NƐHIMAYA 3

Jelusalɛmi Bundi Loolei Gbɔma

1Na wooma saagbuamɔ wai Eliasibi i tatoilɔ a yengela taa ngi mba saagbuableisia kɛ ti Mbala Lamei loonga gbɔma. Ti magayeilɔ kɛ ti yee nɛteisia hɛlenga; ti magayeilɔ haaŋ i too Bundi Yaguhangɔi yee Hɔndɔ yilei ma, haaŋ i foo Hananɛli Bundi Yaguhangɔi ma. 2Kɛ Jɛliko hingeisia bɛɛ ti ti ndei loonga ngi gblanga. Tawao ti gblanga Imili hindoloi Sakɔ i ngi ndei looilɔ.

3Hasɛna hingalengeisia ti Nyɛ Lamei loilɔ; ti yee gagbaawulisia lailɔ kɛ ti nɛteisia hɛlɛnga, taa yee ndagbɔwuhakeisia, kɛ kɔlu wai na a la poma. 4Ti gblanga Mɛlɛmɔti Ulaya hindoloi Hakɔsi hindoloi i ti hugbatɛilɔ. Ti gblanga Mɛsulami Bɛlɛkaya hindoloi Mɛsɛsabɛli hindoloi i ti hugbatɛilɔ. Ti gblanga Sadɔki Bana hindoloi i ti hugbatɛilɔ. 5Ti gblanga Tekoibleisia ti hugbatɛnilɔ; kɛɛ ti jamangeisia ti ganganilɔ ngenge wie va ti Lemɔi wɛ.

6Joyada Pasea hindoloi, kɛ Mɛsulami Bɛsodaya hindoloi ti Gɔlɔwovei Lamei hugbatɛilɔ, ti yee gagbaawulisia lailɔ kɛ ti yee nɛteisia hɛlɛnga taa yee ndagbɔwuhakeisia kɛ kɔlu wai na a la poma. 7Ti gblanga Mɛlataya Gibeɔnmɔi i ti hugbatɛilɔ, kɛ Jadɔni Mɛlɔnɔmɔi, Gibɛɔn hingeisia kɛ Misipa nasia ti yɛ Yufletisi yei wooma kpaalata gɔminei jawei bu. 8Ti gblanga Usieli Hahaya hindoloi kanigbɔlugbatɛbleisia yee ngila i hugbatɛilɔ. Ngi gblanga Hananaya hanigunɛnɛ gbatɛmɔ yee ngila i hugbatɛilɔ; kɛ ti Jelusalɛmi yagamanga haaŋ i too Bundi Yaa wɔlɔngɔi ma. 9Ti gblanga Lɛfaya Hɔ hindoloi na yɛni a maha Jelusalɛmi gaka yila tewengɔ ndia, i ti hugbatɛilɔ. 10Ti gblanga Jɛdaya Halumafi hindoloi i hugbatɛilɔ ngi wɛlei lenga hu; tawao ngi gblanga Hatusi Hasabineya hindoloi i ti hugbatɛilɔ. 11Makaija Halimi hindoloi kɛ Hasubi Pahati Moabi hindoloi i kaka weka gbatɛilɔ Bundi yee ngaguhangɔi Lɛwɛmɔmei. 12Ngi gblanga Salumi Haloɛsi hindoloi na yɛni a maha Jelusalɛmi heimbei yila tewengɔ ndia, ngi ndei hugbatɛilɔ kɛ ngi nyahalengeisia ti ndei.

13Hanuni kɛ nasia ti yɛ heini Sanoa ti Gondongondoi Lamei hugbatɛilɔ; ti toilɔ gbɔma, kɛ ti yee nɛteisia hɛlɛnga, taa yee ndagbɔwuhakeisia, kɛ kɔlu wai na a la poma, kɛ i hou hɔndɔ lɔɔlu hugbatɛnga bundi ma haaŋ i too Kaa wili Gɔlɔi lama.

14Malkaija Lɛkabi hindoloi na yɛni a maha Bɛtakɛlɛmi hembei hu, i Kaa wili Gɔlɔi Lamei hugbatɛnilɔ; i toilɔ gbɔma kɛ i yee nɛteisia hɛlɛnga, taa yee ndagbɔwuhakeisia kɛ kɔlu wai na a la poma.

