Mathiyu 8
8
Yisɔs puyi hati lamgba wo iŋ nthoonaŋ kinɛnɔy ki bohe ka kɔtɔ ku ka wɔmɛti ka thinthi
(Maki 1:40-45; Luku 5:12-16)
1Naa thuhe Yisɔs ŋaye ka kusɛri koŋ ka thinthi, sɛthɛ bamandiŋ yeme niŋ ka kaa. 2Awa kɛna see wɔ wunthe ka Yisɔs wo iŋ nthoonaŋ kinɛnɔy ki bohe ka kɔtɔ ku ka wɔmɛti ka thinthi e ndɛ kunthuŋa ka kɔtɔkɔy kɛnama e tɛpa, na “Hɛmɔŋ, mɛnɛ yi kɔŋ nde thimo ba yama puya, yi kɔŋ nde yama petheŋ.”
3Awa kɛna yekeŋ Yisɔs yɔnkɔ nama haŋ e ndɛ niŋ boheke, e tɛpa ka hati lamgba woŋ ba dɔma, na “Yaŋ kɔŋ yina petheŋ, awa pethɔ nda.” Ka thagbɛmgbɛŋ thabɛina nthoonaŋ kiŋ pethɔy hati lamgba woŋ baŋ. 4Kɛna tepe Yisɔs ka hati lamgba woŋ baŋ, na “Ba tepe wɔ yo wɔ ye, kɛrɛ kaa toloŋ e yi ka tɔŋinɔkɔ ka bafode woŋ, awa e yi fuŋuna saraka ba ni nde bena Musa yamari ba fuŋuna baŋ, ba tɔŋɔŋ ka biya beŋ ba yi pethɔ.”#Lɛb 14:1-32
Yisɔs puyi bawali wunthe
(Luku 7:1-10)
5Naa tɛŋ Yisɔs ka mɛti ba ka Kapaniyɔmi, bayaha wo ka kurugbani bi ka biRomaŋ beŋ woŋ see kɛnama, e niŋ theteke ba dɔma, 6na “Hɛmɔŋ, bawali wokiyaŋ ŋoyeŋ ka banka niŋ ka wogbɛsinkɔy wo kaho wumandiŋ.”
7Awa kɛna tepe Yisɔs kɛnama, na “Yaŋ kɔŋ key ba niŋ ka puya.”
8Naa yuye huŋ bayaha wo ka kurugbani beŋ woŋ, ndɛ tepe ka Yisɔs, na “Hɛmɔŋ, yaŋ teŋeta yi ba kaa ka banka niŋ ka. Niya hɔkɔŋ yamari. Bawali niŋ woŋ kɔŋ pethɔ. 9Yaŋ kɔthɛŋ na yi kɔŋ wuŋ punku niya, baa wɔ na yaŋ wo iŋ kurugbani bibɔyɛ bi yaŋ ni yamari. Yaŋ punkeŋ ba dɔma ka wunthe, na ‘Kaa,’ e ndɛ kaa; awa yaŋ kɔŋ dɔŋ ka wohɛna, na ‘Saa,’ e ndɛ saa; awa yaŋ kɔŋ dɔŋ ka bawali niŋ woŋ, na ‘Niya baŋ baŋ,’ e ndɛ bɛŋ niya.”
