Matyu 12
12
Dɛn Aks Jizɔs Kwɛshɔn bɔt di De we fɔ Pre ɛn Blo
(Mak 2:23-28; Lyuk 6:1-5)
1Wɛn dat pas, i nɔ te igen, wande we fɔ pre ɛn blo, Jizɔs ɛn in lanin bɔy dɛn bin de pas na wan kɔn fam. In lanin bɔy dɛn bin aŋri so dɛn brok di kɔn ɛn it am. 2Wɛn di Faresi dɛn si dat, dɛn tɔk to Jizɔs ɛn se, “Luk, yu lanin bɔy dɛn de du wetin di Lɔ se wi nɔ fɔ du di de fɔ pre ɛn blo.”
3Jizɔs aks dɛn se, “Una nɔ rid yet wetin Devid bin du, wɛn in ɛn dɛn man we bin de wit am bin aŋri? 4I go insay Gɔd in Os ɛn tek di bred we dɛn kin put bifo Gɔd, dɔn i ɛn di man dɛn we bin de wit am it di bred, pan ɔl we di Ju Lɔ se nɔbɔdi nɔ fɔ it da bred de pas dɛn man we de mek sakrifays fɔ pipul sin. 5Ɛn una nɔ rid di Ju Lɔ yet we tɔk bɔt aw dɛn man we de mek sakrifays fɔ pipul sin na Gɔd in Os, kin du ɛvri de fɔ pre ɛn blo, we dɛn kin brok di lɔ fɔ da de de; una min se dɛn nɔ bin de sin? 6A de tɛl una se, nyu lɔ de we pas Gɔd in Os ɛn ɔl wetin dɛn de du de. 7Dɛn rayt na Gɔd in Buk se, ‘A want mek una sɔri fɔ ɔda pipul ɛn du dɛn gud, a nɔ want dɛn bif sakrifays we una de mek!’ If una bin no wetin dɛn wɔd ya min, una nɔ bin fɔ kɔndɛm dɛn pipul we nɔ du bad. 8Mɔtalman Pikin na Masta fɔ di de fɔ pre ɛn blo.”
Jizɔs Mɛn Wan Man we in An Day
(Mak 3:1-6; Lyuk 6:6-11)
9Jizɔs kɔmɔt de, ɛn go na di Ju mitin os. 10Wan man bin lib de we in raytan day. Sɔm pipul aks Jizɔs se, “I rayt fɔ mɛn pɔsin di de fɔ pre ɛn blo?” Bikɔs dɛn bin want fɛn fɔlt wit am.
11Jizɔs ansa dɛn se, “Us wan pan una de we gɛt ship, we fɔdɔm insay ol di de fɔ pre ɛn blo, we nɔ go pul di ship kɔmɔt insay di ol? 12Mɔtalman pas ship fawe! So i rayt fɔ du gud di de fɔ pre ɛn blo.” 13Nain Jizɔs tɛl di man we in an day se, “Es yu an, tret am.”
Di man es in an ɛn tret am, nain di an wɛl lɛkɛ di ɔda wan. 14Di Faresi dɛn kɔmɔt de go ɛŋ ed aw fɔ kil Jizɔs.
Jizɔs Na di Man we Gɔd Pik fɔ Du In Wok
15Wɛn Jizɔs no se dɛn de plan fɔ kil am, i kɔmɔt de; plɛnti pipul fala am go. Jizɔs mɛn ɔl dɛn wan we bin sik, 16bɔt i tɛl dɛn nɔ fɔ tɛl ɛnibɔdi bɔt am. 17Jizɔs du dis so dat wetin di prɔfɛt Ayzaya bin tɔk go bi, Ayzaya bin tɔk se, Gɔd se, 18“Dis na di man we a dɔn pik fɔ du mi wok. A lɛk am ɛn a satisfay wit am bad. A go put mi Spirit insay am; ɛn i go tɛl ɔlman se wetin a tɔk, rayt. 19I nɔ go mek plaba, ɛn i nɔ go ala, i nɔ go tɔk lawd lawd wan na trit. 20I nɔ go du tin we go mɔna dɛn pipul we nɔ ebul ɛp dɛnsɛf, ɛn i nɔ go du bad to di wan dɛn we nɔ ebul du natin. I go de du ɔl dɛn tin ya sote pipul dɛn du wetin Gɔd in Lɔ se; 21ɛn ɔlman go abop pan am.”
