Maki 8

Yisɔs theriye biya wuluiŋ binaŋ

(Mathiyu 15:32-39)

1Wuŋ tha niye nambe, sɛthɛ bahɛna thuŋande hɛlɛŋ ka tha banthe. Naa thanko bindɛ muthɔma, Yisɔs thiyi bakarandeni nama beŋ e bindɛ tepe, na 2“Wuŋ niyɔy yama nkinikiniŋ wumandiŋ ba biya beŋ beŋ baŋ, baa bindɛ niyɔy iŋ yaŋ ka gbɛɛni bitaati beŋ beŋ baŋ, awa bindɛ thanki thɔma muthɔma namɛŋ muŋ. 3Yaŋ thimota ba bindɛ duuta mahɛŋ ma yaŋ tha bindɛ thɔmɔŋ, thampo naa bindɛ kɔ duu bi kɔŋ yilɔ ka gboŋa e bindɛ ŋɔɔtuwa naa bindɛ key, baa binɔndi ka bindɛ ŋaye wuthokiye.”

4Huna thonthiŋine niŋ bakarandeni nama beŋ, na “Kama miŋ kute muthɔma ka wula baŋ baŋ mu miŋ thɛriyɛ bindɛ mu womo woma thɔŋ ndɛ thimbɔ?”

5Yisɔs thɔnthɔŋɔŋ bindɛ, na “Tima ŋatoŋ ŋa iŋ beŋ?”

Huna dome bindɛ, na “Ŋatoŋ ŋasɔŋ-ŋaye.”

6Kɛna ni Yisɔs sɛthɛ baŋ yamari ba bindɛ dɔŋɔ kɛkɛŋ. Naa dɔŋɔy bindɛ, Yisɔs sekithe ŋatoŋ ŋasɔŋ-ŋaye ŋaŋ e thiya Masaala na maamo. Naa thanki ndɛ muŋ thiyɛ maamo, ndɛ thinkinuwande ŋɛŋ e dunkune bakarandeni nama beŋ ba bindɛ muŋ hana sɛthɛ baŋ. Naa bohe muŋ bakarandeni beŋ, bindɛ haŋ muŋ sɛthɛ baŋ. 7Bi kiŋ nde hɛlɛŋ nɛŋ iŋ muheni muyetenaŋ. Yisɔs thiyi Masaala na maamo ba muŋ e dɔma bakarandeni nama beŋ ba bindɛ muŋ hana hɛlɛŋ. 8-9Awa sɛthɛ baŋ baŋ thɔŋ e womo woma thimbɔ. Biya bɛrɛ ba wuluiŋ binaŋ bina thɔmɛ. Naa ŋaye bindɛ ka thɔma haŋ, bakarandeni beŋ ŋutunuwande magbanthi maŋ e mɛŋ tɛŋa thadebe thasɔŋ-thaye. Kɛna duututu ntiŋ Yisɔs sɛthɛ baŋ. 10Naa duututu Yisɔs sɛthɛ baŋ, ndɛ thɔɔyɛ ka gbe baŋ iŋ bakarandeni nama beŋ e bindɛ kaa ka kirinkiri hu ka Dalamanutha.

Yisɔs thonthiŋino ba niya bɛyi bathakaba

(Mathiyu 16:1-4)

11Biya binɔndi bi dɔma na biFaresini key ka Yisɔs ka e bindɛ ka sɛsuwa ba gbakila iŋ wundɛ. Bi thimoŋ nde ba niŋ ka bɔha ka Siraŋ. Wuna biyɛ bindɛ niŋ ka thɔnthiŋina ba wundɛ be ni bɛyi bathakaba ba tɔŋɔŋ ba wundɛ ŋaye ka Masaala.#Math 12:38; Luku 11:16 12Kɛrɛ Yisɔs daŋitɔkɔy e niya bindɛ yaabi, na “Mbɛ ba doŋe biya bi ka lɔkɔ baŋ baŋ ba thɔnthiŋina ba bɛyi bathakaba?#Math 12:39; Luku 11:29 Ade, yaŋ kɔŋ bena tepe, bɛyi bathakaba sa nda tɔŋina ka biya beŋ beŋ baŋ.”

13Wundɛ pɛyi bindɛ kɛndɛ e ka thɔɔ ka gbe baŋ, e bɔha ba thuhande thuhaŋ mankɔ maŋ.

