NITRITI 35
35
Yakub nya ingkwei hanyen ug ei minu ndig Betel
1 #
Kej. 28:11-17
Mpe di gom bu lene Allah pai bak Yakub “Dani ne Allah ri. Dittau kep na tirigi po anang leu akindig Esau pima. Ma angkwei hanyen ug ei minu ndig Betel ba, abong ei sirima lene ma adingug tig binok nimbar hum dok mem Da.”
2Lene Yakub sok kep nide bat nya kin nide limwa nya yahagom bipai biyok “Ma jicom ngkiai ide kwar di ikuk yok bak di jipwoi-pwoi nyen leu ba, jibon midut di bindo bipia jingon kwes hanyen leu api ma jijuk sinsun di pwoi kei. 3Lewo nyeni imbut rin bingkwei hanyen ug ei minu ndig Betel ba, ei sirima mididingug tig binok nimbar hum dok mem Allah di nyohou da mpe di po mun di buhun cut igkep da pima. Noni ningat rin bit da kikau bidem dimbutti nya hagom.” 4Lene yoni ikes ngkiai ide kwar pima yok kin ide mitingou him hagom ei Yakub nindati leu api noni tig hagom ei dihyei jou hammi biei nindig bibor gom nikiou dideu minu ndig Sikhem.
5Tirigi Yakub kin nipmot bat nya yehei sut ide bat kin ide limwa nya bimbut rin lene Allah bindei ba, timiei minu ndig di gahai nya yahagom inghuisi mpig sut nindig bibor apino tungwa hi huk bram Yakub nya bi. 6Lene Yakub nya yahagom ikwei krau minu ndig Lus di ninyeng hi bu minu ndig Betel ei minu Kanaan. 7Lene Yakub dingug tig binok nimbar hum dok ei sirima bijem ninyeng “El-Betel” lewo Allah ndo Nonti brei binoni ei sirima tirigi po noni nang leu nikindig pima. 8Mpe dima lene Debora di Ribka nipmem mien di nyohou noni nide njap ngwig hon ei sirima. Leu api itig ei biei nindig nikiou dideu minu ndig Betel nite bei mpia nibiho. Gima rino tungwatu ijem biei njem dima Biei Nipim.
Allah njei mun di kei bak Yakub ei minu ndig Betel
9Niabiati Yakub kwei hanyen leu Mesopotamia lene Allah ndo Nonti bak noni mbigom kin bu binjei mun di kei bak. 10#Kej. 32:28 Lene Allah pai binoni “Anyeng rino Yakub bu bi. Hon kep ammani kui lene anyeng rino Israel.” Nok rino Allah jem Yakub ninyeng Israel. 11#Kej. 17:4-8 Lene Allah pai binoni “Dani ne Allah Di Sindem Bibor ri. Suar abon yo di intun nani him imang bibor! Ei nidipti bu lene keret nya mintun nani him ba, anok pung di nibou ndig nya cem intun him. 12Diyai minu po diyai bak Abraham kin Ishak nipou su dini hagom binani bu leu api yo di intun nani him mporo migyati nok ide minu ninda rom.” 13Lene Allah kes Yakub ei. 14#Kej. 28:18-19 Lene Yakub tas tig gom pijum nok tig nibiyok ngon kep ei mpia di Allah mbrap bit noni pima. Leu api noni huug ba anggur ngei kin mini zaitun ei tig dima dip bipiga ei mem Allah. 15Leu api jem mpia dima ninyeng minu ndig Betel.
Rahel de njap ningwig honti
16Lene Yakub kin nide bat nya yahagom ijo leu minu ndig Betel biyuug ei Efrata. Tirigi yoni yuug krau Efrata bigyo rino Rahel di tta buhun ninghim dut ei puig sinon lo, nimunggwom kinai ei ninghopti. 17Tirigi ninghim dut nindig bibor lene sop di mpu noni pai bak “Anghuisi mpig sut au lewo agwam tut nipinai hi kin bu ri.” 18Noro Rahel de njap ngwig hon ug rin ba, tirigi ningon tai-tai bou lene jem nipmot ninyeng Ben-Oni. Noro nicig jem ninyeng Benyamin.
19Niabiati tirigi Rahel mai leu su lene nide bat nya itig ei simpak di bie ug ei Efrata ninghas him bijem mpia dima ninyeng Betlehem. 20Lene Yakub tas tig gom pijum nok tig nibiyok ngon kep hammi nitnem nijui dip leu api tig dima no jo nok bindo kikau kwei bipek ammani kep. 21Gima ngwig lene Yakub nya imbut kikau ba, yohok prak meng yati ei ig di timiei minu ndig dima ibon ninggre di jo-jo yam dip anai di, ijem ninyeng Eder nite dimag ug. 22#Kej. 49:4 Tirigi ibong ei sirima lene Ruben cut tut nicig nitnem ndrim Bilha. Tirigi nicig miap ninghapti tut lene ningon sibui sut Ruben nindig bibor.
Yakub nipmot bat nya
(1Taw. 2:1-2)
Lene Yakub yai nipmot bat nya ibou simnaibrimigcan. 23Lea yai nipmot mighumbou Ruben kin Simeon kin Lewi kin Yehuda kin Isakhar kin Zebulon yoni bak Yakub. 24Lene Rahel yai nipmot bat cin Yusuf kin Benyamin yoni binoni. 25Lene Rahel de sop di awak Bilha yai nipmot bat cin Dan kin Naftali yoni binoni. 26Lene Lea de sop di awak Zilpa yai nipmot bat cin Gad kin Asyer binoni. Nitnem bat nya igyai nipmot bat dini yok binoni ei Mesopotamia.
Ishak de njap ningwig honti
27 #
Kej. 13:18
Lene Yakub ug ngat nicig Ishak ei nibongti ei Mamre gi dideu Hebron. (Yakub nignyon Abraham cem bong ei sirima nipou su.) 28Ishak de njap ug ei ari bingwam sratus gom ningot muhwindaningai. 29Ninghim koi bibor leu api nide njap ngwig hon ei sirima. Lene nipmot bat cin Esau kin Yakub itig.
Currently Selected:
NITRITI 35: HAD
Highlight
Share
Copy

Want to have your highlights saved across all your devices? Sign up or sign in