Maki 15

Yisɔs kato ka Pailɛti ka

(Mathiyu 27:1-2, 11-14; Luku 23:1-5; Yɔni 18:28-38)

1Kuputhɔ ku kaŋ sanka-sanka, bafodeni bibukuyuwɛ beŋ, bakalani bibayahɛŋ beŋ, karimɔkɔiŋ bi ka Siraŋ baŋ beŋ, mɛnɛ bakaamani beŋ fooma thuŋande ka tha banthe e bindɛ bɔha madɛɛnki. Bindɛ bohe Yisɔs na, e bindɛ niŋ lɔŋa iŋ yɔlɔnkɔiŋ, e bindɛ niŋ kata ka Pailɛti ka, wo ŋindo nde ba niyɔ bakɛrɛŋ woŋ iŋ biRomaŋ beŋ. 2Naa kute niŋ Pailɛti, ndɛ thɔnthɔŋɔŋ niŋ, na “E yina gbaku wo ka biYusu beŋ woŋ?”

Yisɔs ni niŋ yaabi, na “Na tepe nda nɛŋ yi.”

3Bafodeni bibukuyuwɛ beŋ tepiye Yisɔs na bɛyiniŋ babɔyɛ ba niŋ sɔkinɔkɔ. 4Kɛna thɔnthɔŋɔŋ hɛlɛŋ niŋ Pailɛti, na “E yi ka iŋ hu yi tɛpi? Pona hɛ kuiha bɛyiniŋ babɔyɛ baŋ baŋ fooma ba yi tɛpiya baŋ.”

5Yisɔs tha hɛlɛŋ niŋ sikiniyande sɔkɔ yo sɔkɔ. Awa Pailɛti ni thakaba wumandiŋ.

Yisɔs dunkuno mathonko ba koro

(Mathiyu 27:15-26; Luku 23:13-25; Yɔni 18:39—19:16)

6Nina yo nina naa biYusu beŋ siyi malɔkɔ ma puntiyando nde bindɛ iŋ maleka woŋ, Pailɛti kiŋ nde iŋ mabari ma ka pɛniyɛ biya beŋ wɔ lɔŋɔy wunthe wo bindɛ yɛthi woŋ. 7Ka lɔkɔ babɛina, hati lamgba wunthe kiŋ nde kɛndɛ wo lɔŋɔy, wo dɔma Barabasi. Awa wundɛ kiŋ nde wɔ wunthe ka bi kɔrɛ wɔmɛti beŋ ka dekiya ma sɔkinɔkɔ makɛrɛŋ maŋ. 8Naa kɔmande sɛthɛ baŋ ka tha banthe, bindɛ thɔnthɔŋɔŋ Pailɛti na ba mabari ma ka kuta nkinikiniŋ kiŋ maŋ. 9Pailɛti thɔnthɔŋɔŋ bindɛ ba dɔma, na “E beŋ thimoŋ ba yaŋ bena pɛniyɛ gbaku wo ka biYusu beŋ woŋ?” 10Wundɛ kɔthɛŋ nagberekethe ba dɔma na ka hunaŋ kɛna kate bafodeni bibukuyuwɛ beŋ Yisɔs na kɛnama ka.

11Kɛrɛ bafodeni bibukuyuwɛ beŋ heŋite sɛthɛ baŋ ba bindɛ thɔnthiŋina ba peniyo Barabasi na. 12Pailɛti thɔnthɔŋɔŋ hɛlɛŋ sɛthɛ baŋ, na “Nama thimo beŋ ba yaŋ niya wo beŋ dɔŋ woŋ na gbaku wo ka biYusu beŋ woŋ?”

13Bindɛ fooma thiye masɔnkɔ, na “Yanta niŋ ka kuyeŋ kubariŋande koŋ ba kɛndɛ tuke.”

14Pailɛti thɔnthɔŋɔŋ bindɛ, na “Mbɛ banɛnɔy ba ni ndɛ?”

