NITRITI 41

Yusuf mbot kep tut Firaun de mun di mumpriem

1Ari bingwam nitindur can ngwig leu lene Firaun bong bimumpriem nok gini. Mpe di gom lene noni ya niyati simiak Minyei Nil, 2bingat sapi di pap-nap kei di ningkek dia kei ningut muhwindacan di ikiju kros leu minyei jousi kwei bimbut mam bei bigyem abris meng. 3Jei bi lene sapi di ninggang bai di kinei-kinau nya ningut muhwindacan bu ikiju kros leu minyei jousi kwei bram bigya kui gi hi di pap-nap kei pima yok. 4Lene sapi di ninggang bai di kinei-kinau nya igyem gi hi di pap-nap kei nya hagom bingwig ug. Lene Firaun da niyai bikiju. 5Lene noni bong mai hanyen leu api mumpriem gi nimbican bu tut gandum nibou di mpung kei ningat muhwindacan di ntun ninjem gom him. 6Lene gandum nibou di ngoi-nga bibor ningat muhwindacan ntun him bu lo, hou iggum ndigsi bindei bimui bingak cai. 7Lene gandum nibou di ngoi-nga nya pinde gi hi di mpung kei nya bingwig. Lene Firaun da niyai hanyen bikan bipia noni mumpriem. 8#Dan. 2:2 Njap di hyep bu rino ningon ku no tut. Gima rino nduk yo di nung kui yok nya kin yo di ingon ki nya di ibong ei minu Mesir yahagom kwei. Lene noni pui sut nide mun di mumpriem dima biyok noro bit bon hi mbot kep tut mumpriem dima kan bi.

9Lene nibou mem ba anggur ngei pima pai bak Firaun “Aye! Sindi diyok ngon kep mun po dibon tunggwei sut gi nipou pima. 10Lewo tirigi po na di Andigpoi angon sibui sut dani kin nibou mem roti leu api acom nye ug ei ig bui nsi di jo ei ig bei di no di nok nibou mem yo di igya ser na di Andigpoi nide pima, 11lene nahacem nibong binimumpriem mem mmun gom noro mun di nimumpriem tut hacem bon nisinati di ter leu yam. 12Lene nipui sut mun di nimumpriem tut dima bak mben Ibrani gom di nok awak mem nibou mem yo di igya ser nya lewo noni sima ei ig bui nsi bit nye. Leu api noni mbot kep tut mumpriem nya binye. 13Ba, dem igbit nimbot kepti pima tu. Lewo na di Andigpoi ata da hanyen nok nibou mem ba anggur ngei lene akes hukum nimai ei nibou mem roti dip.”

14Lene Firaun sok nihyet mem ibuwak Yusuf kwei leu ig bui nsi. Niabiati noni kak nuhui nta ba, juk sinsun di pwoi kei tu lene kwei ya ei Firaun noho bei. 15Lene Firaun pai binoni “Dibong bidimumpriem noro bit bon hi mbot kep tut mumpriem dima bida kan bi. Tungwagom pai anghapti bida bipia ambot kep tut mun di imumpriem nya kan.”

16Lene Yusuf buhup “Andigpoi e, dani ne bi noro Allah mimbot kep tut nok igbit bina di Andigpoi.”

17Lene Firaun pui sut nide mun di mumpriem bak Yusuf “Mpe di gom lene diya diyati simiak Minyei Nil. 18Lene dingat lo, sapi di pap-nap kei nya ningut muhwindacan ikiju kros leu minyei jousi kwei bimbut mam bei lene igyem abris meng. 19Jei bi lene sapi di ninggang bai di kinei-kinau ningut muhwindacan bu ikiju kros leu minyei jousi kwei bram gi hi dima. Dingat sapi di kinei bibor nok gima hi bou diyai him ei minu Mesir nisurti-nipekti hagom bigyo. 20Lene sapi dini yok igyem gi hi di pap-nap kei nya hagom bingwig ug. 21Gima hagom nok noro sapi di ninggang bai di kinei-kinau ikinei-kinau nok gi nipou pima. Lene dida diyaia. 22Lene dibong mai hanyen bidimumpriem bidingat lo, gandum nibou di mpung kei ningat muhwindacan di ntun ninjem gom him. 23Lene gandum nibou di ngoi-nga di mpia wam bikinei ningat muhwindacan di ntun him bu ba, hagom mbris. 24Lene gandum nibou di ngoi-nga pinde gi hi di mpung kei nya bingwig. Dipui sut mun di dimumpriem dima bak yo di nung kui yok noro bit bon hi mbot kep mingat bida kan bi.”

