Lyuk 21

Wan Uman we In Man Dɔn Day Gi Ɔl In Kɔpɔ

(Mak 12:41-44)

1Jizɔs bin de luk, na de i si dɛn jɛntri pipul de kam put mɔni insay di mɔni bɔks we bin de na Gɔd in Os. 2Jizɔs si wan po mami we in man bin dɔn day, kam put tu kɔpɔ we na lɛkɛ wan sɛnt so insay di mɔni bɔks. 3Nain Jizɔs se, “A de tɛl una se, fɔ tru, dis po mami ya put pas wetin ɔl dɛn ɔda pipul ya put insay dis mɔni bɔks. 4Ɔl dɛn pipul we kam put mɔni insay dis bɔks ya jɛs pul kenkeni pan di plɛnti plɛnti mɔni we dɛn gɛt, bɔt dis uman dɔn put ɔl wetin i gɛt fɔ tek manej in layf.”

Jizɔs Se Gɔd In Os na Jerusɛlɛm Go Pwɛl

(Matyu 24:1-2; Mak 13:1-2)

5Sɔm pan di lanin bɔy dɛn bin de tɔk bɔt aw Gɔd in Os fayn, di fayn ston dɛn we dɛn tek bil am, ɛn ɔl dɛn tin we pipul gi fɔ put insay de. 6Bɔt Jizɔs tɛl dɛn se, “Tɛm de kam we ɔl dɛn tin ya we una de si ɛn tɔk bɔt so nɔ go de igen. Ɔl dɛn ston ya go skata, wan ston sɛf nɔ go lɛf pantap in kɔmpin.”

Aw Pipul Go Sɔfa

(Matyu 24:3-14; Mak 13:3-13)

7Di lanin bɔy dɛn aks Jizɔs se, “Masta, ustɛm ɔl dɛn tin ya go bi ɛn wɛn di tɛm fɔ mek dɛn bi dɔn de kam nia, us sayn wi go si?”

8Jizɔs se, “Una tek tɛm mek nɔbɔdi nɔ mek una ful bikɔs plɛnti pipul go tek mi nem kam, dɛn go se dɛn na di Mɛsaya ɔ di tɛm we i go kam bak dɔn de klos. Una nɔ fɔ fala dɛn. 9Una nɔ fɔ fred wɛn una yɛri bɔt wa we de klos una ɛn we de fawe ɛn wɛn una yɛri se pipul de strayk; dɛn tin ya mɔs bi, bɔt dat nɔ min se di wɔl go dɔn wantɛm.”

10Jizɔs se, “Wan kɔntri go fɛt ɔda kɔntri ɛn wan neshɔn go fɛt ɔda neshɔn. 11Di grɔn go de trimbul bad, bad, bad aŋri go de ɔlɔbɔt, dɛn sik we de prɛd go de ɔlsay, plɛnti tin dɛn go bi we go mek pipul fred, ɛn Gɔd go sho plɛnti sayn na di klawd we go mek pipul fred. 12Bɔt bifo ɔl dɛn tin ya bi, pipul go ol una ɛn du una plɛnti bad tin. Dɛn go drɛg una go bifo dɛn bigman na di Ju mitin os ɛn dɛn go put una na jel. Dɛn go kɛr una go bifo dɛn kiŋ ɛn dɛn gɔvna bikɔs una biliv pan mi. 13Da tɛm de una go gɛt gud chans fɔ tɛl di pipul dɛn di tru tin we una no bɔt mi. 14Una fɔ mekɔp una maynd bifo dɛn tin ya bi so una nɔ go wɔri bɔt wetin una go tɔk wɛn dɛn ol una. 15A go mek una ebul ansa dɛn wit sɛns so dat dɛn wan we nɔ lɛk una sɛf go gri wit di ansa dɛn we una de ansa. 16Ivin una mama ɛn papa dɛn, una brɔda ɛn sista dɛn, una fambul dɛnsɛf ɛn una padi dɛn go kɛr una go kot ɛn dɛn go kil sɔm pan una. 17Pipul nɔ go lɛk una bikɔs una biliv pan mi. 18Bɔt pan ɔl dat, natin nɔ go du una, wan ia sɛf na una ed nɔ go lɔs. 19If una bia ɛn tinap traŋa, una go gɛt tru layf.

