Lyuk 18
18
Da Uman We In Man dɔn Day
1Jizɔs pul parebul fɔ in lanin bɔy dɛn fɔ sho dɛn se dɛn fɔ de pre ɔltɛm ɛn dɛn at nɔ fɔ pwɛl. 2Jizɔs se: “Wan jɔj bin de na wan tɔŋ we nɔ bin fred Gɔd ɔ rɛspɛkt mɔtalman. 3Wan uman we in man bin dɔn day bin de na da sem tɔŋ de. Dis uman kin go to di jɔj ɔltɛm ɛn tɛl am se, ‘Pa, a kɛr sɔmbɔdi go kot, duya, fɛt mi kes fɔ mi.’ 4Plɛnti tɛm di uman kin beg di jɔj, bɔt di jɔj nɔ kin gri fɔ tek in kes. Bɔt wande, nain di jɔj se, ‘Na tru se, a nɔ de fred Gɔd ɛn a nɔ rɛspɛkt nɔbɔdi, 5bɔt we dis uman dɔn de beg mi plɛnti tɛm, a go tek di kes. If a nɔ du so, i go de kam to mi sote misɛf go taya!’”
6Jizɔs se, “Una yɛri wetin dis jɔj we nɔ tret se? 7Una min se Gɔd in pipul dɛn we i dɔn pik ɛn we de kray to am de ɛn nɛt fɔ mek i ɛp dɛn, Gɔd nɔ go tek dɛn kes? Una min se Gɔd go te fɔ ansa in pipul dɛn? 8A de tɛl una se, i nɔ go te, Gɔd go tek in pipul dɛn kes ɛn fɛt fɔ dɛn! Pan ɔl dat, wɛn Mɔtalman Pikin go kam bak, a wɔnda if i go mit pipul na di wɔl we biliv pan am!”
Wan Faresi ɛn Wan Man we De Gɛda Taks
9Jizɔs pul parebul fɔ dɛn pipul we biliv se dɛn de waka tret wit Gɔd ɛn dɛn luk se di ɔda pipul dɛn nɔ de waka tret. I se: 10“Tu man dɛn bin go pre na Gɔd in Os wande; wan na bin Faresi, di ɔda wan na pɔsin we bin de gɛda taks.
11“Di Faresi tinap ɛn pre kwayɛt wan se, ‘Gɔd, a tɛl yu tɛnki bikɔs a nɔ tan lɛkɛ dɛn ɔda pipul; dɛn de rog, dɛn nɔ de du rayt, ɛn dɛn de lɛf dɛn mared wɛf ɔ man go fɛn ɔda pɔsin na trit. A tɛl yu tɛnki we a nɔ tan lɛkɛ dis man ya sɛf we de gɛda taks. 12A de fast tu tɛm ɛvri wik, a de sheb ɔltin we a gɛt tɛn ɛn gi yu wan pat.’
13“Bɔt di man we de gɛda taks tinap fawe, i nɔ es in yay ɔp sɛf. I jɛs de nak in chɛst fɔ sho se in at ebi ɛn se, ‘Gɔd, sɔri fɔ mi, mi na pɔsin we de pan sin!’ 14A de tɛl una se, bifo dis man we de gɛda taks go bak nain os, Gɔd padin am; bɔt Gɔd nɔ padin di Faresi. Ɛnibɔdi we put insɛf ɔp, Gɔd go put am dɔŋ, bɔt pɔsin we put insɛf dɔŋ, Gɔd go es am ɔp.”
Jizɔs Gladi fɔ Si dɛn Lili Pikin
(Matyu 19:13-15; Mak 10:13-16)
15Sɔm pipul briŋ dɛn lili pikin kam fɔ mek Jizɔs blɛs dɛn. Wɛn Jizɔs in lanin bɔy dɛn si dat, dɛn tɔk pan di pipul dɛn. 16Jizɔs kɔl di pikin dɛn, i tɛl in lanin bɔy dɛn se, “Una mek dɛn pikin kam to mi, una nɔ tap dɛn; na pipul dɛn lɛkɛ dɛn wan ya so go kam ɔnda Gɔd in rul. 17Fɔ tru, a de tɛl una se, ɛnibɔdi we nɔ gri fɔ mek Gɔd rul am lɛkɛ lili pikin, nɔ go kam ɔnda Gɔd in rul.”
Wan Jɛntriman
(Matyu 19:16-30; Mak 10:17-31)
18Wan bigman kam aks Jizɔs se, “Ticha, yu we gud, wetin a fɔ du fɔ mek a gɛt layf we go de sote go?”
