OBADAYA 1
1
Iidɔm Mamani Yaa a Yeilɔ
1Obadaia hindahulɔlɛi.
Hi mia Ndemɔi Ngewɔ i ndeni kɔlooni Iidɔm ma:
Mu goo mɛninga a hiye Ndemɔi gama,
tawao ti ngowiliyia lemɔi yoyonga kɛnyɛisia lia:
“A hiye! A mu hiye mu lapi la!”
2A tɔnya nga bi yayeilɔ kɛnyɛisia lia;
nga bi yayeilɔ.
3Wu mamani i wu yalemanga,
wa wu heini fawagɔtusia wumba,
nasia ti heimɛisia ti yaguhangɔ.
Wa nde wu liisia hu wue,
“Ye mia a nya gula ndɔɔlɔmei?”
4Kia bɛ wa guwo kia yibɛi na,
kia bɛ wu leisia ti ndumbekɛisia lia,
nga wu yayei naa,
hi mia Ndemɔi ndenga.
5Ina humablɛisia ti wailɔ wu gama,
kɛ kapublɛisia a kpindii
kia ti bi jukuunga la!
Tɛɛ na huma lekee ti longɔ la?
Ina ndɔyeyakɔ lɛmbablaa ti wailɔ wu gama,
tɛɛ ye mɔnunga lo?
6Kia ti Isɔ nyaninga la,
ti ngi gbatɛisia wumbunga!
7Wu magbɛlɛmablɛisia gbi ti wu wɛlɛnga,
ti wu gbɛnga wu lɔɔlei hu;
wu ndiamɔisia ti wu wɛlɛnga;
nasia ti wu mɛhɛɛ mɛni ti maniyatɛnga wu va
wuii hugɔɔ.
8Foloi na ma, hi mia Ndemɔi ndeni
Nga nɛmahuleweiblɛisia jukuulɔ Iidɔm hu,
kɛ hindahugɔɔla Isɔ Yiyei hu.
9Bi gɔgɔblɛisia ti hu a vayalɔ, O Teman,
kɔ wɔi numu gbi lekee a hiye Isɔ Yiyei hu i jukuu.
Iidɔm i Nyamunga a Ngi Ndewei hindoi
10Paa naa va kɛ kpaagba na bi ndaani bi ndewei hindoi Jekɔpi,
gawufe a bi magbolelɔ,
tawao nga gbelelɔ bi ma kunafɔ va.
11Foloi na ma bi looni gba,
foloi na ma hotangɛisia ti lini a ngi gbatei,
kɛ kɛnyɛblɛisia ti jɔkɔnga ngi gɔlɛi lamɛisia hu
kɛ ti kɔhani gɔnga Jelusalɛmi va
Wua bɛɛ wu yɛni a ti yila ye lɔ.
12Kɛɛ bii yɛ a ndiima nyamu gohunɛɛ wie bi ndewei hindoi mahu
foloi na ma kpaagba ngi maleni;
bii yɛ a kohunɛɛ wie Juda nungeisia mahu
foloi na ma hunyani ti maleni;
bii yɛ a mamani yɛpɛ le
kpaagba voloi va.
13Bii yɛ a jɔkɔ nya nungeisia ti gɔlɛi la ma
foloi na ma kpundɛ gulani ti ma;
bii yɛ gbɛlɛɛ nasia ma a ndiima nyamu hu wee Juda jukuulei va
foloi na kpundɛ gulani ti ma.
Bii yɛ a ngi hakeisia gapu
foloi na ma kpundɛ gulani ti ma.
14Bii yɛ a loo pelela gbameisia
kɔɔ wu nasia waa ti wilama kɔi ma;
bii yɛ a nasia ve ti mabawoni
ndii nyani voloi ma.
Ngewɔ a Kɛnyɛisia Gbɛmbolɔ
15Gbamaile Ndemɔi voloi lɔ gblanga kɛnyɛisia gbi va.
Kia bi pienga hi, hi mia a wie bi gama;
bi wie hindɛisia ta yamalɔ bi gama.
16Ajifa kia wu ndɔ gbɔlenga nya yiyei magayemangɔi mahu,
kɛnyɛi nasia gbi ti wu galangɔ ta ndɔi gbolelɔ;
ta kpɔilɔ a kaka hu we,
kɛ ti wienga kia bɛ ti ya wɔ gba a ndɔ gbɔlene.
Isleɛl Lemayɛi
17Kɛɛ Saiɔn yiyei mahu nasia ta yɛlɔ na ta wila,
tawao ma a gayeilɔ;
kɛ Jekɔpi wɛlɛi a nasia houlɔ ti yɛ ti gbuani ti yeya.
18Jekɔpi wɛlɛi a wielɔ a ngɔmbu,
Josɛfi wɛlɛi i wie a ngɔmbu voo,
tawao Isɔ wɛlɛi a wielɔ a ndawabɛ
ta ti mɔlɔ foo,
tawao numu gbi ɛɛ gbua hu Isɔ wɛlɛi bu;
ajifa Ndemɔi i yɛpɛnga.
19Nasia ti gbuani Nɛgɛbi Isɔ yiyei a yɛlɔ ti woo,
kɛ nasia ti gbuani Sɛfila, Filistiablɛisia ti lɔɔlei;
Ifileimi kɛ Samelia lɔɔlei a yɛlɔ a ti woo,
tawao Gileadi a wielɔ a Bɛnjamin woo.
20Isleɛl gɔhuoisia nasia ti yɛ Halaa
Fonisia a yɛlɔ a ti woo haaŋ i fo Salɛfati;
kɛ Jelusalɛmi gɔhuoisia nasia ti yɛ Sɛfalad
tei nasia ti Nɛgɛbi ta yɛlɔ a ti woo.
21Nasia ti ma yɛ mbawoni ta lɛɛlɔ Saiɔn Yiyei mahu
yɛva Isɔ Yiyei mahu;
tawao mahawui a yɛlɔ a Ndemɔi ndɛi.
Currently Selected:
OBADAYA 1: RMB
Highlight
Share
Copy
Want to have your highlights saved across all your devices? Sign up or sign in
Mende Bible Portions © Bible Society in Sierra Leone and Lutheran Bible Translators, 2020.
