Jɛnɛsis 12
12
Di Man Dɛn We PAPA GƆD Put Bifo: Ebram, Ayzak Ɛn Jekɔb
1PAPA GƆD tɛl Ebram se, “Lɛf yu fambul dɛn, yu papa in os, kɔmɔt na yu kɔntri ɛn go na wan kɔntri we a go sho yu. 2A go mek yu jɛnareshɔn bɔku te dɛn bi wanol neshɔn. A go blɛs yu ɛn mek yu femɔs, ɛn yu go bi blɛsin to ɔda pipul dɛn.
3A go blɛs dɛn wan dɛn we go blɛs yu, ɛn swɛ udat go swɛ yu. Na yu go mek dɛn neshɔn na wɔl gɛt dɛn blɛsin.”
4Ebram kɔmɔt na Eran lɛkɛ aw PAPA GƆD bin tɛl am fɔ du ɛn Lɔt sɛf go wit am. Da tɛm de Ebram bin ol sɛvinti-fayv ia. 5Ebram go Kenan wit in wɛf Seray, in brɔda in pikin Lɔt ɛn ɔl wetin dɛn bin dɔn gɛda wit di slev dɛn we dɛn bin dɔn gɛt na Eran. We dɛn rich na Kenan, 6Ebram waka insay di kɔntri te i rich Shɛkɛm, usay di oli tik na Mɔrɛ de. Da tɛm de di Kenan pipul dɛn bin stil tap na di kɔntri. 7PAPA GƆD apia to Ebram, dɔn i tɛl am se, “Na dis kɔntri a go gi yu ɛn yu jɛnareshɔn dɛn.” So Ebram bil ɔlta fɔ wɔship PAPA GƆD na da ples de usay i bin apia to am. 8Afta dat, Ebram muf go na di sawtɛn pat we na il ɛn bil in tɛnt bitwin Bɛthɛl we de na di wɛst ɛn Ayi we de na di ist. Dɛn i bil ɔlta ɛn wɔship PAPA GƆD de. 9Afta dat i bin de muf muf te i rich na di sawtɛn pat na Kenan fɔ go na Nɛgɛv.
Ebram Go na Ijipt
10It nɔ bin bɔku na Kenan so aŋri bin de. Di aŋri bin so mɔna dat Ebram muf fɔs go tap na Ijipt. 11As i de rɛdi fɔ krɔs di bɔda fɔ go insay Ijipt, i tɛl in wɛf Seray se, “A no se yu na fayn uman. 12We dɛn pipul na Ijipt si yu, dɛn go se yu na mi wɛf so dɛn go want fɔ kil mi ɛn lɛf yu. 13Duya tɛl dɛn se yu na mi sista ya; so fɔseka yu dɛn go lɛf mi ɛn dɛn go trit mi fayn.” 14We dɛn krɔs di bɔda go insay Ijipt, di Ijipt pipul dɛn si se di uman fayn. 15Ivin sɔm pan di bigman dɛm we de wok na di kiŋ in os we si Seray, go tɛl di kiŋ bɔt aw i fayn, dɔn dɛn kɛr am go na di kiŋ in os. 16Fɔseka am, di kiŋ trit Ebram fayn ɛn i gi am bɔku ship, kaw, man ɛn uman dɔŋki, man ɛn uman slev ɛn kamɛl dɛn.
17Bikɔs di kiŋ tek Seray fɔ bi in wɛf, PAPA GƆD sɛn bad bad sik pan in ɛn di pipul dɛn we de nain os. 18Dis mek di kiŋ sɛn kɔl Ebram ɛn i aks am se, “Wetin yu du mi so? Wetin mek yu nɔ bin tɛl mi se Seray na yu wɛf? 19Wetin mek yu se na yu sista, ɛn mek a tek am fɔ mi wɛf? Ya! Luk yu wɛf; tek am kɔmɔt na ya, una go wantɛm.” 20Di kiŋ ɔda in man dɛn fɔ drɛb Ebram kɔmɔt na di kɔntri, wit in wɛf ɛn ɔl wetin i gɛt.
Currently Selected:
Jɛnɛsis 12: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