10Naa yuye Yisɔs na thanki hati lamgba woŋ gbonkiya, wuŋ niyɔy niŋ thɛrɛnaŋ e ndɛ tɛpa ka bi yemɛ niŋ beŋ ba dɔma, na “Hunɔndi yaathi, yaŋ tepe bena, hali hintiŋ ka biIsirɛli beŋ yaŋ kuita hɛ wɔ wo iŋ lanɛya nɔŋ hati lamgba woŋ baŋ. 11Yaŋ tepe bena, biya bimandiŋ bi kɔŋ nɔŋ see maŋaye kuwaŋ kubekede koŋ iŋ kuwaŋ kupothi koŋ e bindɛ dɔŋɔ ka thɔma ka tha banthe iŋ Ebrahim, Aisaki, mɛnɛ Yakuba ka huybakine hu ka ariana haŋ,#Luku 13:29 12kɛrɛ biya bi beŋ siyi beŋ ba bindɛ nda niyɔ ka huybakine hu ka Masaala haŋ bindɛ bina nɔŋ yɛla ka gbada ka, ka huntuma humandiŋ haŋ, ka biya thinkuwɔ thathukuma kɛ e bindɛ kɔ berina wuthoonɛ-thoonɛ.”#Math 22:13; 25:30; Luku 13:28 13Kɛna tepe ntiŋ Yisɔs ka bayaha wo ka kurugbani beŋ woŋ, na “Duwa ka banka nda. Haliko wu niyɔ nɛŋ ba yi maŋaye ka lanɛya nda baŋ.”
Naa thanki nthɔŋ nɛŋ Yisɔs gbonkiya, ka thagbɛmgbɛŋ thabɛina bawali wo ka bayaha woŋ pethɔy.
Yisɔs puyi biya bibɔyɛ
(Maki 1:29-34; Luku 4:38-41)
14Awa Yisɔs ŋaye kɛndɛ e ndɛ ka biyande ka banka ba ka bakarandeŋ nama woŋ Pita. Ka lɔkɔ babɛina, thɔnɔ wo ka Pita ŋoyeŋ kɛndɛ wo ŋɔtitɛ iŋ nthoonaŋ ki ka kɔtɔ kutɔɔkɛ. 15Yisɔs bohe yɔnkɔ nama haŋ awa ka thagbɛmgbɛŋ thabɛina kɔtɔ kutɔɔkɛ koŋ pethɔy niŋ. Kɛna ŋaye hati woyɛrɛmɛ woŋ baŋ e niya Yisɔs na barɛi.
16Ka mahɔnkɔlɛŋ mabɛina biya sisi ka Yisɔs biya bibɔyɛ bi bɔhɔy iŋ mbayiŋ. Yisɔs ni yamari e ndɛ kaninande bindɛ iŋ mbayiŋ beŋ, e ndɛ puya bithoonɔy beŋ fooma. 17Wuŋ baŋ niyɔy haliko ba thiŋina hu tepe nde banabi woŋ Aisaya haŋ ba dɔma, na “Ndɛ kɔŋ si tutɔkɔ nambarɛŋ bakɛntuŋ baŋ fooma, awa e ndɛ kata nthoonani kikɛntuŋ kiŋ fooma.”#Ais 53:4
Biya bi niye yeme Yisɔs na beŋ
(Luku 9:57-62)
18Naa kute Yisɔs na pɛnkando ndɛ iŋ sɛthɛ bamandiŋ baŋ, ndɛ ni bindɛ yamari ba bi be thuhande thuhaŋ mankɔ maŋ. 19Kɛna see wɔ wunthe ka bithanani Siraŋ baŋ beŋ kɛnama e tɛpa ka Yisɔs ba dɔma, na “Karimɔkɔ, yaŋ kɔŋ yina yeŋ komo kama ka yi key.”
20Huna tepe niŋ Yisɔs, na “Bayɔbɔini beŋ bi kiŋ iŋ yikiyani, awa bɛtiŋ bi keŋɛ beŋ bi kiŋ iŋ thahooti ka bindɛ hure. Kɛrɛ Hati ka Wɔ woŋ ka iŋ hintiŋ nthɔŋ ka ndɛ taye yaha nama haŋ.”
21Kɛna tepe hɛlɛŋ wunthe ka bakarandeni nama beŋ kɛnama, na “Karimɔkɔ, yaŋ kaayɛŋ hintiŋ, yaŋ be ka maanki fandaŋ na.”
22Huna tepe niŋ Yisɔs, na “Yema yama, pɛyɛna bitukɛ beŋ, awa bitukɛ beŋ bi kɔŋ maanki bikɛnamɛŋ bitukɛ beŋ.”
