Mathiu 5

1Ma Yisɔsȧŋ ɔ nənk ȧsuniya-e, ɔ gbep ka kǝteŋ rokɔm. Ma ɔ po yira-e, aŋkarande ŋɔŋ aŋ fatǝr kɔ. 2kɔ tǝp kǝthǝksa ŋa, ɔ pa, 3Aruba ŋaŋ aŋa yi amɔnɛ rǝ ȧmerȧ, kotȧy-e ŋa ba rȧbȧy ra ro riyana.

4Aruba ŋaŋ aŋa saŋ amɔl, kotȧy-e a ba kǝthɔnthɔ ŋa.

5Aruba ŋaŋ aŋa ba ɛmerȧ ɛthoranɛ, kotȧy-e aŋ tǝ ba ȧŋthɔf mɔ kɛŋ.

6Aruba ŋaŋ aŋa ba afela ta mȧlompi mɔ dor, kotȧy-e aŋ ba kǝnȧmrȧ.

7Aruba ŋaŋ aŋa ba ȧney, kotȧy-e a tǝ ba ŋa ȧney.

8Aruba ŋaŋ aŋa ba ɛmerȧ ɛfera, kotȧy-e aŋ ba kǝnǝŋk Kuru.

9Aruba ŋaŋ aŋa yi awom, kotȧy-e a tǝ bont ŋa aŋwuth ŋa Kuru.

10Aruba ŋaŋ aŋa a po sɔmpa salata mȧlompi, kotȧy-e ŋa ba rȧbȧy ra ro riyana.

11Nǝ ba aruba bepi a sambos nu, ɔwa a sɔmpa nu, thalɔm a fɔf nu ɔlǝs rǝ rǝyem salata mi. 12Sel nu mǝbɔnɛ, ta pǝ bɔnɛ nu ɔthasǝr, kotȧy-e ȧŋram a nu aŋ yi ȧbana ro riyana; ȧtesoma-e ya a sɔmpa aŋnabi aŋa yi thǝpaŋ.

13Naŋ nǝ yi amɛr ma ȧdȧru, kɛrɛ bepi amɛr mǝ dim mabɔthi mati-e, ko rǝka rǝ mǝ bɔthǝs ma sɔ-e? Mǝ thesa hɛ sɔ ta rǝka o rǝka thambe a fitha ma, ɔwa afǝm aŋ nas ma. 14Naŋ nǝ yi ȧŋmothȧ ŋa ȧdȧru. Kȧpet ȧke yi ka kǝteŋ rokɔm-e kǝ gbǝli hɛ maŋknɛ. 15Ɔwa afǝm aŋ moth hɛ kǝmulɛ tǝ kǝbot ki rǝ ȧthunthȧ roratha-e, thambe aŋ bot ki rǝ ɔtǝmǝr, kȧmȧ kǝ mothǝr ŋa bɛ ro seth. 16Yɔ nu kȧmȧ ȧŋmothȧ a nu aŋ gbɛntha rodi ka aŋfǝm, kȧmȧ aŋ nənk mȧyɔs ma nu mǝfinɔ, ɔwa aŋ yikis ɔKas ka nu ɔwe yi ro riyana.

17Te nu nanɛ kǝpa i der tǝ kǝlǝsǝr aŋthɔ, thalɔm tapa ta aŋnabi. I de hɛ tǝ kǝlǝsǝr, kɛrɛ tǝ kǝlasǝr. 18Tɛntɛnɛ i pa ro rɔnu, Haŋ ȧkȧriyana yi ȧdȧru ɛ thas-e, hali tȧy tǝlɔl thalɔm agbal ŋin ŋa aŋthɔ aŋ gbǝli hɛ dinɛ haŋ a po lasǝr ŋi bɛ. 19Tiyȧŋ wuni o wuni ɔwe mǝ sim ȧgbȧp alɔl ŋin ŋa ɛthɔ ɛye, ama ɔ thǝksa afǝm yaŋ-e, a tǝ bont kɔ ulɔl ka rȧbȧy ra ro riyana; kɛrɛ ɔwe mǝ wop ama ɔ thǝksa yi-e, a tǝ bont kɔ ubana ka rȧbȧy ra ro riyana. 20Tiyȧŋ i pa ro rɔnu, Thambe mȧlompi ma nu mǝ thas mȧlompi ma aŋkarmɔkɔ yi aŋFarisi-e, rǝ roŋ o roŋ nǝ gbǝli hɛ wɔŋ ka rȧbȧy ra ro riyana.

