JONA 1
1
Jona Ndemɔi layɛi Gbuanga hu
1Kiahuna naa Ndemɔi layɛi wailɔ Jona gama, Amitai hindoloi, yɛ, 2“Li yakpe Ninivɛ, ta wai na hu, tawao bi ti lahi; gbamaile ngi lii heinga ti wie hinda nyamui ma.” 3Kɛɛ Jona i hiyeilɔ wela va Ndemɔi ma liva Tasisi. I liilɔ Jɔppa, kɛ i ndɛndɛ wa yila malenga na a li Tasisi; fale i ngi mapawei veilɔ, kɛ i lɛnga hu liva Tasisi ta tieni, wela va Ndemɔi ma.
4Kɛɛ Ndemɔi i vivi wa yeilɔ gboyɛi ya, kɛ ye vivi na wailɔ gboyɛi ya na hi ndɛndɛ wai i loni kulo kɔ i woo. 5Na wooma njawuliblɛisia ti luwailɔ, kɛ numui gbi i wɔlonga ngi nda yewɔi gama. Hakɛi nasia ti yɛ ndɛndɛ wai hu ti ti wililɔ gboyɛi hu, kɔ ndɛndɛ wai i yɛ vowo vowo ti va. A ye watii na Jona i yeilɔ ndɛndei ye sɔkui hu i lana njii wa hu. 6Ndɛndɛwa mahumɔi i wailɔ ngi gama, kɛ i ndenga ngi ma yɛ, “Gbɔ bi piema bi njii waa hu? Hiye, bi wɔɔlɔ bi yewɔi gama! Kɛnga ta lee bɛ i gili a mue nahi maa jukuu.”
7Njawuliblɛisia ti ndeilɔ ti nyɔunyɔu ma tɛɛ, “A wa mu tɔtɔi gbɛ, kɔ mu kɔɔ yeva lɔ kpundɛi ji mu malenga.” Fale ti tɔtɔi gbɛilɔ, kɛ i longa Jona ma. 8Na wooma ti ndeilɔ ngi ma tɛ, “Hu ngɛɛ a mue gbɛ va lɔ kpundɛi ji i mu malenga? Ngenge ye gbɔ ba bie? Bi gbua mi lɔ? Bi ndɔlɛi ye gbɔɔ hu? Tawao kɛnyɛi ye gbɛ mɔ lɔ a bie?” 9I kpɛmboilɔ yɛ, “Hiblumɔ mia a nge, nga luwa Ndemɔi ngelegohu Yewɔi lɔ ma, na i gboyɛi kɛ ndɔlɔmalambɛi gbatɛni.” 10Na wooma ye hingeisia ti luwailɔ naa gboŋ, kɛ ti ndenga ngi ma tɛ, “Gbɔ a ji bi pienga!” Gbamaile ti kɔɔilɔ kɛ i wela ma Ndemɔi lɔ ma, ajifa i ndeilɔ ti ma.
11Na wooma ti ndeilɔ ngi ma tɛɛ, “Gbɔɔ ma pie a bie kɔɔ gboyɛi i gɔlɛ mu wɛ?” Gbamaile gboyɛi i yɛlɔ lekee a gbɛmgba. 12I ndeilɔ ti ma yɛ, “A nya wumbu, wu nya wili gboyɛi hu; na wooma gboyɛi a gɔlɛlɔ wu va; gbamaile ngi kɔɔlɔ kɛ nya va lɔ vivi wai ji gulanga wu ma.” 13Na hu gbi ye hingeisia ti lapiilɔ a kpaya kɔ ti yama a ndɛndɛ wai kakpoi ya, kɛɛ tii guni, gbamaile gboyɛi i yɛlɔ lekee a gbɛmgba. 14Na wooma ti wɔlɔilɔ Ndemɔi ma tɛ, “Ndae le, O Ndemɔi, mua bi manɛnɛ ma, baa pie maa jukuu kenɛi ji lɛvui va. Baa pie maa koto majɔɔ kenɛi ji halɛi va; ajifa bia, O Ndemɔi, na wienga a nɛ bi wɛ.” 15Fale ti Jona wumbuilɔ, ti ngi wili gboyɛi hu; kɛ gboyɛi i gbeenga a lumbela. 16Na wooma ye hingeisia ti luwailɔ Ndemɔi ma hulewɛngɔ; kɛ ti saa gbuanga Ndemɔi gama, ti lahedingaa wumbu.
17Kɛɛ Ndemɔi i pielɔ nyɛ wa i Jona gbɔle; kɛ Jona i yɛlɔ nyɛin gohu njii sawa va.
Currently Selected:
JONA 1: RMB
Highlight
Share
Copy
Want to have your highlights saved across all your devices? Sign up or sign in
Mende Bible Portions © Bible Society in Sierra Leone and Lutheran Bible Translators, 2020.