Yisithi wo ka biFaresini beŋ mɛnɛ wo ka Hɛrɔdi woŋ

(Mathiyu 16:5-12)

14Naa bindɛ key, bakarandeni beŋ piitɔy ba diŋa ŋatoŋ ŋabɔyɛ ka kaa. Kutoŋ kunthe napethi kuna diŋe bindɛ ka gbe baŋ. 15Huna dome Yisɔs kɛnamɛŋ, na “Niyaŋ kuthɛgbɛ yisithi wo ka biFaresini beŋ#Luku 12:1 mɛnɛ wo ka Hɛrɔdi woŋ.”

16Bindɛ sɛsi huŋ gbonkiya kɛndɛ bindɛ bithɔ ba dɔma, na “Yisɔs tepe haŋ haŋ baa na tha miŋ diŋ ŋatoŋ ŋabɔyɛ.”

17Kɛrɛ naa kɔthɛ Yisɔs hu bindɛ gbonkiyɔkɔ bindɛ bithɔ, ndɛ thɔnthɔŋɔŋ bindɛ, na “Mbɛ hu beŋ gbonkiyeke ba na ka beŋ iŋ ŋatoŋ? E haaŋ hɛ beŋ kɔita maa beŋ methota? E haaŋ hɛ masiyini ndeŋ maŋ mapimɔy? 18Beŋ kiŋ iŋ thaaya kɛrɛ beŋ kuita. Beŋ kiŋ iŋ ŋaiha kɛrɛ beŋ yuyeta.#Yɛr 5:21; Isi 12:2; Maki 4:12 E beŋ piitɔy 19naa thinkinuwande yaŋ nde ŋatoŋ ŋasɔhi ŋaŋ ba lamgbeŋ wuluiŋ bisɔhi? Tima nde thadebe tha thiŋɛ naa ŋutunuwande beŋ magbanthi maŋ?”

Bindɛ ni niŋ yaabi, na “Kɔhi iŋ thaye.”

20Yisɔs thɔnthɔŋɔŋ hɛlɛŋ bindɛ, na “Naa thinkinuwande yaŋ ŋatoŋ ŋasɔŋ-ŋaye ŋaŋ ba biya wuluiŋ binaŋ beŋ, tima thadebe tha thiŋɛ naa ŋutunuwande beŋ magbanthi maŋ?”

Bindɛ ni niŋ yaabi, na “Thasɔŋ-thaye.”

21Yisɔs thɔnthɔŋɔŋ bindɛ, na “E haaŋ hɛ beŋ methota?”

Yisɔs puyi hati lamgba wo mankɔy thaaya ka Bɛthɛseda

22Naa tɛŋ bindɛ ka mɛti ba ka Bɛthɛseda, biya binɔndi kati ka Yisɔs ka hati lamgba wo mankɔy thaaya e bindɛ niŋ theteke ba ndɛ niŋ tɔpina yɔnkɔ. 23Yisɔs bohe kugbeke ku ka hati lamgba wo mankɔy thaaya woŋ e niŋ fuŋuta ka mɛti ka. Kɛna thuthe Yisɔs thaaya tha ka hati lamgba woŋ thaŋ e niŋ boheke, e niŋ thɔnthiŋina, na “E yi kuteŋ ntha?”

24Hati lamgba woŋ ŋayaŋ yaha e detha e dɔma, na “Ndo, yaŋ kuteŋ biya beŋ, kɛrɛ bi thɔyande nɔŋ ka ŋayeŋ kaande.”

25Yisɔs boheke hɛlɛŋ thaaya tha ka hati lamgba woŋ thaŋ. Ka lɔkɔ baŋ baŋ nda hati lamgba woŋ punke mayina wumandiŋ. Thaaya nama thaŋ pɛthɔy, awa ndɛ kute ntha yo ntha nagberekethe. 26Yisɔs dome ba ndɛ duwa kɛnama ka e ndɛ niŋ tepe, na “Ba nda hɛlɛŋ tɛŋ ka mɛti ba ka Bɛthɛseda ka baŋ.”

Pita tɔŋɔŋ na Yisɔs

(Mathiyu 16:13-20; Luku 9:18-21)

27Yisɔs pɛyɛŋ kɛndɛ ba kaa ka kirinkiri hu thuriye ka mɛti ba ka Sɛsariya Filipay. Naa bindɛ key, ndɛ thɔnthɔŋɔŋ bindɛ, na “Tepeŋ hɛ yama, nama biyamɛti dɔŋ na yaŋ?”

