NITRITI 45

Yusuf mbot kep tut ninyeng bak nikindig bat nya kin nikinjoi

1 # Kis. 7:13 Lene bit bon Yusuf om ningon ei nide awak nya igyai him bu kan bi. Gima rino noni cuk yok ug ei nisai leu binhyepo tirigi noni mbot kep tut ninyeng brei bak nikindig bat nya kin nikinjoi lene timiei minu Mesir nya itou kep noni bi. 2Yuug ei nisai leu su lene Yusuf pim ba, niyai nggwei kibor apino timiei minu Mesir pima yok imiap leu api ninghapti tibim kikau ug bipek Firaun ei nide ig bei nsi. 3Lene Yusuf mbot kep tut bak nikindig bat nya kin nikinjoi bipai “Dani ne Yusuf pima ri. Dicig no niyaijo yo e?” Noro bit bon yoni ibuhup kan bi lewo ingon ttin bibor. 4Lene noni pai biyok “Jikwei ya bit da.” Tirigi ikwei ya bit noni lene noni ndat kep mbigom kin bu bipai “Dani ne jikinjoi kieti di Yusuf po jitri nok awak ug ei minu Mesir pima ri. 5Ma jingon ku je ba, jidigit tut gi po jitri da nok awak pima bu au. Lewo ningat ne Allah buwak da bibie kwei ei mpia dini leu binhyepo dinyohou tungwatu nya imang bibor ser nhyepo imai inggum bi. 6Lewo ninggum di kinei bibor dini mbut ei ari bingwam nitindur can he yo. Lene nikenti ari bingwam nitindur muhwi bu tirigi bit bon tungwatu nya igyai miai kin njita ngat ningat cem kan bi no jo yo. 7Allah buwak da kwei bibie mem je leu binhyepo diteu je bijingwes ngun tug hon Nide puig dibindei bijinggap leu tut dini. Nok apino mijimai jinggum bu bi. 8Gima rino jo nibreisi bipia jeni rino jibindei di dingat rin ei mpia dini bi noro Allah rino buwak da kwei a. Ba, Noni rino bindei dino Firaun kon dinyeng bijo nai dor njiriek yo di igya kui noni nindigsi nya yahagom. Dinyeng tak kep timiei minu Mesir nya yahagom kin minu dini hagom.

9 # Kis. 7:14 Nogindini ma jibrim jimig bijingkwei hanyen ndam dicig bijipai igbit mun di disok ei je dip dini bipia Allah kon dinyeng bidinyeng tak kep minu Mesir nisurti-nipekti hagom tu. Ma noni kwei ngat da haninyai lene ma binyen au. 10Midipek hanjop nsi binoni ei Gosyen leu binhyepo noni kwei bong dideu da. Noni kin nimunggwom bat nya kin nide mindhe-ndhe nya kin nide mun di ninyeng tak kep nya hagom. 11Gino arig bong dideu da ei Gosyen lene midinyohou noni nok gi kei. Lewo ninggum nijam di kinei bibor mimbut kikau ei ari bingwam nitindur muhwi bu. Midibrim dingkek leu binhyepo arig kin nide bat nya kin nide mindhe-ndhe nya yahagom imai inggum bu bi.”

12Lene Yusuf binut bu bipai “Nogindini jahagom bitut Benyamin cem jingat bou jiyai him bipia dani ne Yusuf pima ri. 13Gima rino ma jipui sut ditde nisindemti nya ei minu Mesir dini bitut mun di jingat bou jiyai him hagom bak dicigya. Lene ma jibipbur ba, mijibuwak noni hanyai kwei.”

14Lene noni nggriou nikinjoi Benyamin bipim biniyai nggwei kibor. Lene Benyamin cem nggriou Yusuf bipim biniyai nggwei kibor bu. 15Lene Yusuf ba nipim nggriou nikindig bat nya bimei yahagom ingyoi. Gima ngwig leu lene imbrap bit noni bu.

16Lene tirigi Yusuf ninghapti tibim kin nikindig bat nya kin nikinjoi ikweisi bak Firaun ei nide ig bei nsi lene noni kin yo di igya kui noni yahagom ingon llei bibor. 17Lene noni pai bak Yusuf “Acuk ade bat nya bipia ikon gandum ngan bikes ei ide keledai nya dip bingkwei hanyen bu ug ei minu Kanaan. 18Lene ma ibuwak icig kin ide bat nya yahagom kwei ei minu Mesir. Midipek dihyei hanjop nsi di kei-kau ei minu dini biyok apino yoni ibong kei igwam kei. 19Acuk yok ba, ijem kuda nya di ibrim kroba leu minu dini leu binhyepo ibinyohou ttei itnem bat nya kin imunggwom bat nya kin icig kwei. 20Ma ingon ku yok tut mun di suar ikes bihigom bijo ei itimieisi au. Leu mbigom bu ne yoni minyeng tut ndigban di kei-kau dor njiriek bu ei minu dini.”

21Lene Yakub nipmot bat nya igyai hagom bit leu nok Firaun nicuk yoti. Yusuf yai kroba nya bit leu nok nibou ndig nicuk noti bitut njita di igyem kak puig sinon cem biyok. 22Lene noni yai sinsun nitindur di nijep bak bikwop nikindig bat nya yahagom noro yai sinsun nitindur muhwi kin mitiei perak nitig sratus ningai bak Benyamin. 23Lene kes keledai ningut simnai bimbut tut ndigban di kei-kau leu minu Mesir kin keledai ningut simnai bu bimbut tut gandum ngan kin roti kin njita hiter bu hagom cem bak nicig leu binhyepo yem kak puig sinon. 24Lene noni kes yok bimbut ba, sok kep yok bipai “Ma jingon nso jenti tut ba, jihyet srou kui yamti hapuig au.”

25Lene ijo leu minu Mesir bingkwei hanyen ndam icig ei minu Kanaan. 26Lene imbot kep tut Yusuf binoni bipai “Yusuf no niyaisi jo yo! Noni ne nibou di ninyeng tak kep mben Mesir nisurti-nipekti hagom ri!” Noro Yakub ntu kep ninghuisi tut ba, gi mbun ba ningon com ighyet kan bi.

27Tirigi isimbot kep tut Yusuf nipaisi nya pima hagom binoni tu leu api noni ngat kroba nya di Yusuf pinak kwei mem gima buwak noni ug ei minu Mesir hagom tu lene ningon llei. 28Lene noni simbot dat “Sipmot Yusuf no niyaisi jo yo! Gima rino singon llei sut a! Suug ngat noni nipou tirigi simai bigyo.”

Currently Selected:

NITRITI 45: HAD

Highlight

Copy