Kɛrɛ bindɛ yame ntiŋ thiya masɔnkɔ, na “Yanta niŋ ka kuyeŋ kubariŋande koŋ ba kɛndɛ tuke.”

15Pailɛti pɛniyɛ bindɛ Barabasi na, baa ndɛ thimoŋ nde ba yehina sɛthɛ baŋ thathukuma. Wundɛ ni ba Yisɔs tawo e wundɛ niŋ dunkuna ba wundɛ be ka yanta.

Kurugbani beŋ thothe Yisɔs na dɛkuiŋ

(Mathiyu 27:27-31; Yɔni 19:2-3)

16Kurugbani beŋ biiti Yisɔs na kaake ka banka ba ka bakɛrɛŋ woŋ baŋ. Kɛna thiyande bindɛ fooma. 17Bindɛ thiye niŋ kuhɔli ku niyɛ maŋ pothita, e bindɛ yehinuwa nɛmu maŋaye ka bathalɛŋ bibasoi, e bindɛ niŋ tuta Yisɔs na ka yaha. 18Kɛna bohe bindɛ niŋ maana e bindɛ kɔ dɔma, na “Yindo gbaku wo ka biYusu beŋ woŋ, haliko yi thɔɔkuwa sii.” 19Bindɛ hɔrɔni niŋ kuyeŋ ka yaha, e bindɛ niŋ kɔ thuthe. Bindɛ bohe kaa kaŋ puutuwɔ ka kɔtɔkɔy e bindɛ niŋ kɔ kunthuŋuyɛ. 20Naa thanki bindɛ niŋ thɔtha dɛkuiŋ, bindɛ ŋututu niŋ kuhɔli ku niyɛ maŋ pothita koŋ, e bindɛ niŋ hɛlɛŋ thiya yaba nama baŋ. Kɛna fuŋutu bindɛ niŋ ba niŋ ka yanta ka kuyeŋ kubariŋande koŋ ba niŋ kɔra.

Yisɔs koro ka kuyeŋ kubariŋande koŋ

(Mathiyu 27:32-44; Luku 23:26-43; Yɔni 19:17-27)

21Naa kurugbani beŋ key ba ka yanta Yisɔs na, bindɛ pɛnkande iŋ hati lamgba wunthe wo dɔma na Saimɔŋ, wo nde biyande ka mɛti bamandiŋ ba ka Yɛrusalɛmi baŋ. Kɛna pithite niŋ kurugbani beŋ ba ndɛ be kati kuyeŋ kubariŋande ku nde Yisɔs kati koŋ. Saimɔŋ woŋ baŋ wɔ na nde wo ŋaye ka mɛti ba ka Sairini, awa wundɛ na nde fanda ka Alɛsanda mɛnɛ Rufɔsi.#Rom 16:13 22Bindɛ kati Yisɔs na ka tha ka dɔma na Kɔlɔkɔtha, wu thalintando ba dɔma, na “Ka tha ka kugbomgbokoro ku ka yaha.” 23Kɛna yole bindɛ ba niŋ dunkune mampa ma tikitinuwando iŋ tɛɛni ba dɔma na mari ba ndɛ be thiiye, kɛrɛ Yisɔs tha mɛyi ba mɛŋ thiiye. 24Kɛna yanti bindɛ niŋ ka kuyeŋ kubariŋande koŋ. Naa thanki bindɛ niŋ yanta, bindɛ hanande yabɛŋ nama baŋ kaŋ yɛla makoro ba womo woma be kutu bakɛnama.#Ŋaiŋa 22:18 25Bɛrɛ ba ka matheyani yanti na bindɛ niŋ. 26Kɛna gbale bindɛ bɛyiniŋ ba gbonkiyo baŋ ba niŋ sɔkinɔkɔ. Magbali maŋ tepe ba dɔma, na “Gbaku wo ka biYusu beŋ woŋ.” 27Ka lɔkɔ ba yanto Yisɔs ka kuyeŋ kubariŋande koŋ, biya biye bi tha putiyɔ siraŋ yanto nde hɛlɛŋ ka ŋayeŋ ŋabariŋande ka lɔkɔ babɛina, wunthe ka yɔnkɔ huthome haŋ, wunthe ka hupɔkɔdɔ haŋ. [28Awa magbali maŋ see niyɔ nɔndi ma tɛpɛ maŋ ba wuŋ niyɔ, na “Wundɛ kɔŋ kɔnditando iŋ bithinkɛ siraŋ baŋ beŋ.”]

