ƐSITA 6

Mahei Baagɔma Venga Mɔldekai wɛ

1Kpindii na Mahei ii yilini, tawao i ndeilɔ kɔɔ ti wa a hinda lamagbatɛ gɔlei, kɛ ti kaanga mahei gama. 2Ti tɔilɔ nyɛingɔ kia Mɔldekai i yɛ ndeni kɔlooni Bigitana kɛ Tɛlɛsi ma, numu nuningɔ feleisia, nasia ti yɛ a mahei gɔlɔi lamei manɛɛ, kɛ nasia ti yɛ hugbatɛ wienga Mahei Aasuɛlɔsi waa va. 3Na wooma mahei ndeilɔ yɛɛ, “Gbɔɔ bagɔɔma le ɔɔ hinda yekpe le ti fenga Mɔldekai wɛ ji va?” Mahei bɔilopoi nasia ti yɛ yenge ngi va ti ndeilɔ tɛɛ, “Ti yaa gbɛogbɛ wieni ngi va.” 4Mahei ndeilɔ yɛɛ, “Yee mia i kitilewemei?” Kiahuna Haman i yɛ lekee jɔkɔilɔ kitilewemei mahei wɛlei bu kɔɔ i yɛpɛ mahei gama kɔɔ ti Mɔldekai hɛlɛ numu hɛlɛmei mia i yɛ na gbatɛni ngi va. 5Fale mahei bɔilopoisia ti ndeilɔ ngi ma tɛɛ, “Haman lɔ mia, looni kitilewemei.” Mahei i ndeilɔ yɛɛ, “I jɔkɔ.” 6Fale Haman jɔkɔi lɔ, kɛ mahei ndenga ngi ma yɛɛ, “Gbɔɔ a wie kinei na gama mahei longɔ i baagɔɔma ve ngi wɛ.” Haman ndeilɔ tayekpe gama yɛɛ, “Yee mia mahei a lo i baagɔɔma ve ngi wɛ i lewe nya ma?” 7Fale Haman ndeilɔ mahei ma yɛɛ, “Numui na va mahei longɔ i baagɔma ve ngi wɛ, 8ti wa a maha bobanisia, nasia mahei ti yilinga, kɛ soi na mahei i sianga, taa maha bɔlɔ i ngi wumba. 9Ti yee bobanisia kɛ yee soi ve mahei baagɔɔmamɔ waa yila wɛ; i numui na ma yili mahei longɔ i baagɔɔma ve ngi wɛ, tawao i loo kinei gulɔ soi mahu giti wa yaa ta wai hu, a nde ngi gulɔ: ‘Hi mia a wie a kinei na mahei longɔ i baagɔɔma ve ngi wɛ.’ ” 10Na wooma mahei ndeilɔ Haman ma yɛɛ, “Bobanisia wumbu kaka kɛ soi, kia bi ndenga la, tawao bi pie hi Juumɔi Mɔldekai gama na i heini mahei gɔlɔi lamei. Baa hinda gbi lo wooma bi ndenga.” 11Fale Haman bobanisia wumbuilɔ kɛ soi, kɛ i gilinga Mɔldekai ma, kɛ i loonga ngi gulɔ gitiwaa yaa ta wai hu, a nde yɛɛ, “Hi mia a wie a kinei na mahei longɔ i baagɔɔma ve ngi wɛ.”

12Na wooma Mɔldekai yamailɔ gbɔma mahei gɔlɔ lamei, kɛɛ Haman liilɔ kaka ngi yee pɛlɛ la, a wɔlɔ tawao ngi wumba wɛlɛngɔ. 13Ji Haman ndeni ngi nyahei Sɛlɛsi kɛ ngi ndiamɔisia ma hindei na gbi i yɛ wienga ngi gama, ngi lahinbleisia kɛ ngi nyahei Sɛlɛsi ti ndeilɔ ngi ma tɛɛ, “Ina Mɔldekai na bi gulalei i wienga ngi yama, i gbuani Juubleisia hu lɔ, bɛɛ gu ngi ma, kɛɛ ba gula lɔ a tɔnya ngi gulɔ.”

Ti Haman Waanga

14Kia ti yɛ tuuŋ a yɛpɛ taa teini, mahei numu nuningɔisia ti wailɔ kɛ ti ya kaka a Haman mɛhɛɛ mɛ gomei na hu na Ɛsita i yɛ hugbatɛni.

Currently Selected:

ƐSITA 6: RMB

Highlight

Copy