25Lene Yusuf buhup “Andigpoi e, mun di amumpriem tut dima hacem nimbot kepti gom ngat he. Lewo Allah mbot kep tut ningon kanti bina di Andigpoi. 26Lewo sapi di pap-nap kei nya ningut muhwindacan kin gandum nibou di mpung kei ningat muhwindacan hacem bindo tut ari bingwam nitindur muhwindacan ba, hacem bon nisinati gom ngat he. 27Lene sapi di ninggang bai di kinei-kinau ningut muhwindacan kin gandum nibou di ngoi-nga bibor ningat muhwindacan hacem bindo tut ari bingwam nitindur muhwindacan bu tirigi ninggum di kinei bibor mihwen nye. 28Bit leu nok gi dipai bina di Andigpoi ri. Allah mbot kep tut ningon kanti bina di Andigpoi tu. 29Lewo jei bi lene njita hagom ei minu Mesir minnum kei biyai ningat mang bibor kikau mem ari bingwam nitindur muhwindacan. 30Noro niabiati bu lene ninggum di kinei bibor mihwen nye apino tungwatu nya mingon prion ser ari bingwam nitindur muhwindacan bitut njita di nnum kei pima. Lewo ninggum di kinei bibor dima mibindei ba, njita ei minu dip dini hagom mui bingwig. 31Ninggum di kinei bibor dima mihwen tungwatu nya apino yahagom ingon prion ser ari bingwam nitindur muhwindacan bitut njita di nnum kei di igyem bingwig leu su. 32Na di Andigpoi amumpriem mbican tut mun di bon nimbot kepti gom ngat he lene gini bindo tut bipia Allah kos tut ningon kanti tu leu api noni mibindei ba, jei bi lene hagom cut igkep nye.

33Gima rino ma na di Andigpoi ando tungwagom di ningon ki ba, kan tut mun dima yai cem leu binhyepo ninyeng tak kep midyai nya ei minu dini hagom. 34Ma na di Andigpoi ando nibou nya di migya kui nani cem ba, ayai nisindemti biyok leu binhyepo idimig ade limwa nya ide njita ningat can leu ningot gom ningat can leu ningot gom lene nok tirigi ari bingwam nitindur muhwindacan di kei nya ngwig leu nye bigyo. 35Ma akes ahyet biyok leu binhyepo imbus njita dima hagom keyam binju gandum njep ug ei ig gudan bousi bidem minu ndig bigya ngkiem ser sri bibou ari bingwam nitindur muhwindacan di kei bibor dima ngwig ug e. 36Gima rino njita dima yok hagom nok mun di bahati tut timiei minu Mesir nya yahagom mem ari bingwam nitindur muhwindacan di biang ninggum di kinei bibor ei nidipti bu. Leu binhyepo timiei minu Mesir nya imai inggum bi.”

