NƐHIMAYA 13

Nungaa ti Gbualei Hotangeisia lia

1Foloi na ma ti kɔlɔ gaailɔ a gbua Mojisi gɔlei hu nungeisia gbi ti humɛni; kɛ ti tɔnga nyɛingɔ hu kɛ Amɔnaitimɔ ɔɔ Moabaitimɔ gbi ɛɛ wua Ngewɔ nungaa ti gomeisia lia kunafɔ va. 2Gbamaile tii Isleɛlaitibleisia mɛnini a mɛhɛɛ kɛ nja, kɛɛ ti Balami pawailɔ ti yɛli va na hu gbi mu Yewɔi i ye gɛɛli woteilɔ a luba. 3Ji nungeisia ti sawei humɛni, ti hotangeisia kpɛlɛɛ gbuailɔ Isleɛlaitibleisia lia.

Nɛhimaya Hindahugbatɛngɔ Ninei

4Kiahuna naa pɛiŋ ji i yaa wie, saagbuamɔi Eliasibi, na ti yɛ loko looni ngi ma yɛva a Ngewɔ wɛlɛbu haka lamagbatɛmei gulɔ tawao na yɛni Tobaya mamɔ, 5I pɛlɛ jɛmbɛ bu gbatɛlɔ Tobaya va mia a haala ti yɛ mɛhɛɛ jaahani wu na, hanigunɛnɛ, ngenge hakeisia, kɛ kaka puuisia mbei hu kɛ ndɔi kɛ ngulɔi hu, na sawei ndeni yɛ, ta fe Livaitisia wɛ kɛ ngoleyaableisia kɛ gɔlɔlamableisia kɛ fe hanisia saagbuableisia va. 6Kpelemei na ji yɛ a wie ngii yɛ Jelusalɛmi gohu, ajifa fooi yee nuu gbɔyɔngɔ mahu puu mahu felei hu mahei Aatasasi mahayei hu, Babilɔn mahei ngi liilɔ mahei gama. Watii wulo va ngi vɛlilɔ mahei ma, 7kɛ ngi yamanga Jelusalɛmi. Na wooma ngi nyamui na hugɔɔilɔ Eliasibi i yɛ pienga Tobaya va, pɛlɛbu gbatɛ va Ngewɔ wɛlɛbu. 8Kɛ ngi liilewenga waa, kɛ ngi Tobaya wɛlɛbu hakeisia gbi wilinga ngitiya. 9Na wooma ngi ndeilɔ kɛ ti na yɛnga sɛwɛsɛwɛ, kɛ ngi yamanga Ngewɔ wɛlɛbu a hakeisia, taa mɛhɛɛ vehanisia kɛ ye hanigunɛnɛ.

10Ngi gbɔma tɔilɔ kɛ kakei na i yɛ Livaitisia va tii yɛ feni ti wɛ; fale Livaitisia kɛ ngoleyaableisia nasia ti yɛ yengeni ti yɛ yamanga ti gbaleisia hu. 11Fale ngi jɔɔlɛlɔ mahubleisia ma kɛ ngi ndenga ngɛɛ, “Gbɛ va lɔ Ngewɔ wɛlɛbu wopongɔ?” Kɛ ngi ti yandɔnga hinda yila kɛ ngi ti loonga ti loomeisia. 12Na wooma Juda gbi ti wailɔ a mɛhɛɛ kaka puu kɛ ndɔi, kɛ ngulɔi haka lamagbatɛmeisia. 13Tawao ngi loko loilɔ ndamagbatɛ hingei jisia ma kɔwɔi ti yɛ ndamagbatɛ wɛleisia mahu, saagbuamɔi Sɛlɛmaya; Sadɔki sawa gɔlɔnyɛinmɔi kɛ Pɛdaya Livaitimɔi, kɛ ti magbɔmamɔi Henani Sakɔ hindoloi, Matanaya hindoloi, gbamaile ti ti lɔilɔ a lanayablaa; tawao ti yengei mia yɛla a mɛhani gɔlɛkɔlɛ va ti mba ngengebleisia ma. 14Gili a nge, O nya Yewɔi, kɔloongɔ hindei jisia ma, tawao baa woo gbua nya hinda yekpei nasia ma ngi pienga nya Yewɔi wɛlei va kɛ ngi yengeisia va.

