Maki 5

Yisɔs puyi hati lamgba wo bɔhɔy iŋ wayi

(Mathiyu 8:28-34; Luku 8:26-39)

1Yisɔs iŋ bakarandeni nama beŋ thuhande mankɔ ma ka Kalili maŋ ka kuyɛkɛŋ ku ka Kɛrasa. 2Ka wuthurɔy wu fuŋ Yisɔs ka gbe baŋ wuŋ, wundɛ pɛnkande iŋ hati lamgba wunthe wo ŋaye ka ŋathaŋ ŋa ni biya nɔŋ thayoma. Hati lamgba woŋ baŋ kiŋ iŋ wayi wonɛnɔy, 3awa ka ŋathaŋ ŋaŋ kɛna yikiya bakɛnama baŋ. Awa wɔ yo wɔ ka nda wo niŋ punku lɔŋa iŋ yɔlɔnkɔiŋ. 4Timo tima ti ndɛ lɔŋa iŋ yɔlɔnkɔiŋ mɛnɛ thawɛ ka ŋathaki mɛnɛ ka thɛnkɔ nama thaŋ, wundɛ kɔŋ thenki yɔlɔnkɔiŋ baŋ nagbede-gbede mɛnɛ thawɛ tha ka ŋathaki nama ŋaŋ thaŋ. Wundɛ kiŋ nde iŋ sɛmbɛ bamandiŋ haaŋ wɔ yo wɔ ka nda wo niŋ punku kahiteke. 5Gbɛɛŋ iŋ piripiri wundɛ kiŋ ka thayoma ka mɛnɛ ka ŋasɛri ŋaŋ ka kaa kaŋ bɛndɔkɔ iŋ kaŋ yɔminɔkɔ iŋ tharaka.

6Naa wundɛ ka thokiye, wundɛ kute Yisɔs na. Kɛna thare wundɛ e ka ŋɔta ka kɔtɔkɔy ka ŋathaki ŋa ka Yisɔs ŋaŋ. 7-8Kɛna ni Yisɔs wayi woŋ yamari ba dɔma, na “Wayi wonɛnɔy woŋ, fuŋa ka hati lamgba woŋ baŋ.” Huna berine hati lamgba woŋ sampɛrɛŋ batɔɔkɛ e tɛpa, na “Yisɔs, Hati ka Masaala wo ka thinthi-ka thinthi woŋ nthɔŋ nda fooma. Mbɛ mu yi ba yama niya? Ka keŋ ku ka Masaala koŋ, yaŋ theteke yina, ba yama gbasaŋati.”

9Kɛna thɔnthɔŋɔŋ niŋ Yisɔs, na “Mbɛ keŋ nda?”

Hati lamgba woŋ ni niŋ yaabi, na “Keŋ niŋ koŋ kuna dɔma Sɛthɛ, baa miŋ abɔyi.” 10Wundɛ key ka kɔtɔkɔy ba theteke Yisɔs na ba wundɛ be tha fuŋutu mbayiŋ beŋ ka kirinkiri hubɛina.

11Ka lɔkɔ babɛina kubɛri ku kɔsɛŋ ku kɔŋ nde kɛndɛ thɛri ka ŋasɛri ŋaŋ kuwaŋ. 12Huna theteke mbayiŋ beŋ Yisɔs na ba dɔma, na “Ŋinda mina ka kɔsɛŋ beŋ beŋ. Niya ba miŋ bindɛ ka thɔɔ.” 13Huna tepe Yisɔs ka mbayiŋ beŋ, na “Kaaŋ.” Kɛna fuŋ mbayiŋ beŋ ka hati lamgba woŋ e bindɛ ka thɔɔ ka kɔsɛŋ beŋ. Kubɛri kubunthu koŋ fooma ku bɛrɛ ba wuluiŋ biye see kaŋ thara ka kudunku koŋ e bindɛ si gbantɔkɔ ka mankɔ maŋ.

