Mathiu 9

1kɔ bȧkȧ ka abil, ɔ fǝsi romɔri, kɔ der ka kȧpet kɔŋ. 2Kaŋ kȧrȧ ulaŋgba ro ŋɔŋ ugbɛthkɛ ɔ fǝntha rǝ kǝfǝnt. Ma Yisɔs ɔ nənk kȧlanɛ ka ŋaŋ-e, ɔ pa ka ɔlaŋgba, Wan, bȧk kǝbuth. A po tera mu ɛhakɛ ɛ mu. 3Ka aŋkarmɔkɔ alɔm aŋ pa ka ɛmerȧ yaŋ, Ɔlaŋgba ɔwe ɔ thunthǝra Kuru. 4Ma Yisɔsȧŋ ɔ tȧrȧ ɛnanɛ yaŋ-e, ɔ pa, To pǝ som mǝ nǝ nanɛ ɔlǝs ka ɛmerȧ ɛ nu-e? 5Rǝ reke tha yi rǝfɔi tai-e, tǝ kǝpa, A po tera mu ɛhakɛ ɛ mu, thalɔm tǝ kǝpa, Yokanɛ, mǝ kɔth-e? 6Kɛrɛ kȧmȧ nǝ tȧrȧ kǝpa ɔWan ka wuni ɔ ba afɔsɔ nɔru tǝ kǝtera wuni ɛhakɛ-e, (kɔ pa ka ɔwe po gbɛthǝkɛ-e) Yokanɛ, mǝ gbasi kafǝnt ka mu, mǝ kɔ ro seth ka mu. 7kɔ yokanɛ, ɔ kɔnɛ ro seth kɔŋ. 8Kɛrɛ ma ȧsuniya aŋ nənk ti-e, aŋ kabanɛ, kaŋ yikis Kuruȧŋ ɔwe po sɔŋ afɔsɔ awunɔŋ ka afǝm.

9Ɔwa ma Yisɔsȧŋ ɔ wur ri-e, ɔ nənk wuni ɔwe a bont Mathiu, ɔ yirȧ ka ɔdɛr ro mǝ a gbasi ɛfȧk. Kɔ pa ro rɔŋɔŋ, Taŋ mi. Kɔ yokanɛ, ɔ tȧŋ kɔ.

10Ka pǝ re yi ma Yisɔsȧŋ ɔ yirȧ ka kǝdi ro seth-e, afǝm aŋa gbasi ɛfȧk yi afǝm ŋa ɛhakɛ agbȧthi aŋ der aŋ yirȧ yi kɔn dɛ yi aŋkarande ŋɔŋ. 11Ma aŋFarisi aŋ nənk ti-e, aŋ pa ka aŋkarande ŋɔŋ, To pǝ som ɔkarmɔkɔ ka nu mǝ ɔ di yi ŋaŋ aŋa gbasi ɛfȧk dɛ yi afǝm ŋa ɛhakɛ-e? 12Ma Yisɔsȧŋ ɔ tǝl ti-e, ɔ pa, Ŋaŋ aŋa yi ayenki mǝdɛr aŋ yema hɛ udamǝr, kɛrɛ aŋtui ŋa yema udamǝr. 13Kɛrɛ kɔnɛ nu kȧmȧ nǝ kɔ thǝkǝs ȧte, I yema ȧney, sathka thahɔ; ȧtesoma-e i der hɛ tǝ kǝmuti aŋlompi-e, kɛrɛ i der tǝ kǝmuti aŋfǝm ŋa ɛhakɛ tǝ kǝthupi.

14Ka ȧŋlɔkɔ ŋati aŋkarande ŋa Yɔn aŋ der ro ŋɔŋ, aŋ pa, To som saŋ yi aŋFarisi sǝ wop asum katkat, kɛrɛ aŋkarande a mu aŋ wop hɛ asum-e? 15Ka Yisɔsȧŋ ɔ pa ro ŋaŋ, Aŋyathki ŋa ɔnȧntȧ aŋ gbǝli saŋ amɔl ma ɔnȧntȧ ɔ yi ras yi ŋaŋ-i? Kɛrɛ mȧrey mǝ tǝ der ma mǝ a nɔy ŋa ɔnȧntȧ, ɔwa ka ȧŋlɔkɔ ŋati aŋ tǝ wop asum. 16Wuni ɔ gbap hɛ arombo ŋa kotha kǝfu rǝ ruma rǝkur, kotȧy-e ȧŋrombo ŋati aŋ tǝ pim aruma, ɔwa ɔpima ɔ tǝ bȧr gbo lǝsǝ. 17Ɔwa a bot hɛ mǝwain mǝfɛth rǝ tǝbos tǝkur; bepi pǝ yi ti-e, tabos tǝ tǝ puta, ɔwa mawain mǝ tǝ loŋa, dɛ yi tabos tǝ tǝ lǝsǝ; kɛrɛ a bot mǝwain mǝfɛth rǝ tǝbos tǝfu, ɔwa yi yɛrǝŋ ɛ tǝ won.

