ƐSITA 9

Juubleisia ti ti Juwuisia Waanga

1Kiahuna ngawu yee puu mahu felei hu, na yɛni a Adaa yawui, foloi yee puu mahu sawei ma, ji ti yɛ mahei yɛpei kɛ ngi jawei wiema, yee foloi na ma vului ji Juubleisia ti juwuisia ti yɛ gili a kpaya majɔɔva ti mahu, kɛɛ na i yɛ wotenga a folo ji Juubleisia ta kpaya majɔɔ ti juwuisia mahu, 2Juubleisia ti lɛlɔma ti la wawaisia hu, Mahei Aasuɛlɔsi gbaalateisia gbi hu kɔɔ ti nasia waa ti yɛ leweni ti waa va, tawao numu gbi ii guni loo va ti gulɔ, ajifa ti ma luwei gulanga nungeisia gbi ma. 3Kpaalateisia ti mahangeisia gbi, mahawu hu gbakoisia, kɛ gɔmineisia, kɛ mahei gbakoisia ti yɛlɔ a gbɔ Juubleisia ma, ajifa Mɔldekai maa luwei i gulanga ti ma. 4Ajifa Mɔldekai gbayangɔ wa mahei wɛlɛbu, tawao ngi lɔwɔi i vayafayailɔ kpaalateisia gbi hu kia kinei Mɔldekai gbayei ma yɛ lekee a to. 5Fale Juubleisia ti ti juwuisia gbi waailɔ a kɔbowei, ti ti hu hawahawa tawao ti ti jukuuilɔ, tawao ti pielɔ a tie kia ti loni la a nasia ti lolongɔ a tie. 6Susa la wai hu Juubleisia ti numu hɔndɔ lɔɔlu lɔ (500) waani tawao ti ti jukuu. 7Ti Paasandata, Dalfɔn, Aspata ni waailɔ, 8Polata, Adalia, Alidata, 9Palmasta, Alisai, Alidai, Vaisata, 10Haman Hamidata hindoloi hingalengaa puuisia, Juubleisia ti juwui; kɛɛ tii ti hakeisia wumbuni.

11Yee foloi na ma, nungeisia ti jikei na ti ti waani Susa la wai hu ti konailɔ mahei ma. 12Mahei ndeilɔ nyaha Mahei Ɛsita ma yɛɛ, “Susa la wai hu Juubleisia ti nungaa hɔndɔ lɔɔlu (500) waanga kɛ gbɔma Haman hingalengaa puuisia. Gbɔɔ ti pienga mahei gbaalatei yee mɔnisia hu? Kiahuna gbɔɔ bi longɔ la? Ta felɔ bi wɛ. Kɛ gbɔɔ bi longɔ la na wooma? A wielɔ.” 13Ɛsita ndeilɔ yɛɛ, “Ina i nɛɛlɔ mahei wɛ, ti luma sina Juublei nasia ti Susa kɔɔ ti na bɛ wie kɔlooni foloi ji jawei ma, tawao ti Haman hingalengaa puuisia luwuisia hɛlɛ numu hɛlɛ wuli ma.” 14Fale mahei ndeilɔ kɔɔ ji i wie, ti sawa lailɔ Susa, kɛ ti Haman hingalengaa puuisia womeisia hɛlɛnga. 15Juublei nasia ti yɛ Susa tia bɛ ti lɛlɔma foloi yee puu mahu naani ma Adaa yawui hu, kɛ ti numu hɔndɔ sawa (300) waanga Susa; kɛɛ tii ti haka wumbuni.

16Kiahuna Juublei yee pekeisia ti yɛ mahei gbaalateisia hu tia bɛ ti lɛlɔma ti lɛvui magawo va, kɛ ti mabawonga ti juwuisia yeya, kɛ ti nuu taosin nuu sawa gbɔyɔngɔ mahu puu mahu lɔɔlu (75,000) waanga nasia ti lolongɔ yɛla a tie; kɛɛ tii ti haka wumbuni. 17Ji yɛni a foloi yee puu mahu sawei lɔ Adaa yawui hu, tawao foloi yee puu mahu naani ma ti lɛvuilɔ, kɛ ti mɛhɛɛ mɛ gomei kɛ kohunɛɛ volo hounga.

