Jɛnɛsis 25

Ebraam In Ɔda Jɛnareshɔn Dɛn

(1 Kronikuls 1:32-33)

1Ebraam mared wan ɔda uman, we nem Kɛtyura. 2Kɛtyura bɔn siks bɔypikin fɔ am. Dɛn nem Zimran, Jɔkshan, Medan, Midian, Ishbak ɛn Shua. 3Jɔkshan bɔn Shiba ɛn Didan, ɛn Didan in jɛnareshɔn dɛn na bin dɛn Ashurayt, dɛn Lɛtushayt, ɛn dɛn Lɛumayt. 4Midian bɔn Ɛfa, Ɛfɔ, Anɔk, Abida, ɛn Ɛldaa. Ɔl dɛn wan ya na Kɛtyura in jɛnareshɔn dɛn.

5Ebraam bin lɛf ɔl in prɔpati gi Ayzak. 6Bɔt i gi di ɔda uman dɛn pikin dɛnsɛf gud prɛzɛnt dɛn ɛn mek dɛn go tap na ɔda kɔntri so dat dɛn go kɔmɔt nia in bɔysɔn Ayzak. Di kɔntri we i sɛn dɛn go, de na di ist pat. I du ɔl dis bifo i day.

Ebraam In Bɛrin

7Ebraam day we i ol wan ɔndrɛd ɛn sɛvinti-fayv ia. 8Ebraam bin dɔn tɔn prɔpa olpa we i kik di bokit, dɔn dɛn bɛr am na dɛn famili grev. 9Tu pan in bɔypikin dɛn, Ayzak ɛn Ishmɛl kɛr am go bɛr am na Makpila kev, we de nia Mamrɛ na da land we Zoa da Itayt, in bɔypikin Ɛfrɔn gɛt. 10Ebraam bin dɔn bay dis land ya na di Itayt dɛn an. Na de dɛn bɛr Ebraam ɛn in wɛf Sera. 11Afta Ebraam dɔn day, PAPA GƆD blɛs Ayzak we bin tap na Bia-laay-rɔy.

Ishmɛl In Jɛnareshɔn Dɛn

(1 Kronikuls 1:28-31)

12Dɛn pipul ya na Ishmɛl in jɛnareshɔn. Ishmɛl na bin da pikin we Ega, Sera in slev gyal we kɔmɔt Ijipt bɔn fɔ Ebraam. 13Na dɛn nem dɛn dis bay aw dɛn bɔn. Nɛbayɔth, Kida, Adbeɛl, Mibsam, 14Mishma, Duma, Masa, 15Adad, Tɛma, Jɛtu, Nafish, ɛn Kɛdɛma. 16Dɛn twɛlv pipul ya na bin di papa dɛn fɔ ɔl di twɛlv fambul dɛn we gɛt dɛn nem dɛn. Na dɛn nem dɛn bin gi to di ples we dɛn bin tap. 17Ishmɛl ol wan ɔndrɛd ɛn tati-sɛvin ia we i day go mit in pipul dɛn. 18Ishmɛl in jɛnareshɔn bin skata ɔlɔbɔt frɔm Avila te rich Shɔ, we de nia di Ijipt bɔda, na di rod fɔ go Ashɔ. Ishmɛl in pipul dɛn bin de nia in ɔda brɔda dɛn.

Aw Isɔ Ɛn Jekɔb Bin Bɔn

19Dis stori na bɔt Ayzak. In na bin Ebraam in bɔypikin. 20I bin ol fɔti ia we i mared Ribɛka, we na Bɛthuɛl in gyal pikin ɛn na Leban in sista. Bɛthuɛl na Aramean we kɔmɔt Padan Aram. 21Ayzak pre to PAPA GƆD fɔ mek Ribɛka go gɛt pikin bikɔs i nɔ bin bɔn yet. So PAPA GƆD ansa Ayzak in prea, ɛn Ribɛka gɛt bɛlɛ. 22Di pikin dɛn bin de fɛt nain bɛlɛ so i aks PAPA GƆD se, “Wetin mek dis kayn tin de bi to mi?”

23PAPA GƆD ansa am se,

“Wande wande, di bɔypikin dɛn na yu bɛlɛ go bi tu neshɔn we

nɔ go ɛva gri. Wan pan dɛn go

trɔŋ pas in kɔmpin. Di big wan

in yon jɛnareshɔn go de ɔnda di

smɔl wan in yon jɛnareshɔn.”

24We di tɛm rich fɔ Ribɛka fɔ bɔn, i bɔn twin. 25Di fɔs wan in bɔdi bin rɛd, soso ia bin kɔba in wanol bɔdi. Pɔsin go min se na klos i wɛr, so dɛn gi am nem Isɔ.#25:25 Isɔ Na di Ibru nem fɔ pikin we bɔn wit ia nain bɔdi. 26We di sɛkɛn wan bɔn, in grip Isɔ nain bakfut, so dɛn gi am nem Jekɔb.#25:26 Jekɔb I fiba di Ibru wɔd fɔ bakfut. Ayzak bin ol siksti ia we Ribɛka bɔn dɛn twin ya.

Isɔ Sɛl In Bathrayt

27Dɛn tu bɔbɔ ya gro te dɛn big. Isɔ bin sabi ɔntin, ɛn i bin lɛk fɔ go na bush. Bɔt Jekɔb in na bin di kwayɛt tayp we lɛk fɔ sidɔm na os. 28Ayzak bin lɛk Isɔ patikla we i kin ɛnjɔy di bush bif we Isɔ kin briŋ kam na os, bɔt Ribɛka in bin lɛk Jekɔb.

29Wande Jekɔb bin de kuk sup we Isɔ kɔmɔt ɔntin in taya ɛn aŋri wan. 30I tɛl Jekɔb se in aŋri bad so mek i gi am sɔm (pan di rɛd sup) we i de kuk. Na dat mek dɛn kɔl am Idɔm.#25:30 Idɔm Na di Ibru wɔd fɔ Rɛd.

31Jekɔb ansa am se in gri wans Isɔ gri fɔ sɛl in bathrayt gi am.

32Isɔ se na aŋri de kil am so, ɛn bathrayt nɔ gɛt natin fɔ bɛnifit am da momɛnt de.

33Jekɔb pin se paopa, i fɔ swɛ se nain di Jekɔb gɛt di bathrayt naw. So Isɔ swɛ ɛn sɛl ɔl in rayt as di fɔs-bɔy-pikin to in smɔl brɔda. 34Na de Jekɔb insɛf gi Isɔ bred ɛn sɔm pan di sup. Isɔ it ɛn drink wata ɛn go abawt in biznɛs. I nɔ bisin sɛf se nain bathrayt i dɔn sɛl so.

Currently Selected:

Jɛnɛsis 25: KRIO13

Highlight

Copy