Dɛn Se na Biɛlzibɔb Gi Jizɔs Pawa
(Mak 3:20-30; Lyuk 11:14-23)
22Sɔm pipul dɛn briŋ wan blɛnyay ɛn mumu man kam mit Jizɔs. Di man bin blɛn ɛn na bin mumu bikɔs dɛbul bin de insay am. Jizɔs mɛn am ɛn di man ebul fɔ tɔk ɛn si. 23Di mɛn we Jizɔs mɛn di man mek ɔlman wɔnda. Dɛn se, “Fɔ se dis man na Devid in pikin?”
24Wɛn di Faresi dɛn yɛri bɔt wetin Jizɔs du, dɛn se, “Na Biɛlzibɔb we na di dɛbul dɛn edman de gi am pawa fɔ drɛb dɛbul.”
25Jizɔs bin no wetin dɛn bin de mɛmba na dɛn at, so i se, “Ɛni kɔntri we di pipul dɛn de fɛt dɛnsɛf, da kɔntri de nɔ go las. Ɛn ɛni tɔŋ ɔ fambul we de fɛt dɛnsɛf, go pwɛl. 26Aw Setan in rul go tinap, if Setan in yon pipul dɛn de fɛt dɛnsɛf? 27Ɛn if na Biɛlzibɔb we na di dɛbul dɛn edman in pawa a de tek drɛb dɛbul; udat de gi dɛn pipul we de fala una, pawa fɔ drɛb dɛbul? Ɔl wetin dɛn de du de sho se una nɔ rayt. 28Nɔto Biɛlzibɔb de gi mi di pawa fɔ drɛb dɛbul, na Gɔd in Spirit. Dat sho se Gɔd in rul dɔn kam to una.
29“Nɔbɔdi nɔ go brok go insay pɔsin we trɔŋ in os ɛn tif in prɔpati, pas i tay di pɔsin fɔs; da tɛm de i kin tek ɔl di pɔsin in prɔpati.
30“Ɛnibɔdi we nɔ de fɔ mi de fɛt mi, ɛn ɛnibɔdi we nɔ de ɛp mi gɛda pipul fɔ mek dɛn kam to mi, na skata i de skata dɛn. 31Na dat mek a de tɛl una se, di de we Gɔd go jɔj ɔlman, i go padin ɛni bad tin we pɔsin du ɛn ɛni bad tɔk we i tɔk bɔt mi ɛn ɔda pipul; bɔt Gɔd nɔ go padin ɛnibɔdi we tɔk bad bɔt Gɔd in Spirit. 32Gɔd go padin ɛnibɔdi we tɔk sɔntin we nɔto tru bɔt Mɔtalman Pikin, bɔt Gɔd nɔ go padin ɛnibɔdi we tɔk bad bɔt in Spirit; i nɔ go padin am na dis wɔl, i nɔ go padin am na nɛks wɔl.
Di Tik ɛn di Tin we I de Bia
(Lyuk 6:43-45)
33“Na gud tik de bia gud tin fɔ it. Tik we nɔ gud nɔ de bia gud tin fɔ it. Una go no di tik bay di kayn tin we i de bia. 34Una dɛn snek ya! Aw una go tɔk gud we una na bad pipul? Wetin di at ful wit nain di mɔt de tɔk. 35Pɔsin we gud, de mɛmba gud nain at, dat de mek i tɔk gud tin; bɔt bad pɔsin de mɛmba bad nain at ɛn na bad tin i de tɔk.