29Ka lɔkɔ babɛina hanimaa bi daŋande nde kɛndɛ beŋ akey kaŋ yila thankaha kaŋ hɛtha Yisɔs na#Ŋaiŋa 22:7; 109:25 e gbonkiya wunɛnɔy ba wundɛ, e bindɛ kɔ dɔma, na “Ahaaŋ! Yindo dɔmɛ nde na yi kɔŋ teeti yikiya ba ka Masaala baŋ, e yi hɛlɛŋ bɛŋ thanka thoya ka gbɛɛŋ wo tɛŋinɛ wotaati woŋ.#Maki 14:58; Yɔni 2:19 30Bɛna thuha hɛ ka kuyeŋ kubariŋande koŋ e yi niyɔkɔ kisi.”

31Hali hɛlɛŋ bafodeni bibukuyuwɛ beŋ mɛnɛ karimɔkɔiŋ bi ka Siraŋ baŋ beŋ athɔɔtɔ ka thɔtha Yisɔs na dɛkuiŋ e bindɛ dɔma, na “Ndɛ ni biya bihɛna kisi, kɛrɛ ndɛ sa punku niyɔkɔ kisi. 32Miŋ kutɛŋ hɛ Banikisi wo niyo nde lahiri woŋ, wo dɔma gbaku wo ka Isirɛli woŋ, be thuhu ka kuyeŋ kubariŋande koŋ tete, wuna miŋ niŋ ni lanɛya.”

Hali hɛlɛŋ biya biye bi tha putiyɔ siraŋ bi yanto iŋ wundɛ ka nanthe beŋ gbeeŋ bindɛ gbonkoy hɛlɛŋ wunɛnɔy ba Yisɔs.

Tuka hu ka Yisɔs haŋ

(Mathiyu 27:45-56; Luku 23:44-49; Yɔni 19:28-30)

33There ka hatɔ teete huntuma humandiŋ huna lɔŋande nde ka kuyɛkɛŋ kubɛyna. Huntuma haŋ haŋ niyɔy ba wakathiŋ bitaati. 34Ka wakathi wotaati woŋ, Yisɔs bereŋ iŋ thampa thatɔɔkɛ e dɔma, na “Iloy, Iloy, lama sabakathani?” wu thalintando ba dɔma, na “Masaala niŋ woŋ, Masaala niŋ woŋ, mbɛ hu baŋine yama yi?”#Ŋaiŋa 22:1

35Binɔndi ka biya bi kɔɔyɛ nde kɛndɛ kuwaŋ bi yuyɛ ndɛ si bereŋ beŋ dome, na “Hati lamgba woŋ baŋ kɔŋ thiyi Ilaiya na.” 36Wunthe ka biya beŋ thare yako e ka yɔthiŋita ntha ka mampa ma ba thanki yɔhɔ maŋ, e thɔtha kuyeŋ ka ntha kiŋ, e yekiniyɛ Yisɔs na ba ndɛ be sɔɔsi mɛŋ,#Ŋaiŋa 69:21 e dɔma, na “Yumbaŋ hɛ, miŋ dethɛŋ hɛ mɛnɛ Ilaiya kɔŋ see ba niŋ si niya kisi.”

37Kɛna yele Yisɔs thampa thatɔɔkɛ e ndɛ ntiŋ kɔ thathina.