Yisɔs thɛbɛŋ huru humandiŋ haŋ
(Maki 4:35-41; Luku 8:22-25)
23Kɛna thɔɔyɛ Yisɔs ka gbe baŋ iŋ bakarandeni nama beŋ ba thuhande mankɔ maŋ. 24Naa bindɛ ka gbe baŋ, huru humandiŋ penke bindɛ ka mankɔ maŋ wuthinkande. Awa gbe baŋ bohe ba muluto iŋ thamunkulu thaŋ. Ka lɔkɔ babɛina Yisɔs ŋoyeŋ kɔŋ nine. 25Huna key bakarandeni beŋ thohine Yisɔs na e bindɛ dɔma, na “Niya mina kisi karimɔkɔ! Mɛnɛ huŋ kutɛ miŋ kɔŋ mɔmɔ.”
26Huna dome Yisɔs kɛnamɛŋ, na “Mbɛ hu beŋ payiye? Payɔ ndeŋ haŋ tɔŋɔŋ ba dɔma na beŋ kiŋ iŋ lanɛya bathahuwɔy.” Kɛna ŋaye Yisɔs ka kɔɔ e ndɛ pinda huru haŋ iŋ mankɔ maŋ. Kɛna thebe muŋ nayeŋ.
27Bindɛ fooma ni thakaba wumandiŋ e bindɛ dɔma, na “Mbɛ hati wowathe woŋ baŋ, wo hali hintiŋ huru haŋ iŋ mankɔ maŋ amɛyiyɛ niŋ yamari?”
Yisɔs puyi biya biye bi bɔhɔy mbayiŋ
(Maki 5:1-20; Luku 8:26-39)
28Naa thuhande bindɛ mankɔ maŋ e bindɛ tɛŋa ka kirinkiri hu ka mɛti ba ka Kadara, biya biye bi bɔhɔy mbayiŋ see kɛnamɛŋ ŋaye ka thayoma ka. Biya thunketa hintiŋ ba fuŋe gboŋa babɛina. 29Kɛna yele bindɛ thampa thatɔɔkɛ e bindɛ dɔma, na “Yindo Hati ka Masaala woŋ, mbɛ mu yi ba mina niya? E yi asee dondo baŋ ba mina si niya thɔrɔ mahɛŋ ma lɔkɔ baŋ teŋeta hɛ?”
30Ka lɔkɔ babɛina kubɛri ku kɔsɛŋ ku kɔŋ nde kɛndɛ thɛri kuwaŋ. 31Huna theteke mbayiŋ beŋ Yisɔs na ba dɔma, na “Mɛnɛ yi fuŋutu mina ka biya beŋ beŋ baŋ, yaandi niya ba miŋ ka thɔɔ ka kɔsɛŋ beŋ.”
32Huna tepe Yisɔs ka mbayiŋ beŋ, na “Kaaŋ.” Na kɛna key mbayiŋ beŋ thɔɔ ka kɔsɛŋ beŋ fooma kɛna gbantɔkɔy kubɛri kubunthu koŋ ka mankɔ ka e bindɛ tuukuwa ka mandi maŋ fooma.
33Naa kute wuŋ bidethiteke kɔsɛŋ beŋ, bindɛ thare ka mɛti ka e bindɛ ka tepe biya muŋ fooma bɛyiniŋ ba thankɛ niyɔ baŋ, iŋ ba niyɔy ka bi bɔhɔy mbayiŋ beŋ baŋ. 34Awa biya muŋ fooma ka mɛti ka key ba pɛnka Yisɔs na. Naa kute bindɛ niŋ, bindɛ theteke Yisɔs na ba ndɛ be pɛyɛŋ bompi namɛŋ woŋ e ndɛ kaa ka hɛna.
Currently Selected:
Mathiyu 8: LMBNT
Highlight
Share
Copy
Want to have your highlights saved across all your devices? Sign up or sign in
© The Bible Society of Sierra Leone, 2011