14Naa kute wuŋ bidethiteke kɔsɛŋ beŋ, bindɛ thare ka mɛti ka iŋ ka dumgbuiŋ baŋ kaŋ tepe biya muŋ fooma bɛyiniŋ ba thankɛ niyɔ baŋ. Awa biya beŋ fooma key ba ka detha ba thankɛ niyɔ baŋ. 15Naa tɛŋ bindɛ ka Yisɔs ka, bindɛ penke nda hati lamgba wo nɔŋ iŋ mbayiŋ beŋ woŋ doŋe nda nayeeŋ, e thɔɔ muthɔɔ, e ndɛ nda niyɔ iŋ masiyi makele. Awa bindɛ fooma payɔy. 16Bindɛ bi thankɛ kuta bɛyiniŋ ba thankɛ niyɔ baŋ beŋ key kaŋ teepuwe biya beŋ ba thankɛ niyɔ ka hati lamgba wo nɔŋ iŋ mbayiŋ beŋ woŋ, mɛnɛ ba thankɛ niyɔ ka kɔsɛŋ beŋ.

17Kɛna theteke bindɛ Yisɔs na ba ndɛ be pɛyɛŋ bompi namɛŋ woŋ e ndɛ kaa ka hɛna.

18Naa bohe Yisɔs thɔɔ ka gbe baŋ, hati lamgba wo nɔŋ iŋ mbayiŋ beŋ woŋ theteke niŋ ba dɔma, na “Yaandi diŋa yama ka kaa.”

19Kɛrɛ Yisɔs tha mɛyi ba niŋ diŋa ka kaa. Atepe ma niŋ ba dɔma, na “Duwa ka banka nda, ka mpoo kikɛnda kiŋ, e yi bindɛ ka tepe ba thanki yina Mariki woŋ niyiyɛ baŋ, iŋ na nɔŋ ndɛ wɔ yɔhɔy kɛnda.”

20Huna hati lamgba woŋ pɛyɛŋ kɛndɛ e kaa kaŋ tɛɛpuwa ka Mɛtiŋ Kɔhi baŋ ba thanki niŋ Yisɔs niyiyɛ baŋ. Awa bi yuyɛ bɛyiniŋ baŋ baŋ beŋ fooma ni thakaba wumandiŋ.

Hati yɛrɛmɛ woyete wo ka bayaha mɛnɛ hati yɛrɛmɛ wo boheke Yisɔs na yaba baŋ woŋ

(Mathiyu 9:18-26; Luku 8:40-56)

21Kɛna thuhande hɛlɛŋ Yisɔs thuhaŋ mankɔ maŋ. Kɛndɛ ka kufɛŋ kubɛyna, sɛthɛ babɔyɛ key niŋ pɛnkande. 22Kɛna see Yairɔsi wo nde wunthe ka bayahɛŋ bi ka banka bathuŋuyande ba ka biYusu beŋ baŋ ka Yisɔs. Naa kute ndɛ Yisɔs na, ndɛ ŋɔti ka kɔtɔkɔy ka ŋathaki nama ŋaŋ, 23e theteke niŋ wumandiŋ e tɛpa, na “Hatiŋ woyɛrɛmɛ woyete kɔŋ thoona ŋoye nda ma tuke. Yaandi kaa, yi be niŋ ka tutu yɔnkɔ nda haŋ, ndɛ kɔŋ pethɔ nagbelebe.”

24Yisɔs bohe kaa iŋ wundɛ. Naa bindɛ key, biya bibɔyɛ yeme bindɛ ka kaa haaŋ e bindɛ nda nɔthita Yisɔs na kufɛŋ iŋ kufɛŋ.

25Naa bindɛ key, hati yɛrɛmɛ wunthe kiŋ nde kɛndɛ wo iŋ nthoonaŋ ki ka yɛrɛmɛŋ ba thanina kɔhi iŋ thaye. 26Hati woyɛrɛmɛ woŋ baŋ yole nda puyo iŋ bapuyini bibɔyɛ. Awa ndɛ thanki thiya kɔbiri nama woŋ fooma ka nthoonaŋ kiŋ kiŋ baŋ. Kɛrɛ kuhita o ka. Nthoonaŋ kiŋ akey ka kɔtɔkɔy thuŋ ka nɛnɔ. 27Naa yuye wundɛ ba Yisɔs, wundɛ yeme sɛthɛ ba mahɛŋ ma ka Yisɔs 28e dɔma ka yɛthɛ nama, na “Hali hɔkɔŋ aboheke na yaŋ yaba nama baŋ, yaŋ kɔŋ pethɔ.”