38Thika babimɛ ba yanto nde ba hakinande biya beŋ iŋ makonko ma ka kupɛnkintiyande ku ka Masaala koŋ kaake ka banka bamandiŋ ba ka Masaala baŋ#Fuŋa 26:31-33 saayande mateete, ŋaye ka thinthi haaŋ athuhu ka pothi. 39Naa kute bayaha wo ka kurugbani beŋ wo kɔɔyɛ nde kɛndɛ ka kɔtɔkɔy ka kuyeŋ kubariŋande koŋ na tuke Yisɔs na, wundɛ dome, na “Hunɔndi yaathi, hati lamgba woŋ baŋ Hati ka Masaala na nde.”

40Yɛrɛmɛŋ binɔndi bi kiŋ ndɛ kɛndɛ ka koro Yisɔs ka bi kɔɔyɛ wuthokiye wuyete, thiitaŋ beŋ beŋ baŋ: Mariyama wo ŋaye nde ka mɛti ba ka Makadala, Salomi, mɛnɛ Mariyama nanda ka Yemisi wohatiyɛ mɛnɛ Yosesi. 41Bindɛ beŋ beŋ baŋ bina yeme nde Yisɔs na naa ndɛ ka kuyɛkɛŋ ku ka Kalili ba niŋ mase ka wali nama baŋ.#Luku 8:2-3 Yɛrɛmɛŋ bihɛna bibɔyɛ bi yeme nde niŋ ŋaye ka mɛti ba ka Yɛrusalɛmi bi kiŋ nde hɛlɛŋ nɛŋ kɛndɛ.

Mankuwo hu ka Yisɔs haŋ

(Mathiyu 27:57-61; Luku 23:50-56; Yɔni 19:38-42)

42-43Naa tɛŋ wuŋ mahɔnkɔlɛŋ, hati wathe wunthe see wo dɔma na Yusufu wo ŋaye ka mɛti ba ka Arimathiya. Wɔ na nde wundɛ wo thiyɔy yiki wumandiŋ ka Kaama wo ka biYusu beŋ woŋ, wo nde yumbu ba saa hu ka Hugbakine hu ka Masaala haŋ. Malɔkɔ mɛna nde saanuŋ Malɔkɔ Mahemuwe maŋ, malɔkɔ ma biya beŋ kosineke ba Malɔkɔ Mahemuwe maŋ. Kɛna key Yusufu iŋ thunka ka Pailɛti ka e niŋ ka thɔnthiŋina ba dunkuno kubeli ku ka Yisɔs koŋ ba niŋ mankuwa. 44Pailɛti ni thakaba wumandiŋ ba yuyɛ na Yisɔs thɔkɔti hɛ nda tuka. Kɛna thiyi ndɛ bayaha wo ka kurugbani beŋ woŋ e niŋ thɔnthiŋina mɛnɛ wuŋ nambe hɛ nda naa tuku Yisɔs. 45Naa thanki nthɔŋ Pailɛti yuyɛ kuna koŋ ka bayaha woŋ, wundɛ tepe Yusufu na ba ndɛ ka sɛkitha kubeli koŋ. 46Yusufu boye thika bahuhɛ e ka thathina kubeli koŋ, e kuŋ huitutuwa thika baŋ. Wundɛ key kuŋ manki ka yoma hu gbusiyo ndɛ ka kuthara koŋ haŋ nɔŋ makonko. Kɛna binkiliŋ wundɛ raka humandiŋ e ndɛ huŋ ŋatha ka biyo hu ka yoma haŋ. 47Ka lɔkɔ babɛina, Mariyama wo ka Makadala mɛnɛ Mariyama nanda ka Yosesi bi kiŋ nde kɛndɛ kuwaŋ ba detha ka taye bindɛ Yisɔs na.

Currently Selected:

Maki 15: LMBNT

Highlight

Copy