36“A de tɛl una se, di de we Gɔd go jɔj di wɔl, ɔlman go tɛl Gɔd di kyalɛs wɔd dɛn we i bin dɔn tɔk. 37Na di wɔd dɛn we yu tɔk, Gɔd go tek fɔ jɔj yu ɛn nain go tɔk if yu gilti ɔ yu nɔ gilti.”
Dɛn Aks Jizɔs fɔ Du Wɔndaful Wok
(Mak 8:11-12; Lyuk 11:29-32)
38Sɔm Ju Lɔ ticha ɛn sɔm Faresi dɛn se, “Ticha, wi want mek yu du wan wɔndaful wok we go sho yu pawa.”
39Bɔt Jizɔs ansa dɛn se, “Dɛn tide pipul bad ɛn dɛn nɔ de fred Gɔd. Una de aks mi fɔ du wɔndaful wok, bɔt a nɔ go du am. Una nɔ go si ɛni wɔndaful wok pas di wan we bin dɔn bi to prɔfɛt Jona. 40Lɛkɛ aw prɔfɛt Jona bin de tri de ɛn nɛt na di big fish in bɛlɛ, na so dɛn go bɛr Mɔtalman Pikin, ɛn i go de tri de ɛn nɛt ɔnda di grɔn. 41Di de we Gɔd go jɔj ɔlman na wɔl, dɛn pipul we bin de na Ninivɛ di tɛm we Jona bin de, go grap ɛn tɛl una se, una dɔn du bad; bikɔs dɛn bin lɛf fɔ du bad wɛn prɔfɛt Jona tɛl dɛn Gɔd in wɔd; ɛn a de tɛl una se, pɔsin de na ya we pas Jona. 42Di de we Gɔd go jɔj ɔlman na wɔl, di kwin na Shiba go grap ɛn tɛl una se una dɔn du bad; bikɔs i bin lɛf in kɔntri we de fawe fɔ go yɛri di sɛns we Sɔlɔmɔn de tɔk wit. Bɔt pɔsin de na ya we pas Sɔlɔmɔn!
Di Pɔsin Wɔs Pas Aw I Bin Tan
(Lyuk 11:24-26)
43“Wɛn dɛbul dɔn kɔmɔt insay pɔsin, i go waka-waka ɔlɔbɔt na dɛn dray ples fɔ fɛn ples fɔ blo, bɔt if i nɔ fɛn ples, 44i go se, ‘A go tɔn bak go na mi os we a bin de.’ Ɛn wɛn i tɔn bak go na di ples, i nɔ go mit natin insay de, i go mit de klin ɛn fayn. 45I go go bak go briŋ ɔda sɛvin dɛbul we bad pas insɛf. Dɛn ɔl go tap insay de; so di pɔsin in kɔndishɔn go bad pas aw i bin tan fɔs. Na so i go tan fɔ dɛn tide pipul ya we bad so.”
Jizɔs In Mama ɛn In Brɔda dɛn
(Mak 3:31-35; Lyuk 8:19-21)
46Jizɔs bin stil de tɔk to di pipul dɛn, nain in mama ɛn in brɔda dɛn kam tinap na do, dɛn se dɛn want fɔ tɔk to Jizɔs. 47So wan pɔsin na di krawd se, “Yu mama ɛn yu brɔda dɛn tinap na do, ɛn dɛn want fɔ tɔk to yu.”
48Jizɔs se, “Una no udat na mi tru mama ɛn mi tru brɔda dɛn?” 49I pɔynt to in lanin bɔy dɛn ɛn se, “Na dɛn wan ya, na dɛn na mi tru mama ɛn tru brɔda dɛn! 50Ɛnibɔdi we du wetin mi Papa we de na ɛvin want am fɔ du, nain na mi tru sista ɛn brɔda ɛn mama!”
Currently Selected:
Matyu 12: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