29Ka wuthurɔy wu boheke wundɛ yaba ba ka Yisɔs baŋ, wasi baŋ pɛyi niŋ fuŋa haŋ. Awa wundɛ kutɔkɔy hɛlɛŋ ka yɛthɛ bakɛnama baŋ ba wundɛ pethɔ ka thɔɔrɔiŋ nama baŋ fooma. 30Ka thagbɛmgbɛŋ thabɛina Yisɔs kutɔkɔy ba dɔma na sɛmbɛ banɔndi fuŋ niŋ. Huna sikiyeke ndɛ mahɛŋ ka sɛthɛ baŋ e thɔnthiŋina, na “Nkaana boheke yaba niŋ baŋ?”

31Bakarandeni nama beŋ ni niŋ yaabi ba dɔma, na “Yi kuteŋ na pɛnkande yina biya beŋ e bindɛ yina kɔ nɔthita. E dɛɛna yi thɔnthɔŋɔŋ ba wo boheke yina?”

32Kɛrɛ Yisɔs key ka kɔtɔkɔy ka yila thaaya ba kɔthɔ wo boheke niŋ woŋ. 33Hati woyɛrɛmɛ woŋ thanki kɔthɔ nafeu ba niyɔ niŋ baŋ. Kɛna key ndɛ kaŋ thɛna iŋ payɔ humandiŋ e ka kunthuŋa ka kɔtɔkɔy ka Yisɔs e niŋ tepe nɔndi baŋ fooma. 34Huna dome Yisɔs kɛnama, na “Hatiŋ woyɛrɛmɛ, lanɛya bakɛnda baŋ ni ba yi pethɔ. Bɛna kaa ka thɛbina thukuma, e yi ka hɛmuwa niyɔ thɔɔrɔ haŋ.”

35Naa nde hintiŋ Yisɔs gbonkoy bɛyiniŋ baŋ baŋ, baseriŋ binɔndi see ŋaye ka banka ba ka Yairɔsi baŋ e bindɛ niŋ tepe, na “Hati nda woyɛrɛmɛ woyete woŋ tuku. Mbɛ ba hɛlɛŋ yi niye karimɔkɔ woŋ thɔɔrɔ?”

36Kɛrɛ Yisɔs tha bindɛ poniyɛ kuiha hu bindɛ gbonkoy haŋ. Adɔmɛ ma ka Yairɔsi, na “Ba payɔ, niya hɔkɔŋ lanɛya.” 37Naa bathɔy Yisɔs ba kaa ka banka ba ka bayaha woŋ ka, ndɛ tha mɛyi ba wɔ yo wɔ wohɛna niŋ yema ka kaa, yɔkɔŋ Pita, mɛnɛ Yemisi, mɛnɛ wɛndama Yɔni. 38Awa naa tɛŋ bindɛ ka banka ba ka bayaha woŋ baŋ, bindɛ penke kɛndɛ nayathire e biya kɔ berina wubɔyɛ. 39Kɛna biyande Yisɔs ka banka ka e ndɛ bindɛ thɔnthiŋina, na “Mbɛ kɔnthɔhili wo beŋ thiyi woŋ? Mbɛ hu beŋ berine? Hati woŋ tuketa; nine ma nine.”

40Naa yuye huŋ biya beŋ, bindɛ bohe hɛtha Yisɔs na. Kɛna funkutu ndɛ bindɛ ka gbada ka. Wundɛ biyande kaake iŋ fanda hati woŋ, nandama, mɛnɛ bakarandeni nama bitaati beŋ ka makonko maŋ ka ŋoye hati woŋ ka. 41Wundɛ key niŋ bohi yɔnkɔ e gbonkiye niŋ ka huyuŋ namɛŋ haŋ, na “Talitha kumi,” wu thalitando ba dɔma, na “Hati woyete, yaŋ tepe yina, ŋayi ka kɔɔ.”

42Ka thagbɛmgbɛŋ thabɛina hati woŋ ŋaye ka kɔɔ e wundɛ bɔha kaande. Wundɛ sekithe nde nda thanina kɔhi iŋ thaye. Naa niyɔy bɛyi baŋ baŋ, bindɛ ni thakaba wumandiŋ. 43Kɛrɛ Yisɔs yeli bindɛ wukahɛ-kahɛ ba bi be tha huŋ tepe wɔ yo wɔ. Awa wundɛ tepe nandama na, na “Nkaa niŋ muthɔma, ndɛ be thɔŋ.”

Currently Selected:

Maki 5: LMBNT

Highlight

Copy