18Kɛɛ Juublei nasia ti yɛ Susa ti lɛlɔma foloi yee puu mahu sawei ma kɛ yee puu mahu naani ma, kɛ ti lɛvunga foloi yee puu mahu lɔɔlui ma, ti foloi na wote a mɛhɛɛ mɛ kɛ kohunɛɛ volo. 19Fale Juublei nasia ti yɛ fuleisia hu, nasia ti teisia hu, ti foloi yee puu mahu naani Adaa yawui hinda houilɔ a kohunɛɛ kɛ mɛhɛɛ mɛ gomɛ, ndɛvu voloi na ma ta mɛhɛɛ boya haningaa yoyo ti nyɔunyɔu gama.

Pulimi Gomei

20Mɔldekai hindei jisia nyɛinlɔ kɔlɔ ma, kɛ i njoyonga Juubleisia gbi gama ti yɛ kpaalateisia gbi hu Mahei Aasuɛlɔsi mahawui hu, nasia ti ma gutungɔ kɛ nasia ti maguhangɔ, 21a nde la ti ma kɛ ta foloi yee puu mahu naani Adaa yawui hu houlɔ kɛ gbɔma kɛ foloi yee puu mahu lɔɔlui hu ngawu yakpei na hu foo gbi lekee, 22a kia foloi nasia Juubleisia ti ndiilɛli majɔɔni ti juwuisia va, kɛ kia ndiinyani yawu woteni a kohunɛɛ ti va kɛ a ti wɔlɔlei i wote a ndɛvu volo; kɔɔ foloi jisia ti wie a mɛhɛɛ mɛ kɛ kohunɛɛ voloisia, foloi nasia ma ta mɛhɛɛ boya haningaa yoyo ti nyɔunyɔu gama kɛ boya hanisia fɛliblaa va. 23Fale Juubleisia ti kɔndihinda wumbuilɔ gbɔɔ ti yɛ tatoni a pie la, kia Mɔldekai i yɛ nyɛini ti gama.

24Haman, Agagaitimɔi Hamidata hindoloi, Juubleisia gbi ti juwui, yɛ kava hugbatɛnga Juubleisia waa va, tawao i yɛ Puli gulanga, na ta toli a “tɔtɔ gbɛla” ti lewe va kɛ ti waa va; 25kɛɛ ji Ɛsita wani mahei gulɔ, mahei ndeilɔ a kɔlɔ nyɛingɔ hu wee kɛ piehinda nyamui na Haman i manganga pie va a Juubleisia i wa tayekpe mahu, tawao ta kɛ ngi hingalengeisia ta ti hɛlɛlɔ numu hɛlɛ wulisia ma. 26Fale ta foloi jisia lolilɔ a Pulimi a gbua njɛpei na hu Puli. Hi mia na gbi va nyɛingɔ yɛla kɔlei ji hu, kɛ gbɔɔ ti tɔnga hindei ji hu, kɛ gbɔɔ wienga ti gama, 27Juubleisia ti potelɔ a sawa kɛ ti lumanga kɔɔ i wote a kɔndihinda tiayekpe va kɛ ti lengeisia kɛ nasia gbi ti gbɛlɛni ti ma, kɛ tɛ gbaha a folo felei ji hou la va foo gbi, kia ti nyɛini a yee watii na. 28Ta yee foloi jisia lalɔ nɛmahu tawao ti hou bonda yila gbi hu, bondawui gbi hu, kpaalata, kɛ ta wa; tawao Juubleisia tɛɛ gbe Pulimi voloi jisia ma kunafɔ, tawao tɛɛ gbe a gili la a foloi jisia ti lengeisia lia.

29Kɛ nyaha Mahei Ɛsita, Abihaili nyahaloi, taa Mɔldekai Juumɔi, ti kɔlɔ nyɛingɔ gbaukpau veilɔ kɔlooni kɔlei yei fele ma Pulimi va. 30Ti kɔlɔngaa yoyoilɔ Juubleisia gama ndaloongɔ ndiilɛli kɛ mahugbee hinda ma, kpaalata hɔndɔ yila kalɛ nuu gbɔyɔngɔ mahu wɔfileisia (127) hu Aasuɛlɔsi mahawui hu, 31tawao nde va kɛ Pulimi voloi jisia ta ti houlɔ a yee watiisia, kia Mɔldekai Juumɔi kɛ nyaha Mahei Ɛsita ti ndeni Juubleisia ma, kia lekee ti sawa lani tiayekpe va kɛ ti lengeisia va kɔlooni ti juu houleisia va kɛ ti liinyanisia va. 32Nyaha Mahei Ɛsita jawei i Pulimi hinda wielei woto heilɔ, kɛ ti nyɛinga kɔlɔ hu.

Currently Selected:

ƐSITA 9: RMB

Highlight

Copy