21Nǝ po tǝl kǝpa a pa ka aŋbȧki thǝpaŋ, Te dif wuni. Wuni o wuni ɔwe mǝ dif wuni kǝsias-e, ɔ beki kȧmȧ ɔ sɔthɔ ȧthȧlǝr ka aŋthonkas. 22Kɛrɛ minɛŋ i pa ro rɔnu, Wuni o wuni ɔwe ba mǝbaŋ ta ɔwɔnt kɔŋ-e, ɔ tǝ fumpɔ kasi ro bare; ɔwa wuni o wuni ɔwe mǝ farki ɔwɔnt kɔŋ-e, ɔ tǝ fumpɔ kasi ka aŋSanhedrin; kɛrɛ wuni o wuni ɔwe mǝ pa, Mun pǝŋk, ɔ tǝ fumpɔ kasi ro yahanama.

23Tiyȧŋ bepi mǝ kȧrȧ ȧŋboya a mu ka ȧŋbɛsɛ-e, ɔwa mǝ kala ȧmerȧ kǝpa ɔwɔnt mu ɔ ba mǝbaŋ ta ȧtȧ mu-e; 24tey ri ȧŋboya a mu, kɔnɛ mǝ mɔtha kȧl manɛ yi ɔwɔnt mu, kǝdarǝŋ kati mǝ der, mǝ sɔŋ ȧŋboya a mu. 25Manɛ yi ɔtheranɛ ka mu ka ȧŋlɔkɔ na mǝ taŋanɛ ro roŋ yi kɔn; ta thani ɔtheranɛ ka mu ɔ lȧnki mu ka ɔthoŋkas, ɔwa ɔthoŋkas ɔ lȧnki mu ka ȧŋbɔy, ɔwa a tand mu ka ȧŋseth ŋa tǝrǝŋka. 26Tɛntɛnɛ i kanɛ mu, mǝ ba hɛ kǝwur ri rǝ roŋ o roŋ haŋ mǝ poŋ ram aŋwankɔpɔ alǝpsɔ. 27Nǝ po tǝl kǝpa a pa, Te yɔ kǝrǝp. 28Kɛrɛ minɛȧŋ i pa ro rɔnu, Wuni o wuni ɔwe mǝ kǝli wuni bom tǝ kǝfela kɔ-e, ɔ po yɔ kǝrǝp ka ȧŋmerȧ ŋɔŋ. 29Bepi rafɔr ra mu rǝdiɔ rǝ yɔ mu mǝ pǝnthbǝla-e, kothi ri, fitha ri, kotȧy-e pǝ tǝ fisa mu bepi abɛm ŋin ŋa aŋdɛr a mu aŋ lǝsȧ-e, pǝthasi kǝfitha aŋdɛr a mu alolok ro yahanama. 30Ɔwa bepi kȧta ka mu kǝdiyɔ kǝ yɔ mu mǝ pǝnthbǝla-e, gbǝk ki, fitha ki, kotȧy-e pǝ tǝ fisa mu bepi abɛm ŋin ŋa aŋdɛr a mu aŋ lǝsǝ pǝthasi kǝfitha aŋdɛr a mu alolok ro yahanama.

