NITRITI 9
9
Allah preu ei bit Nuh
1 #
Kej. 1:28
Lene Allah njei mun di kei bak Nuh kin nipmot bat nya bipai biyok “Ma jibon jimunggwom bat nya imang bibor leu binhyepo jide ni ntun him yamti di bram yam nya midigek kep dihyei nisurti-nipekti hagom. 2Ba, mindhe-ndhe nya kin ha nya kin wau nya hagom mittin tut je. Dikes hagom ei jindati bijinyeng tak kep yok. 3Hon kep ammani kui lene mun dima yok hagom minok jide mikwau noyam kin njita kioi di nimeng ngig-ngun di jiyem kep tu. Diyai gima yok hagom bije nok jide njita. 4#Im. 7:26-27, 17:10-14, 19:26; Ul. 12:16, 23, 15:23 Noro harin dima jiyem mikwau di ninggrom huisi a. Lewo niyaisi no jo ninggromti. 5Bikwop tungwatu kin mindhe di hwen tungwatu bimai lene midikes hukum nimai ei dip. 6#Kej. 1:26; Kel. 20:13 Lewo dipai tes tungwatu nya itta noyam kin Danti ditta. Gima rino tungwa tou rino hwen mun lene no dima mitug ndei nimai leu tungwatu nya drek dip.
7 #
Kej. 1:28
Ma jibon jimunggwom bat nya imang bibor leu binhyepo jide nintun him yamti di bram yam nya midigek kep dihyei nisurti-nipekti hagom.”
8Lene Allah pai bak Nuh kin nipmot bat nya, 9“Nogindini dibon Ditde gi preu bit nani kin yo di intun nani him bu. 10Ba, dibon gi preu dini bit mun di hei leu kibar nsi bit nani nok ha nya kin mindhe-ndhe nya hagom. 11Ditde gi preu pai bipia hon kep ammani kui lene midicok tut mun di ninnei tau nuhwap nsi nya ba, minyei di su bibor hwen yok bu bi sren. Midiba minyei di su nindig bibor bihwen dihyeisi dini bu bi sren. 12Mun di bindo tut gi preu di jo kikau di dibon bit jeni kin mun di nindigsi di niyaijo ei dihyeisi dini cem rinok, 13Ditde pwet di dikes ei bumbuhuiti. Pwet dima nok mun di bindo tut gi po dipreu ei bit mun di niyaijo ei dihyeisi hagom pima ri. 14Bikwop mpe dino dibindei ba, bumbuhui nggai kep mpia-bbed him lene pwet mijo nibreisi ba, 15diyok ngon kep gi preu po dipreu ei bit nani kin mindhe-ndhe hagom pima ba, minyei su buut kep dihyeisi bikot mun di ninnei tau nuhwap nsi bu bi sren. 16Mpe dino pwet jo nibreisi ei bumbuhuiti lene midingat gima bou diyai him apino midiyok ngon kep gi preu di bit bon ug hon nohonti bi sren di dipreu ei bit nani kin mun di niyaijo nya ei dihyeisi dini hagom. 17Pwet dima ne mun di bindo tut Ditde gi preu di dipreu ei bit mun di niyaijo ei dihyeisi ri.”
Nuh kin nipmot bat nya
18Nuh nipmot bat nya di ikinyon kwei leu kibar nsi inyeng rino Sem kin Yafet kin Ham. (Lene Ham yai nipmot Kanaan.) 19Nuh nipmot bat nya ibou ningai dini inok pung di tungwatu dihyeisi dini yahagom intun him.
20Nuh ne no di yai miai kan rin ba, noni rino yai miai ba anggur kioi di nimbie him ngat leu nindigsi nya. 21Mpe di gom tirigi noni dut ba anggur ningei rino pu no nindig bibor leu apino juk nide sinsun leu lene ba ningat ngu bibong lis ei nide prak meng nsi. 22Tirigi Ham dino Kanaan nicig ngat nicig ningat nguti bou niyai him lene noni hei leu prak meng bipai sut bak nikindig bat cin. 23Lene Sem Yafet nya iba inghim njei ban kep icig ningat nguti ei prak meng nsi lene ikiek yoho tai leu binhyepo ingat icig di ningat ngu dima bi. 24Mpe dino ba anggur pren leu Nuh ba, nibou ngwakti kwes hanyen leu api miap tut nipmot nipumiap niyai munti.
25Apino simbot dat bipai,
“Kanaan mitug ndei nisigion noti ba, nok awak mem nikindig bat nya.
26Jikwei ba, inggei sut tuhan di Sem de Allah. Kanaan minok awak mem Sem.
27Nna ba Allah bindei ba, Yafet de nintun him yamti di bram yam nya idigek bibor ba, ibong bit yo di intun Sem him. Kanaan minok awak mem Yafet.”
28Niabiati minyei di su bibor pima pingge leu dihyeisi tu lene Nuh niyaijo ei ari bingwam sratus ningai ningot muhwi bu. 29Nide njap ug ei ari bingwam sratus muhwindatai ningot muhwi ug api noni mai.
Currently Selected:
NITRITI 9: HAD
Highlight
Share
Copy
Want to have your highlights saved across all your devices? Sign up or sign in
