NITRITI 12
12
Allah hig Abram
1 #
Kis. 7:2-3; Ibr. 11:8 Lene tuhan pai bak Abram “Ma ajo leu atimieisi ba, akes ade bat nya kin acig de ig bei nsi ei leu api aug ei minu di midindo binani yo. 2Leu mporo midibindei ba, ade nintun him yamti di bram yam nya idigek kep mpia binok mben nindig bibor. Ba, midinjei mun di kei bak nani bidibindei ba, ayai anyeng di jei. Leu api yo di imang bibor mitug ndei mun di kei tug hon nani.
3 #
Gal. 3:8
Midinjei mun di kei bak yo di injei mun di kei bak nani. Noro midisigion yo di isigion nani bu. Midinjei mun di kei bak mben dihyeisi dini hagom tug hon nani.”#12:3: Nipas kep Midiyai ... tug hon nani cem kei lene nipas kep Mben dihyeisi dini hagom miyahara Da leu binhyepo dinjei mun di kei bak yoni noyam kin gi po dinjei mun di kei bak nani cem kei.
4Tirigi Abram de njap ug ei ari bingwam ningot muhwindacan ba, muhwi lene noni jo leu minu Haran bit leu nok tuhan nicuk noti lene Lot cem bit. 5Noni buwak nitnem Sarai kin nikinjoi nipmot Lot bitut nide ndigban kin awak nya di noni nyeng tut ei minu Haran ba, hei sut yok biyuug ei minu Kanaan.
Niabiati yahagom yuug krau minu Kanaan tu lene, 6Abram ya bidem minu dima ba, ngig niyai kep minu dima buug krau biei pigig triti di ninyeng More di timiei minu Sikhem nya ipigig ser mem ide kwar di ikuk yok bak nya. (Mpe dima lene mben Kanaan igya bidem minu dima hagom.) 7#Kis. 7:5; Gal. 3:16 Lene tuhan ndo Nonti bak Abram bipai binoni “Minu dini ne minu di mporo midiyai bak ade nintun him yamti di bram yam nya ri.” Lene Abram dingug tig nindig bijo-jo yam dip nok nimbar hum dok mem gima binggei sut tuhan di ndo Nonti bak noni. 8Lene noni jo leu sirima buug ndam mpia nibiho ei cet him ei minu ndig Betel kin Ai ikieti ba, hok nide prak meng ei sirima. Betel jo ei nite bei mpia nicutti lo, Ai jo ei nite bei mpia nipriti. Noni dingug tig nindig bijo-jo yam dip bu ei sirima bingon nimbar hum dok leu api bikuk no bak tuhan. 9Lene noni bong-bong nyen kak puig sinon ndam minu Kanaan nibiho.
Nijam di Abram ningat rin ei minu Mesir
10Mpe dima lene ninggum nindig bibor hwen minu Kanaan hagom apino Abram nya yuug ei nite bei mpia nibiho kikau ug ei minu Mesir bibong ei sirima bibou ninggum pima kes leu ug e. 11Noro tirigi ikwei pigau minu Mesir de minu niya kwas yamti lene Abram pai bak nitnem Sarai “Nani ne sop di ubbu ri. 12Tirigi mben Mesir ingat ade nuubbuti lene mikan tut bipia ditnem rinani. Lene yoni migyai nimai bida lo, misindui sut nani ba, ayaijo. 13#Kej. 20:2, 26:7 Gima rino ma apai hak biyok bipia akijam ridani. Leu binhyepo ingon kei sut da ba, migyai nimai bida leu na bi.” 14Tirigi ipigau minu Mesir de minu niya kwas yamti tu lene timiei minu dima ingat lo, Sarai ne sop di ubbu ri. 15Lene yo di igya kui Firaun cem ingat lo, Sarai ne sop di ubbu rin leu api inga leu sut bak Firaun. Gima rino ibuwak Sarai ug ei Firaun de ig bei nsi. 16Lene nibou ndig Firaun ningon kei sut Abram drek dip Sarai leu api njei mun di kei di nok awak pinai nya awak sop nya domba nya kin kambir nya kin sapi nya kin keledai nya kin unta nya hagom bak.
17Noro tuhan kes ninggwen di buhun bibor bihwen Firaun kin nide ig bei nsi yahagom drek dip gi noni buwak Sarai di Abram nitnem. 18Lene Firaun sok nihyet mem Abram bikwei ngat noni bihig ser noni “Aris bida tut nggon i? Nggon rino apai sut Sarai bipia noni ne atnem rin bi i? 19Nggon rino atri tut bipia noni ne akwohop rin ba, asindui sut da bidibuwak noni nok ditnem i? Sop dima atnem ri! Abuwak noni hak ba, juug leu sirini!” 20Lene Firaun cuk yo di igya kui noni ba, ijji Abram nitnem yoni bitut ide mun di inyeng tut nya hagom leu minu Mesir.
Currently Selected:
NITRITI 12: HAD
Highlight
Share
Copy
Want to have your highlights saved across all your devices? Sign up or sign in