15Ye foloi nasia ma ngi nungaa lɔilɔ Juda hu ta nyimi ndɔ vɔnya lowangaa hu kayema lɛvu voloi ma. Tawao ti yɛlɔ a wa a mba yilisia ta too ti jakasisia mahu; kɛ ndɔi bɛ ndɔyeyakɔ wuluwuɛi, ndahan wuluwuɛi kɛ haka gɛwɛngaa, na ti wani la Jelusalɛmi gohu kayema lɛvu voloi ma; tawao ngi ti lahin lɔ ye folei na ma mɛhɛɛ majialei va. 16Talianbleisia bɛ, nasia ti yɛ heini ta wai hu, ti wailɔ a nyɛɛngaa kɛ haka gɛwɛgɛwɛngaa kɛ ti majianga kayema lɛvu voloi ma Juda nungeisia ma Jelusalɛmi. 17Na wooma ngi jɔɔlɛ Judableisia ti gbakoisia ma kɛ ngi ndenga ngɛɛ, “Gbɛ hinda nyamu lɔ wu pie ma, wua baagbua kayema lɛvu voloi ma? 18Wu kɛkɛni tii pieni hi, tawao Ngewɔ ii waani a kpundei ji gbi mu mahu kɛ ta wai ji? Na hu gbi wu wanga a kpundɛ Isleɛl mahu a ji wu pienga baagbua va kayema lɛvu voloi ma.”

19Ji hu tɔtoni a gbindii la Jelusalɛmi bundi lamei pɛiŋ kayema lɛvu voloi a yaa hiiti, ngi ndeilɔ ngɛɛ ti ye nɛteisia lagbɔwu tawao ngi ndeilɔ ngɛɛ taa ndawo kɛlekee kayema lɛvu voloi i lewe. Tawao ngi nya bɔilopoisia lɛnga loilɔ bundi lama, kɔwɔi numu gbi a waa a haka kayema lɛvu voloi ma. 20Na wooma felegɔbleisia kɛ haka majiableisia ti yililɔ Jelusalɛmi wooma hema yila ɔɔ fele. 21Kɛɛ ngi ti lahin lɔ kɛ ngi ndenga ti ma ngɛɛ, “Gbɛ va mia wu yilini bundi gulɔ? Wu pienga hi gbɔma, nga nya lokoi laalɔ wu ma.” I hiye watii na ma, tii yaa wani kayema lɛvu voloi ma. 22Kɛ ngi ndenga Livaitisia ma ngɛɛ ti tiayekpe ma yɛ sɛwɛsɛwɛ tawao ti lii ti bundi lamei mahugbee, kayema lɛvu voloi ma magayengɔi hou va. Gili a ji bɛ nya yauwandei va, O nya Yewɔi, tawao bi nya mabawo bi loma wɔlɔngɔi va.

23Yee watii nasia ma gbɔma ngi Juubleisia lɔilɔ ti yɛ Asidɔdi, Amɔni kɛ Moabi nyahangeisia wumbunga nyahajɔɔyahu. 24Tawao ti lengeisia gbotoma ti yɛ a Asidɔdi gɛnyɛyeilɔ le, tawao tii yɛ a Juda gɛnyɛyei le, kɛɛ ti yɛ a kɛnyɛyia weka gbotongaa le. 25Tawao ngi mawailɔ ti ma kɛ ngi ti jondunga tawao ngi ti lɛnga lewe ngi ti wundeisia wolei; kɛ ngi pienga ti lahedi wumbu Ngewɔ biyei hu tɛɛ, “Waa wu nyahalengeisia ve ti hingalengeisia wɛ nyahajɔyahu, tawao waa ti nyahalengeisia wumbu wu hingalengeisia va ɔɔ wa bɛ va. 26Isleɛl Mahei Sɔlɔmɔn ii jumbu hinda wieni, nyahangei nasia nyeikɔ va? Maha gbi ii yɛ wɔɔ na kɛnyɛisia gbi hu a hitii ngi hu, tawao ngi Yewɔi longɔ wɔɔ waa a ngie, tawao Ngewɔ ngi woteilɔ a maha Isleɛl gbi mahu; na hu gbi kɛnyɛ nyahangeisia ti pielɔ i jumbu wie. 27Ma woloolɔ naa bi ma kɛ mu hinda nyamu waa ji gbi wienga tawao mu pie hinda nyamu wie a mu Yewɔi, a kɛnyɛ nyahangei jisia wumbula nyahajɔɔyahu?”

28Kɛ Jɛhoida hindolo yila, saagbuamɔ wai Eliasibi hindoloi, yɛ lɔ wɔ a Holɔnaitimɔi Sanibalati mblei; ngi ngi gbɛɛlɔ nya gblanga 29Gili a tie, O nya Yewɔi, gbamaile ti bi jaagbua yengei manɔhɔnga, saagbuableisia ti hindayayilingɔi kɛ Livaitisia.

30Fale ngi ti yɛnga sɛwɛsɛwɛ na gbi lekee hota hinda le, tawao ngi saagbuableisia kɛ Livaitisia ti yengeisia loonga kpaukpau, numu gbi lekee ngi nda yengei hu. 31Tawao ngi hinda hugbatɛilɔ kɔwu jaahanisia va ye watiisia ma, kɛ haala wulu wuɛisia va. Gili a nge, O nya Yewɔi, kpekpeya va.

Currently Selected:

NƐHIMAYA 13: RMB

Highlight

Copy