19Jizɔs aks am se, “Wetin mek yu se a gud? Nɔbɔdi nɔ de we gud, na Gɔd in wangren gud. 20Yu sabi di Lɔ we se, ‘maredman nɔ fɔ lɛf in wɛf ɛn kip ɔda uman ɛn mare du man nɔ fɔ lɛf in man ɛn kip ɔda man, yu nɔ fɔ kil yu kɔmpin mɔtalman, yu nɔ fɔ tif, yu nɔ fɔ lay pan yu kɔmpin ɛn yu fɔ rɛspɛkt yu papa ɛn yu mama.’”
21Di bigman se, “A dɔn kip ɔl dɛn lɔ ya frɔm we mi na bin pikin.”
22Wɛn Jizɔs yɛri wetin di man tɔk, Jizɔs tɛl am se, “Na wan tin lɛf we yu nɔ du yet. Go, sɛl ɔl wetin yu gɛt ɛn sheb di kɔpɔ gi dɛn pipul we nɔ gɛt natin. Wɛn yu dɔn du dat, yu go jɛntri na ɛvin. Afta dat kam bi mi lanin bɔy.” 23Wɛn di bigman yɛri wetin Jizɔs se, in at pwɛl bikɔs na bin jɛntri man.
24Jizɔs si se di man in at pwɛl, so i se, “I traŋa fɔ mek jɛntri pipul kam ɔnda Gɔd in rul. 25I traŋa fɔ mek da big bif we nem kamɛl pas insay nidul yay, bɔt i go traŋa pas dat fɔ mek jɛntri pɔsin kam ɔnda Gɔd in rul.”
26Dɛn pipul we yɛri wetin Jizɔs tɔk, aks am se, “Wɛl, udat go sev?”
27Jizɔs se, “Gɔd ebul du wetin mɔtalman nɔ ebul du.”
28Na de Pita se, “Wi dɔn lɛf ɔltin fɔ fala yu.”
29Jizɔs tɛl dɛn se, “Mek a tɛl una, ɛnibɔdi we dɔn lɛf os, ɔ wɛf, ɔ brɔda dɛn, ɔ mama, ɔ papa, ɔ pikin dɛn fɔseka Gɔd in rul, 30Gɔd go mek i gɛt bɔku pas wetin i lɛf fɔ fala mi yon we, ɛn i go gi am layf we go de sote go na di wɔl we gɛt fɔ kam.”
Jizɔs Tɔk di Tɔd Tɛm bɔt In Day
(Matyu 20:17-19; Mak 10:32-34)
31Jizɔs tek in lanin bɔy dɛn go na kɔna ɛn tɛl dɛn se, “Wi de go Jerusɛlɛm naw ɛn ɔltin we dɛn prɔfɛt bin rayt bɔt Mɔtalman Pikin go bi. 32Dɛn go an Mɔtalman Pikin gi dɛn pipul we nɔto Ju. Dɛn pipul de go laf am, dɛn go du am tin we go mek i shem, ɛn dɛn go pit pan am. 33Dɛn go bit am, dɔn dɛn go kil am, bɔt Mɔtalman Pikin go rayz frɔm di grev di de we mek tri.”
34Bɔt Jizɔs in lanin bɔy dɛn nɔ bin no wetin Jizɔs de tɔk bɔt bikɔs Gɔd bin ayd di minin.
Jizɔs Mɛn Wan Begaman we Blɛn
(Matyu 20:29-34; Mak 10:46-52)
35Wɛn Jizɔs rich klos Jɛriko, i mit wan blɛnyay man sidɔm klos di rod de beg. 36Wɛn di blɛnyay man yɛri plɛnti pipul de pas, i aks dɛn wetin de bi.
37Dɛn tɛl am se, “Na Jizɔs we kɔmɔt Nazarɛt de pas.”
38Wɛn di blɛnyay man yɛri dat, i ala se, “Jizɔs we na Devid in pikin, sɔri fɔ mi!”#18:38 Devid in pikin min wan pan Devid in pikin pikin dɛn, na so di Ju dɛn bin de kɔl di Mɛsaya.
39Dɛn pipul we bin de waka bifo Jizɔs tɔk pan di man, dɛn tɛl am fɔ sɛt in mɔt, bɔt na di mɔ i de ala se, “Jizɔs we na Devid in pikin, sɔri fɔ mi!”
40Jizɔs tinap. I tɛl dɛn fɔ briŋ di blɛnyay man kam to am; wɛn di man kam klos Jizɔs, Jizɔs aks am se, 41“Wetin yu want mek a du fɔ yu?”
Di man ansa se, “Masta, a want mek yu mek a si.”
42Jizɔs tɛl di man se, “A de mek yu si naw, bikɔs yu biliv, yu dɔn wɛl!”
43Di man bigin si wantɛm ɛn fala Jizɔs de prez Gɔd. Wɛn ɔl di pipul dɛn si wetin bi, dɛnsɛf prez Gɔd.
Currently Selected:
Lyuk 18: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
