i?” 15Leu api Noni binut nihyet bu bipai bak yo di yahagom di ingat rin ei mpia dima “Ma jisok kep jenti ba, jinyohou jingonti ser nhyema jibon sisar ningon pri kep ndigbanti au. Leu mbro nok gino jinyeng tut ndigban nindig bibor lo, jiyaijoti tug hon jide ndigban bi.”

16Lene Yesus ba nihyet nibiti nindati bingginau yok bipai “Mpe di gom ne tungwagom nyeng tut dihyei hanjop nsi nindig bibor ba, biyai njita nindig krop. 17Lene noni sindi kan ‘Side ig gudan nsi dem mem side njita dini yok hagom bi. Sibon ndei notou i?’ 18Leu api noni kos tut ningon kanti ‘Silet side ig gudan nya hagom lene singot ig gudan di nindig krop hiter bu leu binhyepo sikon side njita kin ndigban hagom eisi.’ 19Leu api misipai bisanti ‘Singon nggei-hi-nggei! Sima mun nyeng hagom tu. Sinyeng tut njita bijo kikau ba, ngwig leu sa bi. Ma sibong kei sigwam kei! Siyem njita di kei bisidut ba anggur ngei cem lene ma siyai mun bit leu singon kanti hak ug!’ 20Noro Allah pai binoni ‘Angon mbum yo! Himmun di ariman ne ade njap ngwig hon ug ri. Lene tou riba nokep mun di anyeng tut di nindig bibor di anju ei ade ig gudanti nya dima i?’

21Mun di buhun dima micut igkep bikwop yo di inju ndigban nindig bibor ei mem yonti noro ibrim ningkek tut mun di bon ninyeng ei Allah niyai him bi.”

Ningginausi tut niba ningon com Allahti

(Mat. 6:25-34)

22Lene Yesus pai bak yo di igya kui Noni “Gima rino dipai bije bipia ma jingon bos-bos nyen tut njita di jiyem kin sinsun di jijuk au. 23Lewo jiyaijoti bon ninyeng dor njiriek njita di jiyem. Jingut bon ninyeng dor njiriek sinsun di jijuk nya. 24Jitou kep miniwou nya! Indim njita ngan bigyai njita ningat kwei binju hagom ei igudanti bi. Noro Allah nyohou yok! Jibok kak bibor dor njiriek ha nya ibok a! 25Mbro nok gino jingon bos-bos nyen lo, bit bon jibinut jide njap wer jei#12:25: Nipas kep jide njap wer jei: Angig ayai kep Mat. 6:27. bu kan bi. 26Gino jiyai nisindemti mem jiyai mun poi mien nok gima bi lene nggon rino jingon bos-bos nyen tut mun nyeng nindigsi nya i? 27#1Raj. 10:4-7; 2Taw. 9:3-6 Ma jiyok jiyai kep mitou igbit susti. Mitou dima yai midyai binap sinsun cem mem nonti bi. Noro Nibou Ndig Salomo di nyeng bibor juk sinsun di kei bibor di noyam kin mitou dima bi! 28Allah rino pai tes mitou di kieng ammani lene njap di hyep bu mui hanyen ba, tungwatu nya indig bingwig. Noni minyohou jeni cem bi e? Mei! Jiba jingon com Noni haigtu bi e? 29Gima rino ma jingon bos-bos nyen tut njita di jiyem kin ndia ngei di jidut au. 30Lewo yo di igwam Yesus ninghim ingon bos-bos nyen tut mun dima yok hagom bijo ninno. Jicig ei gwamti kan tut bipia jisuar mun dima yok hagom. 31Noro ma jibrim jingkek mem Allah ninyeng tak kep jeti apino Noni miyai mun di nindigsi dima hagom bije.”

Ningginausi tut ninju ndigban ei gwamti

(Mat. 6:19-21)

32“Je dino jimang bi e, ma jittin tut au! Lewo Jicig joi sut gi yai munkwas di ntun Nide ninyeng tak kepti him bije. 33Ma jitri jide ndigban bingwig ba, jibipek mitiei leu api jiyai hagom bak yo di yuhui mbum nya. Ma jinju ndigban keyam mem jenti ei gwamti dem kep nok jikinding jide bangdop bingkiem kei mem jenti leu binhyepo kinei hanyen bi. Lewo bit bon tungwatu nya inggimang ndigban ei gwamti ba, awam cem kin kan bi. 34Lewo jingon millei ndam mpia ttou nsi di jimbus jide ndigban kin mitiei kikep keyam eisi!”

Awak di tindei ser niceu nikwei hanyenti

35 # Mat. 25:1-13 “Ma jitindei ser mun nyeng hagom di mipek kep mem je ba, jijuk jide sinsun bijo jingkek lene ma jitin mini jide binjeng kei, 36#Mrk. 13:34-36 noyam kin awak nya di itindei ser iceu nikwei hanyen leu niwak yamti. Tirigi noni ttau kwei bipuk dimbou lene ibipbur ba, ikau dimbou leu noni. 37Gino iceu kwei hanyen bittau kep yok tirigi igyai ngkiem ba, itin ei cem tu lene yo dima ingon nggei-hi-nggei. Ma jiyok ngon kep bipia iceu mijuk nide sinsun ndok di jei leu no leu api sindui sut yok bigwam kui meja leu api mingei njita mem yok. 38Gino iceu kwei hanyen bitau kep yok mem mmun mau kin itangganti bingat lo, yahagom itin ei mem noni tu ne yo dima ingon nggei-hi-nggei! 39#Mat. 24:43-44 Ma jiyok ngon kep! Bit leu nok gino ig ceu kan tut ninggimang kep mun cig nikweisi lene niyai mingkiem bitindei ser no dima leu binhyepo nggimang ndigban bi. 40Gima rino jeni cem ma jiyai ngkiem bikwop mmun-njap lewo Munggwom Tungwatu Nipmot mikwei hanyen mem jam dino jingon ya mem Noni bi.”