28Huna tepe bindɛ ka Yisɔs, na “Binɔndi bi kɔŋ dɔŋ na yina Yɔni wo Babiye woŋ; binɔndi bi kɔŋ dɔŋ na yina Nabi Ilaiya; awa binɔndi bi kɔŋ dɔŋ na wunthe na yi ka banabiŋ bihɛna beŋ.”#Maki 6:14-15; Luku 9:7-8

29Huna dome ndɛ kɛnamɛŋ, na “Kɛrɛ, mbu nda beŋ? Nama beŋ dɔŋ na yaŋ?”

Pita ni niŋ yaabi, na “Yina Banikisi wo niyo nde lahiri woŋ.”#Yɔni 6:68-69

30Kɛna yeli ndɛ bakarandeni beŋ wukahɛ-kahɛ, na “Baŋ tepe wɔ yo wɔ ba dɔma na yama ndɛ.”

Yisɔs tepe bakarandeni beŋ ba nambarɛŋ mɛnɛ tuka nama haŋ

(Mathiyu 16:21-28; Luku 9:22-27)

31Ka lɔkɔ babɛina, Yisɔs sɛsi ba tepe bakarandeni nama beŋ nagberekethe ba dɔma, na “Yɔkɔŋ Hati ka Wɔ woŋ be niya nambara wumandiŋ e ndɛ buuhuwo iŋ bakalani bibayahɛŋ beŋ, bafodeni bibukuyuwɛ beŋ, mɛnɛ karimɔkɔiŋ bi ka Siraŋ baŋ beŋ. Yaŋ kɔŋ kɔra, kɛrɛ ka gbɛɛŋ wo tɛŋinɛ wotaati woŋ, yaŋ kɔŋ hɛlɛŋ ŋayina ka tuka haŋ e yaŋ hɛlɛŋ niyɔ iŋ sii.” 32Naa thanki ndɛ tepe bindɛ haŋ haŋ nagberekethe, Pita thiyi niŋ ka bindɛ biye e niŋ pinda ba hu tepe ndɛ haŋ. 33Huna dethe Yisɔs mahɛŋ ka bakarandeni beŋ e dɔma ka Pita, na “Gbɔniyɔkɔ yama Pita, yindo sɛkithɛ kufɛŋ ku ka Sithani koŋ. Masiyi makɛnda maŋ maŋ tha ŋaye ka Masaala, kɛrɛ ka kufɛŋ ku ka wɔmɛti kɛna ŋaye mɛŋ.”

34Kɛna thiyi Yisɔs sɛthɛ baŋ mɛnɛ bakarandeni nama beŋ kɛnama ka e bindɛ tepe, na “Mɛnɛ wɔ kiŋ ba yama yema, yɔkɔŋ ndɛ be thambo munki mu ka fado mu thimo ndɛ muŋ, e ndɛ thunkuteke nambarɛŋ ba niŋ pɛnki ba thɔyande nɔŋ kuyeŋ kubariŋande koŋ, e ndɛ yama yema.#Math 10:38; Luku 14:27 35Wɔ yo wɔ wo yɔli ba kɔsina sii nama baŋ ka yɛthɛ nama, ndɛ kɔŋ bɛŋ piriŋiŋ; awa wɔ yo wɔ wo piriŋiŋ sii nama baŋ saathɛ ba kiyaŋ mɛnɛ ba Huseri Huyɔhɔy haŋ, ndɛ kɔŋ kutu sii.#Math 10:39; Luku 17:33; Yɔni 12:25 36Munahaŋ ndo ka wo wɔmɛti kutu ba piriŋina sii nama baŋ haliko ba kuta munki mu ka faido muŋ fooma. 37Ntha yo ka ki wɔmɛti dunkuŋ ba kuta sii nama baŋ hɛlɛŋ. 38Mɛnɛ wɔ niyɔy yama kuyaahu mɛnɛ mathanani niŋ maŋ ka yamana wo thiŋo iŋ hakɛ woŋ baŋ, yaŋ, Hati ka Wɔ woŋ, yaŋ kɔŋ nɔŋ niŋ niyɔ kuyaahu naa yaŋ see iŋ yiki ba ka Fandaŋ woŋ baŋ mɛnɛ malekɛŋ nama beŋ.”

Currently Selected:

Maki 8: LMBNT

Highlight

Copy