18Ma ɔ kanɛ ŋa mȧtȧy ame-e, ugbǝka ulɔm ɔ der, ɔ sɔna kɔ tǝwu, ɔ pa, Ɔwan kȧmi ubɛra ɔ fi ka-ake, kɛrɛ der reŋ kɔ kȧta kȧmu kȧmȧ ɔ tǝ kǝli. 19Ka Yisɔsȧŋ yi aŋkarande ŋɔŋ aŋ yokanɛ, aŋ tȧŋ kɔ. 20Ka wuni bom ulɔm ǝŋbɔwurnɛ mǝtir ta tǝren tɔfɔt tǝrǝŋ-e, ɔ der rodarǝŋ kɔŋ, ɔ gboŋ amɛsɛ ma aruma rɔŋ. 21kotȧy-e ɔ pa ka ȧŋmerȧ ŋɔŋ, Bepi i gboŋ gbo aruma rɔŋ-e, i ti yeŋk. 22Ma Yisɔs ɔ fǝlɛ ɔ nənk kɔ-e, ɔ, pa, Wan ka mi ubɛra, bȧk kǝbuth. Kȧlanɛ kȧmu kǝ po mu yeŋkǝs. Ka ɔwuni bom ɔ yeŋk ka ȧŋlɔkɔ ŋati gbeŋ. 23Ma Yisɔsȧŋ ɔ bek ka ȧŋseth ŋa ɔgbǝka-e, ɔ nənk aŋfɛŋ tulɛŋ yi ȧruniya aŋ bok, 24kɔ pa ro ŋaŋ, Wur nu kotȧy-e ɔwath ubɛra ɔ fi hɛ, ɔ dirȧ gbo. Kaŋ sel kɔ bɛ. 25Kɛrɛ ma a po wurɔ aŋfǝm-e, ɔ wɔŋ, kɔ wop kȧta ka ɔwath ubɛra, kɔ yokanɛ. 26Ka tȧgbuŋ tati tǝ gbanthɛnɛ ka ȧŋthɔf ŋati bɛ.

27Ɔwa ma Yisɔs ɔ wur ri-e, alaŋgba afith ŋarǝŋ aŋ tȧŋ kɔ, aŋ sel ɛrɔŋ kaŋ pa, Munɔ ɔwan ka Debid, ba su ȧney. 28Ma Yisɔsȧŋ ɔ po wɔŋ ro seth-e, aŋlaŋgba afith aŋ der ro ŋɔŋ. Ka Yisɔs ɔ pa ro ŋaŋ, Nǝ lanɛ kǝpa i gbǝli yɔ ȧte-i? kaŋ wosȧnɛ kɔ, aŋ pa, Yao Pa. 29kɔ gboŋ ɛfɔr yaŋ, ɔ pa, Ta pǝ yi nu mɔ mǝ kȧlanɛ ka nu kǝ yi. 30Ka ɛfɔr yaŋ ɛ kanthɛ. Ka Yisɔsȧŋ ɔ maŋ ŋa kiriŋ kiriŋ kȧmȧ aŋ te ti tɔri wuni o wuni. 31Kɛrɛ maŋ wur-e, aŋ gbanthɛnɛ ȧŋes ŋɔŋ ka ȧŋthɔf ŋati bɛ.

32Ɔwa maŋ wur ri-e, a kȧrȧ ulaŋgba kǝbobo ro ŋɔŋ ɔwe ba ukǝrǝfi. 33Ma ɔ wurɔ ɔkǝrǝfi-e, kabobo ɔ fɔf, ka ȧruniya rǝ kabanɛ, rǝ pa, Thȧnkȧŋ a tha nənk hɛ tȧy tǝwunɔŋ kǝtɔŋ ka aŋIsrɛl. 34Kɛrɛ aŋFarisi aŋ pa, Ɔ wurɔ akǝrǝfi ka kȧta ka ɔbȧy ka aŋkǝrǝfi.

35Ka Yisɔs ɔ kɔth kɔth ka tapet yi ka tagbɔm bɛ, ɔ thǝksa aŋfǝm ka ɛseth yaŋ ɛgbanɛ, kɔ tamǝs ȧkɛra kǝfinɔ ka rȧbȧy, ɔ yeŋkǝs rǝtu o rǝtu ara yi kǝtɔŋ ka ŋaŋ. 36Kɛrɛ ma ɔ nənk ȧsuniya-e, ȧney aŋ wop kɔ ta ȧtǝ ŋaŋ, pǝkasifɛ aŋ sɔmpanɛ, ɔwa aŋ sakanɛ mɔ tǝlɔmɛ aŋa te ba utɔl. 37kɔ pa ka aŋkarande ŋɔŋ, Tǝ tɛntɛnɛ karɔk kǝ yi kǝbana, kɛrɛ aŋrɔk a than. 38Tiyȧŋ nɛmthɛnɛ nu ɔMarki ka karɔk, kȧmȧ ɔ somra akump ka karɔk kɔŋ.

Currently Selected:

Mathiu 9: TMNNT

Highlight

Copy