31A po pa sɔ, Bepi wuni o wuni ɔ ter ɔrani kɔŋ-e, ta ɔ sɔŋ kɔ areka ŋa kasakanɛ; 32kɛrɛ minɛȧŋ i pa ro rɔnu, Wuni o wuni ɔwe mǝ ter ɔrani kɔŋ pǝ yi hɛ tȧ kǝrǝp-e, ɔ yɔ ɔbɛra ɔ sǝkɛ urǝpi, ɔwa wuni o wuni ɔwe mǝ nȧntȧ kɔ ɔwe a po ter-e, ɔ yɔ kǝrǝp.

33Nǝ po tǝl kǝpa a pa ka aŋbȧki thǝpaŋ, Te gbiŋ kǝgbiŋ ka rǝyem, kɛrɛ lasǝr ɛgbiŋ ɛ nu ka ɔMarki. 34Kɛrɛ minɛȧŋ i pa ro rɔnu, Te gbiŋ hali, pǝ yi hɛ ka ȧkȧriyana, kotȧy-e kǝ yi kawaŋ ka rȧbȧy ra Kuru Mǝsaba, 35pǝ yi hɛ ka ȧdȧru, kotȧy-e kǝ yi kȧpet ka ɔBȧy ubana. 36Te gbiŋ ka rȧbomp ra mu, pǝkasifɛ mǝ gbǝli hɛ sǝki rafon ra mu rin rǝfera thalɔm rǝbi. 37Kɛrɛ ta mapa ma mu mǝ yi Yao, Yao, thalɔm Yi thahɔ, Yi thahɔ; kotȧy-e tȧy o tȧy ȧte thas ȧte tǝ wur ka ɔlǝs.

38Nǝ po tǝl kǝpa a pa, Rǝfɔr ta rǝfɔr, rǝsek ta rǝsek; 39kɛrɛ minɛȧŋ i pa ro rɔnu, Te kasi mǝlǝs. Bepi wuni o wuni ɔ gbantha mu ka aŋkos ȧdiyɔ-e, lȧfthɛ kɔ aŋlɔm sɔ. 40Ɔwa bepi wuni o wuni ɔ kera mu ro bare-e, ɔwa ɔ nɔy mu aruma ra mu-e, yɔ kȧmȧ ɔ ba sɔ kafɔl ka mu. 41Bepi wuni o wuni ɔ kithinɛ mu tǝ kǝpȧyȧ kɔ ȧmayl ŋin-e, pȧyȧ kɔ yɛrǝŋ. 42Sɔŋ ka ɔwe mǝ tholir mu, te pɛnsa ɔwuni ɔwe yema bɔr mu. 43Nǝ po tǝl kǝpa a pa, Bɔthǝr ɔfatanɛ ka mu, ɔwa gbɛŋa ɔtheranɛ ka mu. 44Kɛrɛ minɛȧŋ i pa ro nu, Bɔthǝr aŋtheranɛ a nu, ɔwa ramnɛ nu ta ȧtȧ ŋaŋ aŋa sɔmpa nu, 45kȧmȧ nǝ yi aŋwuth ŋa ɔKas ka nu ɔwe yi ro riyana. Kotȧy-e ɔ yɔ aret rɔŋ rǝ putǝr ka aŋlǝs yi ka aŋfinɔ, ɔ somra akɔm ka aŋlompi yi ka aŋkǝnȧ. 46Ȧtesoma-e bepi nǝ bɔthǝr gbo aŋa bɔthǝr nu-e, ko ȧrȧm naŋ mǝ nǝ sɔthɔ-e? Yaŋ tha aŋthoŋkla ɛfȧk aŋ yɔ sɔ-e? 47Bepi nǝ kori aŋwɔnt nu gbo-e, ko tȧy tǝfinɔ tȧŋ nǝ yɔ pǝthas alɔm-e? Yaŋ tha tȧbona tǝlɔm mǝ aŋ yɔ sɔ-e? 48Tiyȧŋ yi nu agbenthis mɔ mǝ ɔKas ka nu ɔwe yi ro riyana ɔ yi ugbenthis.

Currently Selected:

Mathiu 5: TMNNT

Highlight

Copy