Jizɔs Se Jerusɛlɛm Go Pwɛl

(Matyu 24:15-21; Mak 13:14-19)

20“Bɔt di tɛm we una go si soja man dɛn gɛda rawnd Jerusɛlɛm, una fɔ no se di tɛm we da tɔŋ de go pwɛl dɔn de rich. 21Da tɛm de, mek di pipul dɛn na Judia rɔnawe go na dɛn il, mek dɛn pipul we de na Jerusɛlɛm kɔmɔt de, ɛn mek dɛn wan we de na fam nɔ tɔn bak go insay di tɔŋ; 22bikɔs na di tɛm dat we Gɔd go pɔnish in pipul dɛn lɛkɛ aw dɛn prɔfɛt bin dɔn rayt. 23Da tɛm de, i go bad fɔ dɛn bɛlɛuman ɛn dɛn wan we de gi pikin bɔbi! Di pipul dɛn na dis wɔl go gɛt fɔ sɔfa bad ɛn Gɔd go pɔnish dɛn. 24Dɛn go tek sɔd kil sɔm, dɛn go tek sɔm lɛkɛ prizina kɛr dɛn go ɔlsay. Dɛn pipul we nɔ sabi Gɔd, go pwɛl Jerusɛlɛm ɔltogɛda, te dɛn kɔmɔt na pawa.

Mɔtalman Pikin de Kam

(Matyu 24:29-31; Mak 13:24-27)

25“Una go si sayn pan di san, pan di mun, ɛn pan dɛn sta. Dɛn pipul na dis wɔl nɔ go no wetin fɔ du bikɔs dɛn go fred te dɛn nɔ ebul tɔk we di sɔl wata go rɔf ɛn di swɛlin dɛn de mek nɔys lɛkɛ tɛnda. 26Pipul go fent bikɔs dɛn de fred di bad tin dɛn we de kam bi na wɔl, di pawa dɛn we de na di klawd go muf kɔmɔt na di ples we dɛn bin de. 27Da tɛm de, ɔlman go si we Mɔtalman Pikin de kɔmɔt na klawd ɛn kam na wɔl wit pawa ɛn brayt brayt layt go de shayn rawnd am. 28Wɛn una si dɛn tin ya de bi, una es una ed ɛn luk ɔp to Gɔd bikɔs i nɔ go te igen, Gɔd go sev una.”

Di Tin we Wi Lan bɔt di Fig Tik

(Matyu 24:32-35; Mak 13:28-31)

29Jizɔs pul wan parebul fɔ dɛn. I se: “Una luk fig tik ɛn ɔl dɛn ɔda tik. 30Wɛn una si dɛn lif dɔn de kam, una go no se ren sizin dɔn de kam. 31Semwe so, wɛn una si dɛn tin we a dɔn tɔk bɔt so de bi, una go no se di tɛm we Gɔd go rul, de kam.

32“A de tɛl una fɔ tru se, ɔl dɛn tin ya mɔs bi, bifo dɛn pipul we de ya naw, day. 33Natin nɔ go de ɔp klawd igen ɛn di wɔl sɛf nɔ go de igen, bɔt mi wɔd dɛn go de sote go wit ɔl dɛn pawa.

Una Fɔ Waydawek

34“Bɔt una fɔ bikyaful, mek una nɔ jɛs sidɔm de ɛnjɔy dɛn pati ɛn drɔnk. Una nɔ fɔ put una at tumɔs pan wetin fɔ wɛr ɛn wetin una fɔ it. Mɔtalman Pikin go kam tɛm we una nɔ rɛdi. 35Lɛkɛ aw trap kin kech bif, na so da de de go kam pan ɔlman ɔlɔbɔt na wɔl. 36Una fɔ waydawek ɛn una fɔ de pre ɔltɛm so dat una go gɛt trɛnk fɔ bia ɔl dɛn tin we go bi na dis wɔl ɛn una go ebul fɔ tinap bifo Mɔtalman Pikin.”

37Ɛvri de, santɛm, Jizɔs kin de lan di pipul dɛn na Gɔd in Os, ɛn na nɛt i kin go na wan il we dɛn kɔl Mawnt Ɔliv, na de i kin de di ol nɛt. 38Wɛn do klin, ɔl di pipul dɛn we i kin de lan kin go mit am na Gɔd in Os fɔ yɛri wetin i gɛt fɔ lan dɛn da de de.

Currently Selected:

Lyuk 21: KRIO13

Highlight

Copy