Ningginausi tut awak nya ibou can

(Mat. 24:45-51)

41Lene Petrus hig ser Yesus “Andigpoi e, nihyet nibiti nindati dima mem nyeni e, he mem tungwatu nya yahagom e?”

42Yesus buhup “Tou rinok awak di ningon gom ba, ningon ki cem di niceu ndo noni nok nibou mem awak nindigsi nya leu binhyepo kwas njita tut yok igbit nok jam di noni preu ei su i? 43Gino noni pwoi niceu ningon kikau ug bipek njap di niceu nikwei hanyenti lene ningon nggei-hi-nggei. 44Ma jiyok ngon kep bipia niceu mikon awak dima ninyeng nok mindor mem nide ndigban hagom. 45Noro gino awak dima kan ‘Siceu ug bong ninno ba, mikwei hanyen bigyo’ lene noni sindi hwen bit awak nindigsi nya biyem njita ba, dut ndia ngei di pu noni. 46Gima rino niceu mittau hak kep noni hanyen mem nijam di ningon ya mem nikweisi bi kin njap dino noni kan tut bi. Leu api niceu mikos noni kukiau#12:46: Nipas kep mikos noni kukiau: Angig ayai kep Mat. 24:51. leu api noni mitug ndei hukum bit yo di ibit Allah nihyet bi nya.

47Awak dino kan tut niceu ningon kanti noro pwoi ningon ba, bit ningon kanti cem bi mitug ndei hukum dino ibui noni kinei-kinau. 48Noro awak di kan tut niceu ningon kanti bi ba, yai mun tunggwei di bindei dino ibui noni drek dip lene mitug ndei hukum nibui no nyahan he. Lewo bikwop no di Allah kwas mun nyeng mang bibor tut lene Noni yok ningon mem gima no dima yai midyai mem Noni. Gino Allah ba ningon com tungwagom tut mun nyeng mang bibor lene yok ningon mem gima no dima yai midyai nindig dor njiriek mem Noni.”

Ningginausi tut nibong kei nigwam keisi kin niba nitok biyamti

(Mat. 10:34-36)

49“Dikwei ei dihyeisi dini leu binhyepo dindig dihyeisi dini kep hum ba, dingon llei sut gikei gino hum dima njeng tu. 50#Mrk. 10:38 Ninghuisi wei nindig bibor micut igkep Da ei nidipti bu bidingon buhun tut kikau bibou cut igkep Da bingwig ug e! 51Jikan bipia dikweisi bindei ba, tungwatu nya ibong kei igwam kei e? E bi! Mibong kei migwam kei bi noro miba nitok biyam. 52Hon kep ammani kui ne ibou muhwi di itig imbier tut yam iba nitok biyam. Ibou ningai iba nitok bak ibou can lene ibou can iba nitok bak ibou ningai. 53#Mi. 7:6 Andigpoi nya iba nitok bak ipmot bat nya lene pinai nya iba nitok bak icig bat nya. Sindig nya iba nitok bak ipmisop bat nya lene sop nya iba nitok bak ipmem bat nya. Sop dino ignyot bat yam cem iba nitok biyam.”

Mun di ndo bindo tut nijam dini

(Mat. 16:2-3)

54Lene Yesus pai bak yo di imang bibor bipai “Tirigi jingat lo, bumbuhui ttau ei nite mpia nicutti binggai kep dihyeisi lene jipai biyam ‘Biget ri.’ Lene dem igbit jipaisi dima. 55Tirigi jingkek kan hou di kui jeti leu nite bei mpia nibiho lene jipai biyam ‘Mpia ngei ri.’ Lene dem igbit jipaisi dima. 56Jingon mang! Jitou kep dihyeisi kin mpia-bbed him lene bon jimbot kep tut mun di mipek kep mem je. Nggon rino bit bon jimbot kep tut mun di mipek kep mem nijam dini kan bi i?”

Ningginausi tut nikwam minggwen bit siceusi

(Mat. 5:25-26)

57“Nggon rino jikos tut mun di igbit mem jenti bi i? 58Gino jigom yai mun tunggwei sut hiter lene no dima kos tut bipia buwak je ug ei nikei noho bei drek dip lene ma jikum ningwam bijikrau yam nda ser nipou tirigi jiya ei nikei noho bei bigyo. Gi bi ne no dima mikes je ei nikei nindati leu api noni kes je ei yo di igya ser nya indati leu api jisima ei ig bui nsi. 59Ma jiyok ngon kep bipia yo di igya ser nya mikau dimbou ig bui leu je bi bibou jikum ningwam bingwig ug e.”

Currently Selected:

LUKAS 12: HAD

Highlight

Copy