Firaun kon Yusuf nok nibou mem mben Mesir

37Lene Firaun kin yo di igya kui noni yahagom ice tut Yusuf nihyet. 38Leu api Firaun pai biyok “Bit bon inggok bingat no di ningon ki dor njiriek Yusuf kan bi lewo Allah Ninnei bie tut noni.” 39Gima rino Firaun pai bak Yusuf “Allah mbot kep tut mumpriem dini hagom bina tu. Jo nibreisi bipia angon ki ba, angon gom dor njiriek yo di nindigsi nya yahagom. 40#Kis. 7:10 Gima rino dikon nani nok nibou ba, anyeng mitak kep midyai nya ei minu dini hagom. Suar ditde limwa nya yahagom ibit acuk yokti nya hagom. Dangkom dinyeng jei dor njiriek na. 41Ditri tut bipia hon kep ammani kui lene dindo nani nok nibou di ninyeng tak kep mben Mesir.” 42#Dan. 5:29 Lene Firaun juk nide srak mas nimien di cap ninyeng tak kep joti leu ninda pijum bibijuk Yusuf ninda pijum. Lene noni juk sinsun ndok di jei di nggriu-nggrop di nibok kak bibor ei noniti biyai mimau mas bisrou nikimam. 43Noni ndo kroba pran gi nican bitut kuda nya di ibrim tut nok Yusuf de bibri bigwam dip leu api yo di igya ser nya di igya kui noni ibie noho ba, ijem bak yo di ingwig kep Yusuf bipai “Jitti bileu o! Jitti bileu o!” Lene nok. Gima rino Firaun ndo Yusuf nok nibou di ninyeng tak kep mben Mesir. 44Ba, Firaun pai binoni “Mbro nok gino danti rino nibou ndig mben Mesir lo, ditri tut bipia gino na di Yusuf ace tut bi lene bit bon timiei minu Mesir nya yahagom igyai mun nyeng hi kan bi.” 45Lene Firaun ba nihyet mben Mesir bijem Yusuf ninyeng Zafnat-Paaneah bu bindo misop Asnat binoni nok nitnem. Misop dini nicig ninyeng Potifera di yai midyai nok imam ei minu ndig Heliopolis. Lene Yusuf mbut bidem minu Mesir nisurti-nipekti hagom.

46Mpe dima lene Yusuf de njap ug ei ari bingwam ningot ningai ba, kindi yai midyai nok nibou di ninyeng tak kep mben Mesir. Noni hei-hei nyen leu Firaun noho bei bingig niyai kep minu Mesir nisurti-nipekti hagom. 47Ei nijam ari bingwam nitindur muhwindacan dima lene njita ei minu Mesir hagom nnum kei biyai ningat nindig bibor di ntun him. 48Lene Yusuf de limwa nya imbus njita nindig bibor dima hagom bikon ug ei ig gudan bousi bidem minu ndig nya. Imbus njita di kwei leu miaisi nya ei nisai nya bikwop minu ndig bikon hagom ug ei ig gudan bousi nya. 49Gandum ngan di imbus keyam dima kum eisi nindig bibor ba, bit bon Yusuf kwop nide kilo nimangti kan bi. Lewo nimangti dem kep iggum ei muk nipimat nimangti.

50Nipou tirigi ari bingwam di biang ninggum di kinei bibor pima tau kep yok bigyo lene Asnat yai nipmot bat ibou can bak Yusuf. 51Lene Yusuf pai “Allah bindei bisingon prion ser nijam po tungwatu nya kin sicig nide ig beisi nya ihwen bit sa pima tu.” Gima rino jem nipmot mighumbou ninyeng Manasye. 52Lene noni pai bu “Allah yai simunggwom bat nya bisa ei minu di sisima hukum mikuisi eisi dini tu.” Gima rino jem nipmot ndrim ninyeng Efraim.

53Lene ari bingwam nitindur muhwindacan di biang njita nindig bibor kwei ei minu Mesir ug hon nohonti tu. 54#Kis. 7:11 Leu api ari bingwam nitindur muhwindacan di biang ninggum di kinei bibor sindi tau kep yok bu bit leu nok Yusuf nimbot kepti pima. Njita mui bingwig ei dihyeisi dini hagom ug bipek minu nohon keti. Noro njita nikenti nindig bibor jo bidem minu Mesir hagom. 55#Yoh. 2:5 Tirigi ninggum sindi hwen timiei minu Mesir nya lene yahara Firaun noro noni cuk yok leu binhyepo yuug ngat Yusuf bibit nicuk yoti. 56Ninggum di kinei bibor sindi kieng kep mben Mesir yahagom. Gima rino Yusuf kau dimbou leu ig gudan bousi nya hagom bitri gandum ngan bak timiei minu Mesir nya. 57Ngkiai nya bidem dihyei nisurti-nipekti hagom ibipbur kwei ei minu Mesir leu binhyepo ipek gandum ngan leu Yusuf lewo ninggum di kinei bibor hwen dihyeisi dini hagom.

Currently Selected:

NITRITI 41: HAD

Highlight

Copy