NITRITI 50

1Lene Yusuf nggriou nicig ningut bimei ningyoi leu api pim biniyai nggwei kibor. 2Lene noni cuk yo di itin ei nimai ngut igkei nya leu binhyepo iba biei ngat di ninghap ui-gwang kei binggai nicig ningut. 3Lene inggai kep nimai ngut dima mem mmun-njap ningot bitai. Lewo igyai kepti dino iba minyahas kin biei ngat di ninghap ui-gwang kei nggai kep nimai ngut hagom yem nijam di jei nok gima. Lene timiei minu Mesir nya ingon ngguk bram nimai dima mem mmun-njap ningot muhwindacan.

4Tirigi nijam mem ingon ngguk bram nimai ngwig leu su lene Yusuf sok nihyet ei yo di igya kui Firaun dip bipai “Ma jipai bak nibou ndig, 5#Kej. 47:29-31 ‘Tirigi dicig mai bigyo lene noni sok kep da ngkiem bipia suar duug tig ningut ei hak mihyeti di noni tin ei su ei minu Kanaan. Gino Firaun sindui sut da bikes da lene duug tig dicig ningut ei sirima leu api midikwei hanyen yo.’ ”

6Lene Firaun ce bipai “Aug hak ug ba, atig acig ningut bit leu nok apreu ei mem noni tu.”

7Gima rino Yusuf ug bitig nicig ningut. Noni hei sut yo di igya kui Firaun kin andigpoi nya di ibong bit noni kin timiei minu Mesir nya di inyeng jei nya. 8Kin nide bat nya kin nikindig bat nya kin nikinjoi kin nicig nide ig bei nsi nya yahagom. Noro ikes ide munggwom ngwoi nya kin ide mindhe-ndhe nya bigwam ei Gosyen. 9Nide nimpung tentara di ibri kroba pran kin gi hi di ibri kuda cem ibit noni ba, yahagom injei bram yam ba, imangti nipmem ngat.

10Tirigi ikwei krau gumihyep di tungwatu nya ibui gandum ngan eisi ei Goren-Haatad ei Yordan nyai nite dima ug lene ipim kui jei sut nimai. Lene Yusuf bon midut ningon ngguk ei mpia dima kikau mem mmun-njap muhwindacan. 11Mpe dino timiei minu Kanaan nya imiap igbit ighyet di ipimti ei Goren-Haatad lene ipai biyam “Mben Mesir dima yok ita ibou ei gi ibon midut ningon di ngguk bram nimai ba, tot nyeni ingonti.” Gima rino ijem mpia dima ninyeng Abel-Mizraim.

12Gima rino Yakub nipmot bat nya igyai hagom bit leu nok nicuk yoti. 13#Kis. 7:16 Ba, ikon ningut biyuug sut ug ei minu Kanaan leu api itig nimai ngut ei hak mihyeti Makhpela di jo dideu Mamre nite bei mpia nipriti ei hanjop nsi po Abraham pek leu Efron di timiei minu Het leu binhyepo tig nide nimai nya eisi pima. 14Niabiati tirigi Yusuf tig nicig ningut leu su lene noni kin nikindig bat nya kin nikinjoi kin yo di ibit noni tut nitig nimaisi yahagom ingkwei hanyen ug ei minu Mesir.

Yusuf biwin kep nikindig bat nya ingonti

15Niabiati tirigi icig mai leu yok tu lene Yusuf nikindig bat nya ihig yam “Gino Yusuf no ningon sibui sut nye bibirop binye drek dip mun di ibon tunggwei sut noni lene notou mem nye i?” 16Gima rino isok ighyet bak noni bipai bak “Andigpoi e, nipou tirigi icig mai leu nye bigyo lene, 17noni pingok nyeni ningonti nok gini. Suar nahara bina leu binhyepo akos ser nyende sisar di nibon tunggwei sut na. Gima rino nibon nyenti nok awak mem icig de Allah ba, ma akos ser mun di nibon tunggwei sut na pima hak ug.” Tirigi Yusuf miap ighyet di isok kwei binoni lene noni pim ba, niyai nggwei kibor.

18Lene nikindig bat nya ikwei om yo ei nimig him ba, iba ingwak bikik mpia lene ipai “Nikuk nye bininok ade awak nya hak ug.”

19Noro Yusuf buhup “Dwai! Jingon digit tut da au. Bit bon diya luei Allah nohoti kan bi. 20Mbro nok gino jiyok jingon gom mem gima jimbuk tut da pima lo, Allah bindei jide mun di mbuk dima bie ug ei mun di kei biborti. Leu binhyepo Noni binyohou tungwatu nya imang bibor bimai bi tug hon mun di cut igkep da. 21Gima rino ma jingon digit tut bu au. Lewo midinyohou je kin jimunggwom bat nya cem kikau.” Nok gima lene noni biwin kep ingonti tug hon nihyet di nggriu di tot ingonti.

Yusuf nimaisi

22Lene Yusuf bong gingga ei minu Mesir bit nide bat nya. Nide njap ug ei ari bingwam sratus gom simnai. 23Niyaisi jo bibou noni ngat Efraim nipmot bat nya kin nignyon bat nya bou niyai him bingat Manasye nipmot Makhir nimunggwom bat nya cem bou niyai him bu bipingok ingonti dem kep nok nonti nimunggwom bat nya. 24Lene noni pai bak nikindig bat nya kin nikinjoi “Son dideu diyaijo ningwig honti tu. Noro dikan tut mungkun bipia Allah minyohou je bibuwak je leu minu dini bibie tut je hanyen ug ei minu di Noni ba neheng bipreu ei bit Abraham kin Ishak kin Yakub tu.” 25#Kel. 13:19; Yos. 24:32; Ibr. 11:22 Lene Yusuf cuk nide bat nya yahagom bipai “Ma jipreu ei mem da bipia tirigi Allah bie tut je bijingkwei hanyen ug ei minu dima lene ma jiket dinjum ba, juug sut.” 26Yusuf de njap ug ei ari bingwam sratus gom simnai leu api noni mai ei minu Mesir. Lene yo di itin nimai ngut kan nya inggai kep ningut leu api ikon bikes ei brua nsi.

Currently Selected:

NITRITI 50: HAD

Highlight

Copy