15Kɛ Salumi Kɔhosɛ hindoloi na yɛni a maha Misipa heimbei va i Nja valimei Gɔlɔi hugbatɛilɔ; i tonilɔ gbɔma kɛ i mawɛlɛnga, kɛ i yee nɛteisia hɛlɛnga, taa yee ndagbɔwuhakeisia, kɛ kɔlu wai nasia ta la poma; kɛ i Sela Wopei loonga, mahei gatei gohu haaŋ i too kpakpawului nasia ma taa gbua Devidi la wai hu ta yei. 16Ngi wooma Nɛhimaya Asibuki hindoloi na yɛni a maha Bɛtisɔ heimbei yee kaka yila va, i ti hu gbatɛilɔ gbɔma i hiye mia i yɛ heini Devidi gambei lenga hu, haaŋ i too nja wopa gbatɛngɔi ma kɛ kɔ gugbeisia ti wɛlei ma.

Liivaiti nasia ti yengeni bundi ma

17Ngi wooma Livaitibleisia ti hugbatɛnilɔ gbɔma: Lehumi Banai hindoloi; ngi gblanga Hasabaya, na yɛni a maha Keila heimbei mahu, i hugbatɛilɔ ngi heimbei va. 18Ngi wooma ti ndewei i hugbatɛilɔ; Binui Hɛnedadi hindoloi, na yɛni a maha Keila hembei mahu; 19ngi gblanga Ɛsa Jɛsua hindoloi Misipa mahei i kaka weka hugbatɛilɔ, kɔhaka lama gbatɛmei lengahu. 20Ngi wooma Baluki Sabai hindoloi i kaka weka hugbatɛnilɔ gbɔma i hiye yee tatɔmei ma i too yee saagbuamɔ wai Eliasibi wɛlei lamei ma. 21Ngi wooma Mɛlɛmɔti Ulaya Hakɔsi hindoloi i kaka weka hugbatɛilɔ lɔ Eliasibi wɛlei lama i too yee kɛlɛmei.

Saagbuablei nasia ti yengeni bundi ma

22Ngi wooma saagbua hingei nasia ti yɛ naa gblanga, ti hugbatɛilɔ. 23Ti wooma Bɛnjamin kɛ Hasubi ti hugbatɛnilɔ ti wɛlei lengahu. Ti wooma Asalaya Maseya hindoloi Ananaya hindoloi i hugbatɛilɔ ngi nda wɛlei yakama. 24Ngi wooma Binui Hɛnedadi hindoloi i kaka weka hugbatɛilɔ i hiyei Asalaya wɛlei ma i too yee tɔtomei ma i too yee tɔɔhuin ma. 25Pala Usai hindoloi i hugbatɛilɔ yee gɔlɔ lɔtomei lengahu kɛ bundi yaguhangɔi na i gbuama mahei wɛlei yee mahuyii ma, mahei mahugbeeblaa ti jɛmɛɛ ma. Ngi wooma Pɛdaya Palɔsi hindoloi 26kɛ Ngewɔ wɛlɛbu bɔilopoisia ti yɛ heini Ofɛ ti na hugbatɛilɔ haaŋ i too hindei na Nja gɔlɔi Lama lengahu a kɔ yaka wee kɛ yee bundi yaguhangɔi.

Pɛlɛ Looblaa Wekeisia

27Ngi wooma Tekoibleisia ti kaka weka hugbatɛnilɔ bundi yaguhangɔ wai lengahu haaŋ i foo Ofɛ bundi ma.

28So lama Gɔlɔi mahui saagbuablaa ti hugbatɛnilɔ gbɔma yee ngila gbi ngi nda wɛlei lengahu. 29Ti wooma Sadɔki Imɛ hindoloi i hugbatɛilɔ ngi nda wɛlei lengahu. Ngi wooma Sɛmaya Sɛkanaya hindoloi na i yɛni a Kɔɔ Gɔlɔi lama mahugbemɔi i hugbatɛilɔ. 30Ngi wooma Hananaya Sɛlɛmaya hindoloi kɛ Hanuni Salafi hindoloi yee weitei i kaka weka hugbatɛnilɔ. Ngi wooma Mɛsulami Bɛlɛkaya hindoloi i hugbatɛnilɔ ngi yee kuwuhu lengahu. 31Ngi wooma Makaija kanigbɔlu gbatɛbleisia yee ngila i hugbatɛilɔ haaŋ i too bɔilopoisia ti Yewɔ vɛli wɛlei ma kɛ felegɔbleisia, Mahugbee Gɔlɔi Lama lengahu i too ngeleya wɛlei bu jɔkui ma. 32Tawao ngeleya wɛlei bu luahui a sɔkui hu wee kɛ Mbala Gɔlɔi Lamei, kanigbɔlugbatɛbleisia kɛ felegɔbleisia ti hugbatɛilɔ.

Currently Selected:

NƐHIMAYA 3: RMB

Highlight

Copy